رۆماننڤیس (زەردەشت شاهین) مژیلی نڤیسینا سێیەم رۆمانا خوەیە

رۆماننڤیس (زەردەشت شاهین) مژیلی نڤیسینا سێیەم رۆمانا خوەیە

هەڤپەیڤین: دلۆڤان هالۆ
رۆماننڤیس زەردەشت شاهین، دیار كر پشتی هەر دوو رۆمانێن خۆ یێن ب ناڤێن (ل خوە گەڕیان) و (ئافەریدەیێن تەنگەزار) چاپ كرین، نوكە ژی ‌‌مژولی نڤیسینا سێیەم ڕۆمانا خوەیە.
زەردەشت شاهین، ل دوور سەربۆڕا خۆ یا نڤیسینا رۆمانێ، گۆت" پشتی من گەلەك خواندی و ئەز فێری گەلەك تێگەهێن ژیانێ بوویم، ل وی دەمی یا فەر بوو داڕێژم، ل ساڵا (2011)ێ بوو دەمێ من بیرهاتنێن خۆ نڤیسین و پاشی من كار ل سەر ڤەكۆلینەكا جڤاكی كر، ب ناڤێ (مێژوویا ژنێ و جڤاك)، لێ د ڤی بواریدا من گەلەك ئاستەنگ دیتن، چ ژ لایێ هزرا توند یا جڤاكیڤە، چ ژ لایێ نێرینێن كەسێن دەوروبەرێن خۆڤە، ژ بەر هندێ من دەست ژێ بەردا و نوكە ژی ل بەردەستە، لێ هندەك كێماسی تێدا هەنە، و ل ساڵا (2016)ێ من دەست ب نڤیسینا ڕۆمانێ كر، وەكی كەسەكێ هاتیە ئێشاندن ب بیرهاتنێن خۆ، من خۆ تێدا دیت و یا فەر بوو بهێتە داڕشتن، ڕۆمان جهەك بوو كو ئەز ب ڕێكا وێ هەم برینێن خۆ و هەم یێن جڤاكی تێدا داڕێژم و دەربڕینێ ژێ بكەم".
سەبارەت هەر دوو ڕۆمانێن خۆ یێن چاپ كری، زەردەشت د بێژیت" ڕۆمانا (ل خوە گەڕیان) ئێشا جەرگێ من و هندەك بویەرێن ژیانا منن، د ناڤ دا ژی بوویەرێن ژانێن گوندەكێ دەڤەرێ و تەڤگەرا (گوندێ بۆسەلێ) كو گوندێ خۆ ڕاگریێ و بەرخوەدانێ دهێتە ناساندن".
ل دوور نڤیسینا ڕۆمانا خۆ یا نوی، رۆمان نڤیس داخویاكر "ڕۆمانا من‌ یا نوی ڕۆمانەكا دیرۆكییە و ب شاهنشاهیا میدیا (مێد) ڤە گرێدایە، ژیانا سێ شاهێن میدیا تێدا ب درێژاهی هاتیە داڕشتن، ژیانا وان یا كەسوكی و شەڕێ وان دژی ئاشووریان و ڕزگاركرنا دەڤەرێن كوردی، من مفا ژ گەلەك ژێدەرێن دیرۆكی وەرگرتن، من ئەڤ جۆرە ڕۆمانە هەلبژارت، چونكی من گەلەك ل سەر مێژوویا كوردان ب گشتی خواندییە، ژ ژێدەرێن ڕۆسی و یۆنانی و كەسێن كوردناس، هندەك ژێدەرژی ژ كەسانێن كوردن، یێن كو ل سەر دیرۆكا كوردان كار كری، ل دەمەكێ نێزیك دێ ب دوماهیك هێت و كەڤیتە بەر دەستێ خواندەڤانان".
سەبارەت ڕۆمانا خەیالی و یا ژیواری د بێژیت" ب دیتنا من هەر دوو خۆش و سەركەڤتینە، لێ وەكو كەتوار ڕۆمانا خەیالی، چونكی خەلكێ مە گەلەك ئێش و ئازار دیتینە و د خوازیت كەتوارەكێ (خەیالی) بخوینیت و ژ بۆ خۆ ئاڤا بكەت، ئەگەرێ وێ ژی ئەوە كو جڤاكێ مە ژ لایێ بنەما و تێگەهێن مرۆڤایەتیێ دویر كەڤتیە و ب ڤێ چەندێ بوویە خودانێ خەیالان".
زەردەشتێ نڤیسكار، ل دوور بنەمایێن ڕۆماننڤیسەكێ سەركەڤتی و بنەمایێن ڕۆمانەكا سەركەڤتی گوت"تەڤنێ ڕۆمانێ و چیڕۆكا وێ گرنگە، خەیالا ڕۆمانڤیسی و چێكرنا جیهانەكا نوی ژ بۆ خواندەڤانی، نە مەرجە ئەو ڕۆمان دەمێ كو بەڵاڤ دبیت بناڤ و دەنگ بكەڤیت، خواندن و گەڕیان ژ بۆ نڤیسەری گرنگە، خەیالا وی بەرفرەه بیت و خودانێ هەستەكا جڤاكی بیت، دڤێت نڤیسەر یێ جڤاكی و نێزیكی خەلكێ خوە بیت، لێ نەمەرجە هەڤالەتیا گەلەكان بكەت، یا گرنگ تێربوونەك هەبیت ژ بۆ دیتنا كەتوارێ جڤاكی و ڕەوشا خەلكێ، ببیتە خودیكەك ژ بۆ ئێشان و دەردێن جڤاكێ خۆ، نە چێكریێ هندەك كەسان بیت و دڤێت ژ جەرگێ جڤاكێ خۆ دەركەڤتبیت".
ل دوماهیێ ژی سەبارەت ئاستێ ئەوێ ژمارا زۆر یا ڕۆمانان كو د هێنە چاپ كرن، رۆمان نڤیس د ‌بێژیت" یا ڕاست ئەوە، دێ گەلەك نڤیسین هێنە مەیدانێ و دێ بیتە كۆمەكا بارگرانیێ ژ بۆ وێژەیا كوردی ژ لایێ ئاستیڤە‌، ب ڕاستی پڕانیا وان، بێ ئاستن و بەس گوتنا چیڕۆكێیە و چ تەڤن و پەند د ناڤدا نینن، ڕۆماننڤیس دڤێت كەسەك بیت كو گەلەك خواند بیت و خودان سەربۆڕ بیت، بزانیت ڤەگێڕانا بوویەر و ڕوودانان بكەت، ب شێوەیەكێ باش زمانێ خۆ ڕێك بێخیت، چونكی زمان ئەدەبیاتە و ئەدەبیات زمانە، ڕاستە مە زمانێ ستاندارد نینە، لێ بلا ئەدەبیات ب زمانێ كولانكی نەهێتە نڤیسین".

 

زۆرترین بینراو