رەفیق سەعید: سۆران دەبێتە تیپێكی زەحمەت بۆ یانەكانی تر

رەفیق سەعید: سۆران دەبێتە تیپێكی زەحمەت بۆ یانەكانی تر

زاری كرمانجی-سۆران: پێشتر یەكێتی تۆپی پێی كوردستان بڕیاری دابوو كەلە 27 ی ئەم مانگە خولی تۆپی پێی پلە نایابەكانی كوردستان دەستپێبكات, وەك ئاشكرایە یانەی وەرزشی سۆران پارساڵ بە ئاستبەرزی خۆی توانی تەواوی بەربەستەكان ببڕێت و بگاتە ریزی پلە نایابی كوردستان, لە دیمانەیەكدا بۆ هەفتەنامەی زاری كرمانجی مامۆستا رەفیق سەعید راهێنەری بەتوانای دەڤەری سۆران باس لە ئاستی یاریزانەكان و ئامادەكارییەكان دەكات .

سەرتا گووتی" رۆژانە لە یاریگەی سەروچاوە مەشق و راهێنانەكانمان ئەنجام دەدەین و تا راددەیەكی باش خۆمان ئامادە كردووەو هەندێ كێشەی بچووكمان هەن هیوادارم زوو چارەسەر بكرێن, لەم ماوەیەدا یاریگەی دێڵزیان تایبەت بە یانەی وەرزشی سۆران لەژێر نۆژەنكردنەوەدایە و تا ماوەی دیاریكراوی نۆژەنكردنەوەكە یارییەكانی ناو یاریگەی خۆمان دەگواسترێنەوە یاریگەیەكی ترو یەكێتی تۆپی پێی كوردستان پێی راگەیاندووین كە یاریگەی سەروچاوە شیاو نیە بۆ یاریكردنی خولی پلە نایاب, سەبارەت بە پێكهاتەكەمان بۆ ئەمساڵ هەندێك گۆڕانكارییمان لە ریزی یانەكەمان كردووە 3 یاریزانی وەرزی رابردوو ئەیاس و زیوەر و سەیف گواسترانەوە یانەكانی تر, لە شوێنی ئەوان سیاكۆ لە یانەی ئارارات و بارزان لە یانەی ئاكرێ لەگەڵ هاوگار لە یانەی هەڵۆ هاتنە ریزەكانمان, ئەمە جگە لە 5 یاریزانی لاوی یانەكەمان بۆ ئەمساڵ سەرمانخستن بۆ ریزی پێشەوە".

مامۆستا رەفیق تیشكی خستەسەر چەند بابەتێك و گووتی" هەرچەندە ئێمەش وەك چەند یانەیەكی دیكەی كوردستان ژێرخانێكی ئابووریمان نیە و گرفتی داراییمان هەیە, بە دڵنیاییەوە هیچ یانەیەكیش ناتوانێ لە ئاستی بەرز تا سەر بەردەوام بێت ئەگەر خاوەنی داهاتی تایبەت بە خۆی نەبێت و نەبێتە دەزگایەكی سیستەماتیك, بەڵام لەگەڵ ئەوەشدا دەزگا ئیدارییەكانی سۆران بەپێی تواناو ئەو دەسەڵاتەی هەیانە یاریمەتیمان دەدەن و درێغیان نەكردووە, بەشَیك لە یاریزانەكانمان دەوام و ئەركیان هەیە پێویستیان بە مۆڵەت بووە لە كاتی مەشق و یارییەكان بە سوپاسەوە گرفتیان بۆ درووست نەكردووین".

لە كۆتاییدا راهێنەری یانەی سۆران گووتی" لەگەڵ ئەوەی كە خاڵی سەركەوتنی یانەكەمان دەگەڕێتەوە بۆ ئەو هەماهەنگییەی نێوان من و راهێنەرانی هاوكارم و دەستەی كارگێری و یاریزانەكان, متمانەی تەواویشم بە تیپەكەم هەیە و گومانم نیە كە دەتوانین ئاستێكی وا پێشكەش بكەین دڵی هاندەران و وەرزشدۆستان خۆش بكەین چونكە یاریزانی باش و بە توانامان هەن, هەرچەندە جیاوازی ئاستی خولەكە ئاشكرایە كە پلە نایابە و دەبێ زیاتر خۆمان ماندوو بكەین بۆیە لەگەڵ یاریزانەكان رێككەوتووین هەوڵی ئەوە بدەین لە ناوەڕاستی ریزبەند ببن و ببینە تیپێكی زەحمەت لەم خولەدا, هەروەها سەرۆك و دەستەی كارگێڕی یانەكە هەموو كارێك دەكەن بۆ ئەوەی یانەكەمان ببێتە یانەیەكی دیاری كوردستان".

ماوەتەوە بڵێین كاتژمێر 3 پاش نیوەڕۆی 27 ی ئەم مانگە واتا رۆژی یەكشەممەی داهاتوو یانەی وەرزشی سۆران لە نێو یاریگەی خۆی میوانداری یانەی وەرزشی نەورۆز دەكات و گەڕی دووەم دەبێتە میوانی یانەی دهۆك .

زۆرترین بینراو