رۆژئاوا ناكەوێت

ئیسماعیل ئیبراهیم

 

كورد نەتەوەیەكی داگیر كراوە، هەر مرۆڤێكی كورد لە دایك بێت شۆڕشگیرێكی دیكە دێتە دونیاوە، ئیتر ئەمە قەدەری كوردە، خووی مرۆڤ و نەتەوەی شۆڕشگیریش ئەوەیە هەرگیز نانووزێتەوە و ناپاڕێتەوە، مەرد مەرد لەبەردەم داگیركار دەوەستێتەوە، مەند مەند بەرەو پیری مردن دەچێت.
ئاساییە دایكێكی جەرگ سووتاو بەدیار جەستەی لەتكراوەی منداڵەكەیەوە فرمێسك برێژێت، بەڵام هەرگیز لە مرۆڤی شۆڕشگێر ناوەشێتەوە بەدەم پاڕانەوە و گریان و كرووزانەوە خۆی بچووكبكاتەوەو ورەیی ئەوانی دیكەش بێنێتە خوارەوە.
هێزی زەبەلاحی توركیا لە ئاستی جیهان ژمارەیەكی حیساب بۆ كراوە، بۆیە هیچ هونەر و ئازایەتییەكی تێدا نییە جەنگێكی نابەرامبەر لە ناوچەیەكی بچووك بباتەوە، ئەوەشی تا ئێستا لە بەرەكانی جەنگ روودەدات بۆ ئەو وەڵاتە زلهێزە چاوەڕوانكراو نەبووە، بۆیە ئازایەتی و مەردایەتی لەو بەرگریكردنەی هێزە شەڕڤانە كوردەكانە كە لە ئاست ئەو لەشكرە داگیركارە بەرخۆدانی سەخت دەكەن و رێگە لە چوونە پێشەوەیان دەگرن، بە دڵنیاییەوە ئەگەر فڕۆكە جەنگییەكان و تۆپخانە دوور هاوێژەكان نەبێت، ئەو هێزە و هاوپەیمانانی ناتوانن لەم جەنگە براوە بن،( ئێستاش گومانی براوە بوونیان لێ دەكرێت).
پیلانی توركیا نە لەسەرێ كانی و نە لە قامشلو كۆتایی نایەت، پیلانی توركیا لەو شوێنە كۆتایی دێت كە دەڵێن " لە ئەفریقا خێمەیەك بە ناوی دەوڵەتی كورد هەبێت لە ناوی دەبەم". واتە دەستكەوتەكانی رۆژئاوا بە هەموو شێوەیەك لە ناو دەبات و دواتریش بەرەو باشوور دێت. بۆیە پێویستە خوێندنەوەی راست و دروست بۆ ئەو پەلامارە داگیر كارییەی توركیا بكرێت.
ئێستا چەند وەڵاتێك كم نەبێت باقی جیهانە هاوسۆزە لەگەڵ نەتەوەی كورد و هێرشەكان سەركۆنە و ئیدانە دەكەن. یا پشتگیری لێ ناكەن، یەكێتی ئەوروپا هەڵوێستی جددی هەیە، كۆمكاری عەرەبی بە هەمان شێوە، روسیە هاتۆتە سەر خەت، چین نیگەرانی خۆی دەربەری، ئەمریكا رووبەرووی پاڵەپەستۆی ناوخۆیی دەركەی بۆتەوە. هەموو ئەمانە لە ئەنامی بەرخۆدانی رەوا و قارەمانییەتی نەتەوەی كوردە لە خۆرئاوا.
لە هەموو جیهان مامەلە كردن لەگەڵ ئەمری واقعە، ئەگەر كورد لە ناوچەكانی نزیك سنوور بەبێ شەڕ پاشە كشەی كردبایە هیچ وەڵاتێك نووقەی لێوە نەدەهات، ئەگەر ئەم بەرگری كردنە یەك هەفتەی دیكە بەردەوام بێت و خۆراگرانە بجەنگین ئەوە ئەمری واقع بەسەر ناوچەكە و توركیا و سوریە دەسەپێندرێت، كە من پێموایە پێویستە بە هەموو شێوەیەك و بە عەقلێكی ژیرانەی سیاسییانە تەواوی هێزە كوردییەكان لە باقی پارچەكانی دیكە پشتگیری دۆخی خۆڕئاوا بكەن، لەبەر ئەوەی كەوتنی رۆژئاوا كەوتنی هەموو دەستكەوتەكانی كوردە لە هەموو جیهان و لەدەست چوونی خاكێكی ستراتیژییە بۆ هەتاهەتایە.
ئێستا كاتی ئەوەیە كورد هەر جۆرە كارتێكی بە دەستەوەیە لەبەرامبەر داگیركاری توركیا و دروستكردنی گوشار بكاریان بێنێت، هەموو تاكێكی كورد لە هەر پلە و پایەیەك دابێت لە هەر كوێ ئەم جیهانە بێت لە هەر رێگەیەكەوە بێت پێویستە بیر بكاتەوەو خزمەت بكات، ئەمڕۆ رۆژی كوردایەتییە و پێویستە بەر لە هەموو شتێك كورد بین و تەواوی جیاوازی ئایدۆلۆژی و تێڕوانینی سیاسی وەلا بنێن. وەك سەرۆك بارزانی فەرموویی كاتی پاڕانەوە و هەڵچوون نییە كاتی هیمەتە.
نابێ ئەوەش لە یاد بكەین كە گرنگە و دەبێ هێزە كوردییەكانی خۆرئاواش بە سیاسەت و شێوازی مامەلەی خۆیاندا بچنەوە، هەم لە ئاستی ناوخۆ هەمیش لە ئاستی ناوچەیی و جیهانی.

 

زۆرترین بینراو