زاری كرمانجی هۆكاری نەبوونی خانەی بەساڵاچووان لەسۆران ئاشكرا دەكات

زاری كرمانجی هۆكاری نەبوونی خانەی بەساڵاچووان لەسۆران ئاشكرا دەكات

 

محەمەدباڵەك-سۆران: شاری سۆران كە سنوری قەزاكانی  چۆمان و خەلیفان و مێرگەسۆریشی لەسەرە، هیچ خانەیەك بەساڵاچوانی لێ نییە، زاری كرمانجی  لە راپۆرتێكدا هۆكارەكەی ئاشكرا دەكات .

خانەی بەساڵاچوان، شوێنی حەوانەی ئەو پیاو و ئافرەتە بەساڵاچوانەی كە لە لایەن كەس و كارەكەی بەخێوناكرێن  و حكومەت ئەركی بەخێوكردنی لە ئەستۆ گرتووە و سەرجەم پێداویستیەكانی بۆیان دابین كراوە، شوێنەكە ماڵێك پڕ لە گریان و ئاه و هەنسكی رۆژانی گەنجی، ماڵێك پر لەیادەوەری جارانی گەنجی، خانەیەك تەژی لەو سەربازە ونانەی ڕۆژگارێك جەنگان لەگەڵ ژیان بۆ پێگەیاندنی ڕۆڵەكانیان ئێستا لە شار و شارۆچكەكانی كوردستان و لە نێو خانەی بەساڵاچواندا ژیان دەگوزەرێنن.

ئاراس ئەسعەد كورگەنجێكی تەمەن 35 ساڵەی دانیشتوی شاری سۆرانە بۆزاری كرمانجی گووتی " زۆرجار لە سۆشیاڵ میدیا یاخود لە تیڤیەكان ئەبینم، كە سێك دایكی یان باوكی هەڵداوەتە خانەی پیران و خۆشی بێ خەم لەماڵەوە پاڵی لێداوەتەوە، لەخۆمەوە قەڵسم و نیگەران ئەبم، چۆن دەكرێ باوكێك تەمەنێك لەپێناوی پێگەیاندنی ڕۆڵەكانی دابنێ، دایكێك ئازار و ان و ماندوێتی پشتی لار بكات، ئەمە چ ویژدانێكە بتوانی ئەو كەسە لەماڵەوە دەربكەیت و لە خانەی بە ساڵاچواندا دای بنێیین .

بە گووتەی ئاراس، دەبێ بیرێكیش لە داهاتووی خۆی بكاتەوە، كەهەمان شت دێتەوە ڕێگای، ئاخر كێ لە دایك و باوك خۆشەویست ترە چۆن دڵیان دێت ئازیزانی خۆیان دەربكەن، هەموو شتێك ئەگەری دووبارەبوونەوەی هەیە، ماڵ، منداڵ، هاوسەرو ، سەروەت وسامان، بەڵام ئەوەی دووبارە نابێتەوە، دایك و باوكن، تا لەدەستیشیان نەدەن ئازارەكەی نازانن.

ئەو كە دایك و باوكی لە ژیان نەماوە دەڵێت " نەبوونی دایك یا باب ژیان دەكاتە دۆزەخ، هیوادارم لە هەموو گەنجان خوشكانی خۆم رێزی دایك و باوكیان بگرن، نەیانخەنە شوێنی ئاوا، لەكۆتای شانازیە بۆ ئەم شارە كە تاكو، ئێستا شوێنێكی وای لێنیە، ئەمە نیشانەی ئەوەی خەڵكی سۆران خاوەن دڵێكی میهرەبانن".

عیسا عەبدولخالق هاووڵاتیێكی تری شاری سۆرانەو تەمەنی 50 ساڵە ئەو بەم شێوەیە بۆزاری كرمانجی گووتی" ئەم شارە هەرگیز پێویستی بە شوێنێكی وانییە، چونكە باب و باپیرانی ئێمە جوانە، تا ئێستا كەس بوێری ئەوەی نەكردوە، باوك یان دایكی خۆی بباتە دەرەوەی ماڵەوە، لەكۆندا باوكانی ئێمە، باوكی خۆیان دایكی خۆیان خزمەتكردوون تاكو مردون، ئەمەش هەمان چاكەو پاداشتە ئەوان وەری ئەگرنەوە، ئەوان لە پێش چاوی ئێمە خزمەتی ئەوانیان كردووە، ئێمەش لە پێش چاوی مناڵەكانمان خزمەتیان دەكەین، بۆ ئەوەی بەیانی ئێمەش كە چوینە تەمەن، مناڵەكانمان خزمەتمان بكەن، زیاتر گووتی" یانزە ساڵە دایكم كۆچی دوایی كردووە، ماوەی یانزە ساڵە باوكمم هێناوەتەوە لای خۆم، ئەو یانزە ساڵەی ڕۆشتوە، لەچاوم زاتر ئاگاداری بوومە، نەم هێشتوە لەهیچ شتێكی كەم بێت، هەرگیز ڕۆژێك دڵیم نیگەران نەكردووە، من باوكم ئەزانم باوكایەتی چەند گرانە، ئەمیش ئەم گرانیەی زیاتر بینیوە، چونكە ئەوسا وەك ئێستا نەبوو، ئەو بەڕەنجی شانی منی كردە ئەم پیاوەی هەم، ئێستاش ئەركی سەر شانمە خزمەتی بكەم، داواكاریشم هەموو خەڵكی خزمەتی دایك و باوكیان بكەن".

بێخاڵ گوانی ئافرەتێكی  دانیشتوی شاری سۆرانە و پیشەی مامۆستایە بە زاری كرمانجی گووت " هۆكاری نەبوونی خانەی بەساڵاچوان لەسۆران بە بڕوای من دەگەڕێتەوە بۆ ئەم كۆمەڵایەتی بوونەی خەڵكی ناوچەكە و پەیوەست بوونیان بەداب ونەریتی باب وباپیران و هەبوونی پەیوەندیەكی توندو تۆڵی خێزانی، هەروەها بوونی رێزوخۆشەویستی بەشێكی زۆری مرۆڤەكان بۆدایك وباوكیان ولەگەڵ پابەندبوونی ئەم كۆمەڵگایەبەئاینی پیرۆزی ئیسلام و بەگەورەی سەیركردنی دایك وباوك ورێز گرتنیان وخزمەت كردنیان چونكە ئەم ئاینی پیرۆز فێرمان دەكات كەنابێت تەنانەت وشەی ئۆفیش بەرامبەریان بەكاربێنین چجای خزمەتیان نەكەین یان بایخەینە خانەی بەساڵاچوان .

بە گووتەی ئەو ئافرەتە، نكۆڵی ناكرێ لەوەی كەلەوانەیە چەندحاڵەتێكی لەوجۆرانە هەبێ كە كەسانێك ئامادەنەبن خزمەتی دایك و باوكیان بكەن و بەرەوئەم خانەیەیان ببەن خاڵێكی تریش بۆئەم حاڵەتە لەوانەیە بوكەكان یان خودی كوڕەكان هۆكار و هاوكاربن هەم بۆخزمەت كردنی دایكان و باوكان هەم بۆخزمەت نەكردنیان .پێم وایەجێگای شانازیە بۆهەموو پیاو ئافرەتێك كەخزمەتی دایك وباوكی خۆی بكات وحەز و ئارەزووەكانیان جێ بەجێ بكات وهەست وسۆزیان هەڵبگڕێ. ئامادەبێت قوربانیان لەپێناوبدات چونكە ئەوان ئێمەیان گەیاندووەبەم رۆژە".

مامۆستا بێخاڵ زیاتر دەڵێت" لەوانەشە هۆكارێكی تریش ئەوەبێت كە هیچ دەرفەت وهەلێكی وانە رەخساوە بۆحوكمەت و خەڵكی ئەم ناوچەیەش تاپڕۆژەی لەم جۆرەیان هەبێت و بیكەن بۆ زیاتر خزمەت كردنی خەلكی ئەم ناوچەیە، ئاواتە خوازیشم هیچ پیاو ئافرەتێك ئامادەیی ئەوەنەبێت دایك وباوكی خۆی بنێرێت بۆئەم شوێنانە چونكە بەراستی ناخ هەژێنە مرۆڤ ئامادەبێت ئەوكەسەی هەمووخۆشی وناخۆشەیەكی ژیانی خۆی بەڕۆڵەكەی دەبەخشێت شەونخونی هەزاران ئێش وئازار و نەهامەتی تامناڵەكانی پێ دەگەینێت وخۆشترین ژیانیان بۆفەراهەم دەكات، ئامادەیە هەرچی هەیەتی لەژیان بیبەخشێت لەپێناوی دڵ خۆشی و بەختەوەری مناڵەكانی كەچی كاتێك ئەم دووگەوهەر و ئەم دوو مرۆڤە بەهادار و بەخششەی یەزدان دەچنە تەمەنی بەساڵاچوون مناڵەكانیان ئامادەی ئەوەیان تیادانەبێت خزمەتێكی بچووكیان بكەن و ئارامگە و لانگەیەكی حەوانەوە و حەسانەوەیان پێ ببەخشن چونكە بەراستی ئەوان گەورەترین نیعمەتی یەزدانن تالەدەستیان نەدەین نرخ وبەهایان نازانین ئەوكاتیش هیچ شتێك سودی نیە بەهیوای هەموومان گەورەترین رێزخۆشەویستیان پێ ببەخشین وخزمەتیان بكەین .

لەلای خۆشیەوە، توران خدر بەڕێوەبەری چاودێری و گەشەپێدانی كۆمەڵایەتی سۆران بە زاری كرمانجی راگەیاند" لە هەموو كۆمەڵگایەك و لە شار و شارۆچكەكان پێویستە خانەی بە ساڵاچووان بوونی هەبێ، چونكە خانەكە تەنها پەیوەندی دار نییە بە كەسانی  بە تەمەن لە خانەكان زۆر كەس هەیە تەمەنیشییان زۆر نییە بەڵام بەهۆی كێشەی خێزانی و گرفتەكانی تر ناچارە روو لەو خانەیە بكات و لەوێ ژیان بەسەر ببات .

زیاتر گووتی " لە سنووری هەر چوار قەزای دەڤەری سۆران تا ئێستا خانەیەكی بەساڵاچووانی لێ نییە، ئێمە وەكو بەڕێوەبەرایەتی چاودێری و گەشەپێدانی كۆمەڵایەتی سۆران داوای كردنەوەی خانەی بە ساڵاچووانمان بەرز كردۆتەوە  و هەموو هەوڵێك دەدەین خانەی بەساڵاچووان لە سۆران بكەینەوە، چونكە پێویستە و گرنگە هەبێت .

گووتیشی " لە نزیكەوە ئاگادارین كەسانی بەتەمەن و بە ساڵاچوو لە دەڤەری سۆران بە باشی خزمەت دەكرێن و باوك و دایك و كەس و كارەكانی نەبردۆتە خانەی بەساڵاچووان و ئەو داواكاریەشییان نەبووە كە كەسە بەتەمەنەكانییان لە شوێنی وا دابنێن بەڕاستی ئەمە جێگەی دڵخۆشییە .

زۆرترین بینراو