روناك محەمەد: مامەڵە و پەروەردەی نا تەندروست هۆكاری توندووتیژی خێزانییە 

روناك محەمەد: مامەڵە و پەروەردەی نا تەندروست هۆكاری توندووتیژی خێزانییە 

محەمەد ئامۆكەیی- زاری كرمانجی:
روناك محەمەد، چالاكوانی كۆمەڵگەی مەدەنی و داكۆكیكار لە مافی ژن لە دیدارێكی زاری كرمانجی، قسە  لەسەر حاڵەتەكانی خۆ سوتاندنی خۆ كوشتنی ئافرەتان دەكات و هۆكارەكانیش دەخاتەڕوو پێی وایە: هۆكاری سەرەكی توندووتیژی خێزانیی و مامەڵەی نا تەندروستیی خانەوادەكان لەگەڵ كچان و ژنان هۆكارن و دەبێت بە هەموو لایەك هەوڵی پەروەردەیەكی باش بدەین لە پێناو كۆمەڵگەیەكی تەندروست".
روناك محەمەد، لە دەستپێكا هێما بۆ ئەوە دەكات" دیاردەی خۆسووتاندن و خۆ كووشتن  ڕوو لەزیاد بوونە و كەم  رۆژ هەیە ئەم هەواڵە دڵتەزێنە لەمیدیا و تۆڕەكۆمەڵایەتییەكان نەبیستین، ئەوەی روونە ژیانی مرۆڤ بێ كێشە نیەو ناشبێت، رۆژ بە رۆژیش كێشەكان زیاد دەبن و مرۆڤ دەبێت بەسەر ئەو كێشە و گرفتانەی دێنە بەردەمی زاڵبێت، چونكە مرۆڤ لەوە گەورەترە كە بەدەستی خۆی كۆتای بەژیانی بێنێت، ناكرێت هیچ شتێك ببێتە پاساو بۆ پەنابردنە بەر خۆكووشتن یا خۆسووتاندن، لەبەر ئەوەی چارەسەری كێشە بەنانەوەی كێشەیەكی دیكە چارەسەر نابێت".

لە بەشێكی تری قسەكانی دا ئەو چالاكوانەی كۆمەڵگەی مەدەنی، جەخت دەكاتەوە لەوەی دەبێ ژیرانە لە هەوڵی چارەسەركردنی كێشەكان دابین و وەك خۆی گووتی" ئێمەی مرۆڤ بۆچی بەدەستی خۆمان ماڵی خۆمان وێران بكەین و  دۆزەخێك بۆ خۆمان دروست بكەین، ئەو كەسانەی پەنا بۆ خۆسووتان دەبەن وەك چارەسەرێك دایەنێن، بەڵام دوای ئەنجامدانی كارەكە ئەگەر بیان دوێنی سەرجەمیان پەشیمانن لەو كارەی ئەنجامی كردوویەتی".
روناك محەمەد، ئەو هۆكارانە ئاشكرا دەكات كە دەبنە هۆی ئەوەی ئافرەتان پەنا بەرنە بەر ئەم دیاردەییە و رایدەگەیەنێت" هۆكارەكانی خۆ سووتاندن یا خۆ كوشتن بكەین هۆكار گەلێ هەن لەوانە توندووتیژی خێزانی و مامەڵەی نا تەندروست لەگەڵ تاكەكاندا بەتایبەتی كچان و ژنان، گرفتی خێزانی و ئابووری و نەبوونی هۆشیاری تەواو لەلایەن هەندێك لە تاكەكانی خێزان و دیزە بەدەر خۆنەكردنی ئەو كەسانەی كە لە پشتی خۆ كووشتن یا خۆ سووتاندنی ژنا نەوەن، هەندێ لە دەزگاكانی راگەیاندن هۆكارێكی دیكەن لە هاندان و بڵاوكردنەوەی هەواڵەكە و ئاسایی كردنەوەی بابەتەكە لە پێش چاوی خەڵك و پەخشكردنی هەندێ بەرنامەو درامای نابەجێ".
روناك محەمەد، پێی وایە" چارەسەرەكان گشتگیرن خێزان و كۆمەڵگە و رێكخراوەكانی ژنان و مافی مرۆڤ و یاسا و دادگاكان  هەموویان رۆڵیان هەیە لە چارەسەركردن و كەمكردنەوەی دیاردەكە، وەك باسی دەكات" ئەركی رێكخراوەكانە كۆمەڵگە بە هەردوو رەگەز هۆشیار بكەنەوە لەسەر پەروەردەیەكی تەندروست و چۆنیەتی مامەڵەكردن و رێزگرتن لەیەكدی و پێشێل نەكردنی مافی یەكتر و چۆنیەتی زاڵبوون بەسەر كێشەكان بە ئەرێنی، ئەمەش لە ڕێگەی بەستنی كۆڕ و سیمنار و بانگهێشتكردنی كەسانی تایبەتمەند و پسپۆڕ، پێویستە خێزانیش كراوەتەر گوێ لەكێشەی كچەكانیان بگرن و زوو بەدەم كێشەكانیانەوە بچن و چارەسەری گونجاویان بۆ بدۆزنەوە، نەوەك بەتوندوتیژی و هەڕەشە لێكردن، لایەنی پەیوەندی دار و دادگاكان سزای توندی ئەو كەسانە بدەن كە هۆكارن بۆ ئەنجامدانی كارەكە نەك تەنها بەهەڵوێست وەرگرتن سەركۆنەكردن كۆتایی بەكەیسەكە بهێنن".
لە دوا پەیڤەكانی دا روناك محەمەد، چالاكوانی كۆمەڵگەی مەدەنی، داوایەك ئاراستەی وەزارەتی رۆشنبیری حكوومەتی هەرێمی كوردستان دەكات و دەڵێ" گرنگە ئەم وەزارەتە لە خەمی تێكچوونی شیرازەی خێزاندابێ بەسانسۆر خستنە سەر ئەو كەنالانە كە هەندێ درامایانە لەگەڵ داب و نەریت و كلتووری كۆمەڵگە كوردواری ناگونجێن و رێگە خۆشكەر دەبن بۆ پەنابردن بەر ئەو دیاردەییە.