رۆڵ و كاریگەری سەرپەرشتیار لە پەروەردە

بكر كریم حسن

 بەرێوەبەری گشتی چاڵاكی وەرزش و هونەرماستەر لە كارگێری پەروەردەیی

دكتۆر راغب ئەل سەرحان دەڵێ" سەركردایەتی بەرپرسیاریەتییە، میرنیشینی راسپاردنە نەك رێزلێنان".
بێگومان سەرپەرشتیاری لە پرۆسەی پەروەردە و فێركردن بەرپرسیاریەتییەكی گرنگی ویژدانییە، لەهەمان كاتدا سەرپەرشتیاری میرنیشینی و رێزلێنان نییە، بەڵكو راسپاردن و ئەرك و بەرپرسیاریەتییە لە پرۆسەكەدا. لە هەمان كاتدا سەرپەرشتیار پێویستە شارەزا و لێزان و دڵسۆزی پرۆسەكە بێت و یارمەتیدەرێكی كارا بێت بۆ گەشەكردن و پەرەپێدانی پسپۆڕی وپیشەیی بۆ مامۆستایان و كۆی پرۆسەكە و هاوكارێكی بەهێز بێت بۆ چارەسەركردنی گرفتە پەروەردەییە جۆراوجۆرەكان، هەروەها باكگراوندێكی زانستی پسپۆڕی هەبێت، بتوانێ بەردەوام هۆیەكانی پەروەردەیی بخاتە گەڕ بە شێوەیەكی تەندروست و راست و بەردەوام بەشداری لە خول و راهێنان ومەشق كرد بێت و شارەزاییەكی كەلەكە بووی پسپۆڕی هەبێت، لە هەمان كاتدا خۆشەویستی و عەشق بۆكارەكەی لە ناخی سەرپەرشتیاردا رەنگ بداتەوە بۆ ئەوەی بتوانێ بەردەوام بێت لە داهێنان ونوێگەری، چونكە ئەو سەرپەرشتیارانەی عەشق و خۆشەویستی بۆ كارەكانیان هەیە بەردەوامن لە كاری نوێی و داهێنانی نوێی پرۆسەكە جوانتر دەكەن، بەردەوامن لە گەشەسەندن وپەرەسەندن، لە رووی كەسایەتییەوە پێویستە كەسایەتییەكی جێگیری هەبێت و پشوو درێژ بێت و خاوەن ڕەوشت و ناوبانگێكی پەروەردەیی بێت و ڕەفتارو كردار وگوفتاری پەروەردەیی تەندروست بێت و نموونەی بەرز بێت لە پرۆسەی پەروەردە و فێركردن و دڵسۆزی و پەرۆشییەكی زۆری هەبێت بۆ ئیش كردن و سەركەوتنی پرۆسەكە، هەردەم رۆڵی باوك و دایك و برا وخوشك ببینێت و ببێتە چەترێكی دڵنیایی بۆ دەستەی كارگێڕی قوتابخانە و مامۆستایان، وە بەردەوام بێت لە چارەسەكردنی كێشەی مامۆستایان و قوتابیان و قوتابیان بە چەقی قورسایی پرۆسەكەببینێت و بەردەوام هانی قوتابیان بدات بۆ كاری چاكە و پەروەردەیی، هەروەها بەردەوام بێت لە رواندنی تۆوی بەها پەروەردەییەكان و خۆشەویستی خاك و نیشتمان و رێزگرتنی پیرۆزییەكان، وە گرنگی بە لایەنی گەشەكردنی بیری قوتابیان بدات. هەروەها گرنگە سەرپەرشتیار كاری خۆی بزانێ لە دەرگای قوتابخانە تا دەگاتە ئاودەست و ئاوەرۆ هەمووی لە بەرپرسیاریەتی وئەمانەتی ئەو دایە لە چالاكییەكان لە پەرتووك و كۆگا لە بەدواداچوون بۆ پلانی رۆژانە و مانگانە و ساڵانەی مامۆستایان، هەروەها بەردەوام بێت لە ئامادەكردنی راپۆرت و توێژینەوەی سەرپەرشتیاری لە سەر كۆی پرۆسەكە و دەستنیشان كردنی خاڵە لاواز و بەهێزەكان لە پرۆگرام و رۆڵ و كاراكتەری خودی مامۆستا و قوتابی ژینگەی قوتابخانە ولە كۆی گشتی پرۆسەكە ئاگادار بێت، بەردەوام پێشنیاری هەبێت بۆ بەرەوپێشبردنی پرۆسەی پەروەردە وفێركردن و كاریگەری پەروەردەیی هەبێت بۆ چاككردنی پرۆسەكە، ماوەتەوە بڵێم بۆ هەڵسەنگاندن و دادپەروەری لە ناو پرۆسەی پەروەردە بە پێویستییەكی پەروەردەیی دەبینم كەوا هەردوو ساڵ جارێك هەڵسەنگاندنی وورد بۆ سەرپەرشتیار بكرێت تا چەند سەركەوتوون لە پرۆسەكە وكاریگەرییان هەبووە و پێویستن بۆ پەروەردە، پێویستە سەرپەرشتیاران بە كرداری لە ناو پرۆسەكە بن و هەروەكو پلە و دەستكەوت و رێزلێنان تەماشا نەكرێت، بەڵكو بەرپرسیاریەتییە.
بۆیە گرنگە لە وەزارەتی پەروەردە چاوێك بە ئەرك و بەرپرسیاریەتی و مەرج و پێوەرەكانی سەرپەرشتیاری دابخشێنەوە و بە شێوەیەكی دادپەروەرانە هەڵسەنگاندنی ورد بۆ بكرێ، مەرج نەبێت تا خانەنشینی هەر سەرپەرشتیار بن، یانیش ئەوانەی بە تاقیكردنەوە و پێوەرەكاندا رەت نەبوون، پێویستە هەمان پێوەر و مەرج ئەوانیش بگرێتەوە و لە ناو پرۆسەی پەروەردە و فێركردن، قوتابخانە و مامۆستا و قوتابی كارەكانیان پراكتیزە بكەن، واتە رۆڵی سەرەكی سەرپەرشتیاری ببینن، چونكە سەرپەرشتیاری راستەقینە هەردەم پێشەنگە لە پرۆسەی پەورەردە.

بابەتى پەیوەندیدار بیروڕا

دەرمانناسی

دەرمانناسی

رواندزیانی

رواندزیانی

بیروڕا

زۆرترین بینراو