دەڤەری بارزان لە ناوچەی پارێزراوی ژینگەییەوە دەكرێتە ناشناڵ پارك

دەڤەری بارزان لە ناوچەی پارێزراوی ژینگەییەوە دەكرێتە ناشناڵ پارك

یەكە كارگێڕییەكانی سنووری مێرگەسۆر، بە هەماهەنگیی چەند كەسێكی پسپۆڕ، بۆردێكیان دروست كردووە، بۆ ئەوەی كاروباری یاسایی پرۆژەكە جێبەجێ بكەن و دەڤەری بارزان لە ناوچەی پارێزراوی ژینگەییەوە بكرێتە ناشناڵ پارك.
غەفوور ئەحمەد ، قائیمقامی مێرگەسۆر، رایگەیاند: "بارزان بە ژینگەپارێزییەوە ناسراوە، چونكە گیانی ئاژەڵ و پەلەوەر و رووەك و دار و درەختەكان پارێزراوە، بەمەش زیاتر لە 80 جۆر باڵندە و چەندین جۆر ئاژەڵی كێوی لە ناوچەكەدا دەژین، هەروەها 800 جۆر رووەكی گیایی و چەندین جۆر دار و درەختی جوان و دەگمەن هەن، واتە رووبەری ناوچەی پارێزراوی بارزان، زیاتر لە 110 كیلۆمەتری چوارگۆشەیە و زیاتر لە یەك سەدەیە ناوچەكە بووەتە پەناگەیەك بۆ پاراستنی ئاژەڵ و باڵندە كێوییەكان، چونكە راوكردن لەو شوێنە قەدەغە كراوە و لێپرسینەوەی توندی یاسایی بەرامبەر ئەو كەسانە دەكرێت، كە راوی پەلەوەر و ئاژەڵی كێوەی دەكەن، تەنانەت تیمی تایبەتی ڤێتەرنەری بە هاوكاریی لایەنی پەیوەندیداری دەڤەرەكە، لە كاتی بوونی هەر نەخۆشییەكی ئاژەڵی، بە هانای ئاژەڵە كێوییەكانەوە دەچن و دوای پشكنین، هەوڵی چارەسەركردنیان دەدەن".
قائیمقامی مێرگەسۆر، گوتیشی: "لەپێناو خزمەتكردنی زیاتر بە ژینگەی دەڤەرەكە، بڕیارە پڕۆژەیەكی گەورە لە دەڤەرەكەدا دروست بكرێت، بۆ ئەم مەبەستە لەگەڵ یەكە كارگێڕییەكانی ناوچەكە‌ و چەند كەسێكی پسپۆڕ لەو بوارە، بۆردێكمان دروست كردووە، كە بەدوای كارە یاساییەكان بكەوین و دەڤەرەكە لە ناوچەی پارێزراوی ژینگەییەوە بە شێوەیەكی سەركەوتووانە بكەینە ناشناڵ پارك، وەك دیاریشە ناوچەكە 2 هەزار و 476 مەتر لە ئاستی رووی دەریاوە بەرزە‌، خاوەنی زێی گەورەیە و شانەدەر پاڵپشتێكی گەورەی لایەنی پرۆژەكە دەبێت، لەگەڵ چەندین شوێنی دیكەی گونجاو بۆ پەرەپێدانی ناشناڵ پاركەكە و گرنگی و تایبەتمەندیی خۆی دەبێت لە ناوچەكەدا".
قەزای مێرگەسۆر دەكەوێتە ناوچەی بارزان و (165 كم) لە شاری هەولێر دوورە. لە پێنج شارەدێ پێكهاتووە، لەوانە ناحیەی (بلێ، گۆڕەتوو، مەزنێ‌، پیران، شێروان مەزن) لەگەڵ دەیان گوند. قەزاكە دەكەوێتە ناوچەیەكی شاخاوی، كە چیای بەناوبانگی وەك (شیرین، پیران، قەلەندەر و برادۆست)ی هەیە. لەو قەزایەدا سێ رووباری (زێی سەروو، چامە و باڵندە) هەیە. لە هاویندا كەشوهەوای نیمچە گەرم و وشكە. لە زستانیشدا سارد و باراناوییە، بەڵام لە وەرزی بەهار و پاییزدا كەشوهەوای خۆش و مامناوەندییە. لەم ناوچەیە چەندین پرۆژەی گەشتیاری هەیە و خاوەن گەلێك شوێنی جوان و فێنك و دڵگیرە، پیران، رێزان و رووباری چامە لەو شوێنانەن. شیاوی باسە، ئەشكەوتی شانەدەر، كە تەمەنی نزیكەی (60000) ساڵە، كەوتووەتە ئەو ناوچەیە و سەرەتای ژیان لەم ئەشكەوتە بۆ سەردەمی چاخی بەردین دەگەڕێتەوە.

زۆرترین بینراو