زاری كرمانجی وادەی كردنەوەی بەشی ساڵنامە و تۆماركردنی ئۆتۆمبێل لەسۆران ئاشكرا دەكات

زاری كرمانجی وادەی كردنەوەی بەشی ساڵنامە و تۆماركردنی ئۆتۆمبێل لەسۆران ئاشكرا دەكات

ئەگەرچی لەساڵی رابردووەوە بڕیارو رەزامەندی كردنەوەی بەشی ساڵنامەو تۆماركردنی ئۆتۆمبێل بۆ شاری سۆران دەراوە، كەچی تائێستا نەكراوەتەوە، لایەنە پەیوەندیدارەكانی دەڤەرەكەش هۆكارەكەی بۆ چەند گرفتێك دەگەڕێنەوە.
راید دلاوەر لەتیف، بەرپرسی راگەیاندنی بەڕێوەبەرایەتی هاتووچۆی سۆران بە زاری كرمانجی گووت " راستە لەساڵی رابردوو بڕیارو رەزامەندی كردنەوەی بەشی ساڵنامەو تۆماركردنی ئۆتۆمبێل بۆ شاری سۆران درەچووە، كەچی تائێستا بەهۆی چەند هۆكارێك نەكراوەتەوەو نەكەوتۆتە خزمەت هاووڵاتییان و شۆفێران، بەتایبەتیش گرفتەكە زیاتر بۆ نەبوونی بینایەی سەربەخۆ بووە، بەڵام هەوڵەكان بەردەوامەو چاوەڕوانین لە ئایندەدا بكرێتەوە، بە كردنەوەی ئەم بەشەش ئاسانكاری زۆر بۆ هاووڵاتییان و شۆفێران درووست دەبێت و قەڕەباڵغیش لەم بەشەی هاتووچۆی شاری هەولێر كەمدەبێتەوە".
ئەوەشی خستەروو" ماوەی چەند ساڵێكە رەزامەندی دروستكردنی بینایەكی گەورەو فراوان بۆ بەڕێوەبەرایەتی هاتووچۆی سۆران دەرچووەو چەند ساڵێكیشە دەست بەم پڕۆژەیە كراوە، بەڵام بەهۆی قەیرانی دارایی بۆ ماوەیەك كارەكانی بیناكە وەستا، بەڵام خۆشبەختانە ئێستا كارەكانی پڕۆژەی دروستكردنی بیناكە دەستی پێكراوەتەوەو پێشبینی دەكەین، لەم چەند مانگەی داهاتوو پڕۆژەكە بە كۆتا بێت، بەمەش هەم شوێنی بەڕێوەبەرایەتییەكەمان و هەم بەشی ساڵنامەو تۆماركردنی ئۆتۆمبێل لەناو بیناكە جێگیر دەكرێت و دەكەوێتە خزمەت هاووڵاتییان.
لەلای خۆیەوە كرمانج عیزەت، قائیمقامی سۆران بە زاری كرمانجی راگەیاند " دیارە هۆكاری دواكەوتنی بەشی ساڵنامەو تۆماركردنی ئۆتۆمبێل لەشاری سۆران، بۆ نەبوونی شوێنی گونجاو دەگەڕێتەوە، چونكە دەبێت شوێنەكە تایبەتمەندی خۆی هەبێت و بەرفراوان بێت، بۆ ئەم مەبەستە كارەكانی دروستكردنی بینایەی بەڕێوەبەرایەتی هاتووچۆی سۆران خێراكراون، تا ئەم بەشە لە شوێنەكە بكرێتەوەو بكەوێتە خزمەتی هاووڵاتییان و شۆفێران".
گووتیشی" ماوەی چەند مانگێك بە بەڵێندەری پڕۆژەكە دراوە، بۆ تەواو كردنی بینایەی بەڕێوەبەرایەتی هاتووچۆی سۆران و دوای تەواوكردنی و لەئایندەیەكی نزیك، بەشی تۆماركردن و ساڵنامەی ئۆتۆمبێل دەكرێتەوە.

زۆرترین بینراو