د. ئەحمەد سەفار: بۆ ساڵی ٢٠٢٠ گۆڕانكاری لە بودجەی گشتیی عێراقدا دەكرێت

د. ئەحمەد سەفار: بۆ ساڵی ٢٠٢٠ گۆڕانكاری لە بودجەی گشتیی عێراقدا دەكرێت

وەزارەتی دارایی عێراق ماوەی چەند رۆژێكە سەرقاڵی ئامادەكردنی پڕۆژەیاسای بودجەی گشتیی عێراقە بۆ ساڵی ٢٠٢٠، نوێنەرێكی كوردیش لە لیژنەی دارایی پەرلەمانی عێراق دەڵێ، دیاریكردنی پشكی ھەرێم بە رێككەوتن دەبێت لە نێوان ھەرێمی كوردستان و عێراق.

دكتۆر ئەحمەد سەفار، ئەندامی لیژنەی دارایی لە پەرلەمانی عێراق، بە ماڵپەڕی فەرمیی پارتی دیموكراتی كوردستانی راگەیاند: "ھەنگاوەكانی ئامادەكردنی پڕۆژەیاسای بودجەی گشتیی عێراق بۆ ساڵی ٢٠٢٠ دەستی پێكردووە، لە ئێستادا وەزارەتی دارایی و ئابووریی حكوومەتی عێراق سەرقاڵی ئامادەكردنی پڕۆژەیاسای بودجەی ساڵی ئایندەیە و سێ نوێنەری لیژنەی دارایی و ئابووریی پەرلەمانیش لەگەڵ وەزارەتی دارایین بۆ ئامادەكردنی بودجە، حەفتانە چەند كۆبوونەوەیەك بەڕێوە دەچن و بڕیارە لە دوای مانگی ئەیلوولی ئەمساڵ پڕۆژەیاسای بودجە رادەستی پەرلەمان بكرێت".

ئەندامەكەی لیژنەیی دارایی دەشڵێت: "بۆ ساڵی ٢٠٢٠ گۆڕانكاری لە بودجەی گشتیی عێراقدا دەكرێت و زیاتر گرینگی بە ئامانجەكان دەدرێت بۆ خەرجكردنی پارەی بودجە، واتە زیاتر ئەولەوییەت بۆ وەبەرھێنان دەبێت و دەمانەوێ سوود لە وەبەرھێنان وەربگرێت و پارەی بودجە بۆ ئەو كەرتانە بێت، كە سوودیان بۆ خەڵكی عێراق ھەیە".

پەیوەست بە پشكی بودجەی ھەرێمی كوردستان، سەفار گوتی: "ئەوەی پەیوەندی بە ھەرێمی كوردستانەوە ھەیە، ماددەیەكی تایبەتە لەنێو پڕۆژەیاسای بودجەی گشتیی عێراق و دەوەستێتە سەر رێككەوتنی نێوان ھەرێم و بەغدا، دانوستان لە نێوان ھەرێمی كوردستان و حكوومەتی فیدڕاڵ دەستی پێكردووە بۆ گەیشتن بە رێككەوتن، بەبێ رێككەوتنی نێوان ھەردوولاش، پشكی ھەرێمی كوردستان دیاری ناكرێت".

 

kdp -

زۆرترین بینراو