راگری پەیمانگەی تەكنیكی سۆران " سەرەڕای كۆرۆنا و ئەم بارودۆخە سیستەمی خوێندنمان سەركەوتوو بووە

راگری پەیمانگەی تەكنیكی سۆران " سەرەڕای كۆرۆنا و ئەم بارودۆخە سیستەمی خوێندنمان سەركەوتوو بووە

 "هەوڵمانداوە نەوت و پێداویستی بۆ قوتابیانی بەشە ناوخۆییەكان دابین بكەین"
دیدار-محەمەد هەسنانی:
 راگری پەیمانگەی تەكنیكی سۆران، لەدیدارێكی زاری كرمانجی، ئاماری قوتابیان و شێوازی بەڕێوەچوونی خوێندن لەمساڵدا دەخاتەروو، دەشڵێت " هەوڵدەدەین بەشی زیاتر لە پەیمانگەكەمان بكەینەوە لە پێناو خزمەتكردن بە خەڵكی دەڤەرەكەو پێشوەچوونی ئاستی زانست و زانیاری.
  م. پاكستان محەمەد ئەمین، راگری پەیمانگەی تەكنیكی سۆران، بەزاری كرمانجی راگەیاند " سەرەڕایی بڵاوبوونەوەی ڤایرۆسی كۆرۆنا و نەكردنەوەی هەموو بەشەكانی پەیمانگە بەڕووی قوتابیان، كەچی توانیومانە بە پەیڕەو كردنی سیستەمی ئاوێتەو ئۆنلاین بۆ ئەوەی قوتابیانمان لە خوێندن دانەبڕێن و بەردەوامیشین، ئەم بەشانەش كە پێویستە بە شێوەی كرداری وانە بخوێنن، بە گرتنەبەری رێكارەكانی تەندروستی بەردەوام بوونە بەپێی ئەم خشتەیەی بۆیان دیاریكراوە، رۆژانە سەردانی هۆڵەكانی خوێندن دەكەن".
  ئەوەشی ئاشكرا كرد " كە بەشێوەیەكی گشتیی زیاتر لە 1400 قوتابی لە پەیمانگەكەمان درێژە بە خوێندن دەدەن، ئەمساڵیش رێژەیەكی زۆری قوتابیمان وەرگرتوە، كە بریتین لە 675 قوتابی قۆناغی یەكەم، واتە بە هەرسێ‌ بەشەكانی خوێندنی (بەیانیان و ئێواران و پارالێل) تەنانەت بەهۆی بوونی چەند بەشێكی گرینگ لە پەیمانگەكەمان، ژمارەیەكی زۆری قوتابیانی زانكۆكان دابەزینیان كردووەو هاتوونەتە پەیمانگەكەمان و لێرە بوونەتە قوتابی".
  راگری پەیمانگەی تەكنیكی سۆران، ئەوەشی خستەڕوو " بوونی ستافێكی كارامەو لێهاتوو لە مامۆستا و كارمەندانی پەیمانگەكەمان وایكردووە كە ئاستی قوتابیان زیاتر بەرزبێتەوە، تەنانەت لە هەوڵی ئەوەداین چەند بەشێكی دیكە لە پەیمانگەكەمان بكەینەوە، بەڵام بەربەستمان زیاتر ئەم بارودۆخە بووە، واتە بڵاوبوونەوەی ڤایرۆسی كۆرۆنا و چەند رێكارێكی دیكەی ئیداری، بەڵام لەگەڵ ئەوەشدا بۆ خزمەتكردنی ئەم دەڤەرە دەستە وەستان ناوەستین و لە هەوڵەكانمان بەردەوام دەبین".
 م. پاكستان محەمەد ئەمین، راگری پەیمانگەی تەكنیكی سۆران، دەشڵێت " بۆ دابینكردنی بەشە ناوخۆییەكانی قوتابیان بەتایبەت ئەوانەی دوورە دەستن، هاوڵەكانمان بەردەوام بوونە ئەم بەشەناوخۆیانەش كە تایبەت بە پەیمانگەكەمان بوونە هەر لەسەرەتاوە بە قوتابیانمان داوە، بەشێكیش لە قوتابیان بۆخۆیان خانوویان گرتووە".
سەبارەت بە دابینكردنی پێداویستی بۆ بەشە ناوخۆییەكان و قوتابیان، بە هەرشێوەیەك بێت هەندێ‌ نەوتمان بۆ دابین كردوون لەگەڵ سۆپاو پێداویستییەكان بەپێی توانا، تەنانەت ئاورمان لەم قوتابیانەش داوەتەوە كە لە خانوویان بۆ خۆیان گرتووە بە پێدانی نەوت، پێشوازیش لە هەركەسێك دەكەین كە هاوكاری پێشكەش بە قوتابیان بكات و ئاسانكاریان بۆ دەكەین.

زۆرترین بینراو