رووچوونی شەقامێكی سەرەكی شاری سۆران بەتەواوی هاتووچۆ پەك دەخات

رووچوونی شەقامێكی سەرەكی شاری سۆران بەتەواوی هاتووچۆ پەك دەخات

راپۆرت-محەمەد هەسنانی: سایدێكی شەقامی سەرەكی لەسەنتەری شاری سۆران، بەهۆی رووچوونەوە مەترسی بەڕووی هاتووچۆی شۆفێران و هاووڵاتییان دروستكردووەو لەگەڵ ئەوەشدا لەو شوێنەدا پێشتر رۆژانی هەینی چەندین كاسبكار لەشەقامەكەدا كاری دەستگێڕی و فرۆشتنی شتومەكیان دەكردو پەكیان كەوتووە.
سەربەست ئەنووەر، یەكێكە لەو كاسبكارانەی كە هەموو رۆژانی هەینی بەچەند كەل و پەلێكەوە روو دەكاتە شەقامی سەرەكی پشت قەسابانی قەزای سۆران، بە زاری كرمانجی گووت " من و سەدان كاسبكاری دەڤەری سۆران، بگرە خەڵكی شارۆچكەو ناوچەكانی دیكەش رۆژانی هەینی روویان دەكردە شەقامی دووسایدی پشت بازاڕی سۆران، بەمەبەستی كارو كاسبی و كاڵاكانمان بەدرێژایی شەقامەكە دادەنا، چونكە رۆژانی هەینی خەڵكێكی زۆر روو لەو شوێنەدەكەن و بازاڕ گەرمە، كەچی بەداخەوە لە ئێستادا بەشێكی سایدێكی شەقامەكە دووچاری رووچوون بووەتەوەو تا دێت مەترسییەكان رووچوونەكە زیاتر دەبێتەوەو ئەوەش كاریگەری دەكاتە سەر كارو كاسبی ئێمەو مەترسیشی درووست كردووە".
هەروەها ئەم ماڵانەی دانیشتووی دەوروبەری شوێنەكەن، مەترسی ئەوەیان هەیە ئەگەر رێگری لەو رووچوونە نەگیرێت كاریگەری زیاتر بەدوای خۆیەوە بیێنێت و زیانیش بە ماڵ و دووكانەكانی شوێنەكە بگات، پێشیانووایە " دەبوایە بەر لە دروستكردنی ئەو شەقامە سەرەكییە بیرلەوە بكرابووایەوە كە ئاوەڕۆ بۆ ئەو كەندە دروست بكرێت كە بەشوێنەكەدا رەتدەبێت، چونكە ئەوە هۆكاری ئەوەیە كە لەگەڵ بارینی بەفر و باران شوێنەكە دووچاری داڕمان ببێتەوە، داواكارن لە لایەنی پەیوەندیدار هەرچی زووە بوودجەیەكی تایبەت بۆ ئەم رێگا سەرەكییە تەرخان بكرێت رێگاكە بەشێوەیەكی ئەندازەیی چاكبكرێتەوە.
رائید دلاوەر لەتیف، گوتەبێژی بەڕێوەبەرایەتی هاتووچۆی سۆران، بە زاری كرمانجی راگەیاند " بەهۆی بەفر و بارن بارین و هەڵكەوتەی شوێنەكە، سایدێكی شەقامی سەرەكی پشت بازاڕی سۆران، دووچاری رووچوون بووەتەوەو لە چەندین شوێنە دەرزی بردووە، بەمەش لەپێناو سەلامەتی هاووڵاتیان و شۆفێران هاتووچۆ لە شەقامەكەدا راگیراوە و داواكارین لە شوفێران تا ئەوكاتەی چارەسەری بۆ دەكرێت، لەم سایدەی شەقامەكە هۆشیاربن و تیمەكانی ئەندازە لە بەڕێوەبەرایەتی هاتووچۆی سۆران، هێمای هۆشیار كردنەوەیان لەم شەقامە سەرەكییە داناوە".
لەمبارەوە كاوە نەجیم، سەرۆكی شارەوانیی سۆران، بە زاری كرمانجی راگەیاند: "چەندین جار سەردانی شوێنەكەمان كردووە، بەڵام بۆ چاككردنی ئەم ڕێگە سەرەكییە و رێگەگرتن لە ڕۆچوونی زیاتر، پێویستی بە دیواری بەربەست و چەند خزمەتگوزاریی دیكە هەیە، دوای پشكنینی شوێنی ڕۆچوونەكە بە راپۆرت داواكاریمان بۆ پارێزگا و سەرووی خۆمان بەرز كردووەتەوە و چاوەڕوانی رەزامەندیی ئەوانین تا بتوانین بە شێوەیەك لە شێوەكان چارەسەری ئەم رێگایە بكەین".
لەلایەن خۆیەوە كرمانج عیزەت قائیمقامی سۆران، بە زاری كرمانجی گووت " بەهۆی هەڵكەوتەی شوێن و و خاكەكەی و بوونی جۆگەی ئاوی پاشماوەكان، وایكردووە كە لەكاتی باران و بەفر باریندا سایدێكی شەقامی گشتی پشت بازاڕی سۆران دووچاری رووچوون بێتەوە، هەروەها زیانیشی بە تۆڕەكانی كارەبا گەیاندووە، لەلایەن تیمەكانی چاككردنەوەی كارەبا ستوونی كارەبا گواسترانەوەو بەشێوەیەكی كاتی گرفتی كارەبا لەشوێنەكە چارەسەر كراوە".
گووتیشی " پێشتریش دەرخستەمان بۆ ئەو شەقامە كردووە، بەڵام دەبێت ئاوەڕۆی شوێنەكە بەدرێژەی شەقامەكە دروست بكرێت، لەگەڵ دیواری پاڵپشت، تا رێگا لە رووچونەكە بگیرێت، ئەمەش بوددجەو پارەیەكی زۆری پێویستەو چاوەڕوانی رەزامەندی سەرووی خۆمانین، تا بتوانین دوای وەستانی باران و لەوەرزی داهاتوو دەست بە پڕۆژەكە بكەین.

زۆرترین بینراو