رێگای سەرەكی سەدان گوندی ناحیەی سیدەكان و بناری حەسەن بەگ روودەچێت

رێگای سەرەكی سەدان گوندی ناحیەی سیدەكان و بناری حەسەن بەگ روودەچێت

مورشید برادۆستی – دیانا : ماوەی چەند مانگێكە لە چەند شوێنێكەوە رێگای سەرەكی سەدان گوند و ئاوایی نێوان ناحیەكانی سیدەكان و دیانا رووچوە و ئەمەش نیگەرانی لای هاوڵاتیان بە گشتی و شوفێران بە تایبەتی لێكەوتۆتەوە .
شایەنی باسە بەهۆی ئەو بارانە زۆرەی كە لە ئەمساڵدا هەرێمی كوردستانی گرتەوە ،كاریگەریێكی خراپی كردە سەر شەقامەكان و بەو هۆیەشەوە بەشێك لە شەقامە سەرەكیەكان رووخاون و رێگای سەرەكی نێوان سیدەكان و دیاناش بەدەر نەبوو لەم زیانە .
تەلعەت سولێمان شوفێرە و كاری گواستنەوەی هاوڵاتیان دەكات و بەم شێوەیە بۆ زاری كرمانجی هاتە ئاخاوتن و گوتی " رێگای سەرەكی نێوان سیدەكان و دیانا لەچەندین شوێنەوە تووشە رووچوون هاتووە و ئەمەش مەترسی بۆ ئێمەی شوفێران و ئەو هاووڵاتیی و شوفێرانەش درووستكردووە كە دەیان گوازینەوە و گەر لە زووترین كات چاكنەكرێتەوە ئەوا سەرەرای زیانی ماددی ، ئەگەریشی هەیە زیانی گیانیشی لیبكەوێتەوە " .
رەشید ئەحمەد هاووڵاتییەكەی دەڤەری سیدەكانە بە زاری كرمانجی گووت " بەو پێیەی سیدەكان ناحیە و هەموو كارەكان لێ رای ناكرێت و دەبێت بۆ تەواو كردنی مامەڵەكانمان روو لە سۆران بكەین، یا نەخۆشی و نەشتەرگەریەكان دەبێت بە ناچاری روو لەو قەزایە بكەین، لە ئێستەشدا لە نێوان بادلیان – شیخان لە رێگەی سەرەكی سۆران – سیدەكان شوێنێكی رێگاكە رووچووە، ئەگەر پەلە نەكرێت لە چاككردنی ئەگەر هەیە رێگاكە بەیەكجاری دابخرێت و پەكی هاتووچۆمان بكەوێت، هەر بەوهۆیەوە هاووڵاتییان و خەلكی دەڤەرەكە بە ترسەوە هاتووچۆ بكەین و ئەگەری روودانی نەخوازراویشی لێدەكرێت ، دەشڵێت " ئەم رێگەیە هاتووچۆی زۆری لەسەرە و جگە لە شوفێران و هاوڵاتیانی ئاسایی ، رۆژانە بەرپرسانی حزبی و حكومی شارەدێی سیدەكان و بەشێكی زۆری قوتابیانی دەڤەرەكەمان بۆ خوێندن لە زانكۆ و پەیمانگاكان رۆژانە هاتووچۆ بەو رێگایە دەكەن .
زیاد خەلق شوفێرە و كاری گواستنەوەی هاووڵاتییان دەكات بە زاری كرمانجی گووت" رۆژانە كاری گواستنەوەی هاووڵاتییان لە شارەدێی سیدەكان بۆ شارۆكەی سۆران دەگوازمەوە، رێگاكە جەنجاڵی لەسەرە و هاتووچۆی زۆری تێدا دەكرێت، لەكاتێكدا چەند شوێنێكی رێگاكە رووچووە و بەترسەوە هامووشۆی تێدەكەین٬ ئەگەر شوفێران لەو شوێنە شارەزا نەبن رووداوی نەخوازراو دروست دەبێت . بۆیە داوكارین لە حكومەت پەلە بكەن لە چاككردنەوەی ئەو رێگایە .
لەو بارەیەوە، ئەندازیار خوسرەت سادق دری بەرپرسی فەرمانگەی چاككردنەوە و پاراستنی رێگا و بانی سۆران لە لێدوانێكیدا بە زاری كرمانجی راگەیاند " ئاگاداری تێكچوونی بەشێكی رێگای سۆران - سیدەكانین لەنزیك گوندی بادلیان و شیوە شێخان بەهۆی زەنەگی شوێنەكە و زۆری ئاوی ژێر زەوی رووچووە٬ هەرچەندە ئەركی ئێمەیە چاككردنەوەی٬ بەڵام بۆ ئەم جۆرە رووداوانە باشتر وایە شارەدێی پەیوەندار نوسراوی فەرمی بداتە بەڕێوەبەرایەتی لە هەولێر چونكە ئێمە دەسەڵاتی چاككردنەوەمان نییە .
بەرپرسی فەرمانگەی چاككردنەوە و پاراستتی رێگا و بانی سۆران دەڵێت " بوددجەی پێویست لەبەر دەستی بەڕێوەبەرایەتی ئێمەدایە لە هەولێر٬ تەنانەت بە كرێ گرتنی ئامێرێك بۆ چەند كاتژمێرێكیش بێت رازامەندی هەولێری دەوێت و هەرئەوانیش دەبێت ڕەزامەندی بدەن و خەرجی بگرنە ئەستۆ بۆ چاككردنەوەی رێگاكە .
رێگای سەرەكی سۆران – سیدەكان جیا لەوەی رێگای سەرەكی نزیكەی 250 گوندی دەڤەرەكەیە هاوكات چەندین كوێستان و ناوچەی گەشتیاری دەكەوێتە سەر ئەو رێگایە ئەمە لە كاتێكدایە رێگای سەرەكی هاووڵاتییانی ژمارەیەك گوندی ناحیەی دیانا و بناری حەسەن بەگە و بەتێكچوونی ئەو رێگایە ئاستەنگی زۆر بۆ هاووڵاتییان و خەلك دروست دەكات .

 

زۆرترین بینراو