زانكۆی سۆران دوو بەشی نوێ دەكاتەوە

زانكۆی سۆران دوو بەشی نوێ دەكاتەوە

 

بەرەڤان شاكر سلێمان لاچ- سۆران:

بەپێی فەرمانێكی زانكۆیی كە  لە رۆژی 12-2-2019، دەرچووە و  هاوپێچی فەرمانێكی وەزاری، كەوا لە رۆژی 7-4-2019 دەرچووە و واژووی وەزیری خوێندنی باڵا و توێژینەوەی زانستی لەسەرە، پەیكەری فاكەڵتی یاسا و نێودەوڵەتییەكان داڕێژراوەتەوە و دوو بەشی نوێی زانستیش دەكرێنەوە.

دكتۆر هێمن میرانی، راگری فاكەڵتی یاسا و پەیوەندییە نێودەوڵەتییەكانی زانكۆی سۆران بە ماڵپەڕی زاری كرمانجی راگەیاند:" ناوی فاكەڵتییەكە دەگۆڕێت و دەكرێتە ( فاكەلتی یاسا و زانستە سیاسییەكان و بەڕێوەبردن).

میرانی گووتیشی: فاكەڵتییەكە دەكرێتە دوو سكوڵ، سكوڵی یاسا و پەیوەندییەكان و سكوڵی بەڕێوەبردن، لە سكوڵی بەڕێوەبردنیش دوو بەشی نوێ بە ناوەكانی( بەشی بەڕێوەبردنی كار و بەشی ژمێریاری) دەكرێنەوە.

گووتیشی: پێشتر بەشی پەیوەندییە نێودەوڵەتییەكان كە لەمەودوا دەبێتە بەشی سیاسەت و پەیوەندییە نێودەوڵەتییەكان، لە سەرەتاوە ئەم  بەشە بە زمانی ئینگلیزی دەستی پێكردووە، جگە لەوەی ئەم بەشە بەردەوام دەبێت لەسەر  خوێندن بە زمانی ئینگلیزی، ئەو دوو بەشە نوێیەی كەوا دەكرێنەوەش بە هەمان شێواز بە زمانی ئینگلزی لێی دەخوێندرێت .

میرانی راشیگەیاند: زمانی ئینگلیزی بۆتە پێداویستیكی گرنگ، بە تایبەت ئەوانەی دەیانەوێت لە بواری سیاسەت و دیبلوماسی و ژمێریاری و كاردا كاربكەن. بۆیە دەمانەوێت قوتابییەكانمان ئاستی زمانی ئینگلیزییان بەرز بێ، بۆ ئەوەی هەم لە ناو پڕۆسەی خوێندندا رووبەڕووی گرفتی زمان نەبنەوە، هەم لە  دوای زانكۆش  بتوانن لە بوارەكەی خۆیان كاریان دەست بكەوێت.

دكتۆر هێمن ئاماژەی بۆ ئەوەشكرد:" لە سەرەتای ساڵی نوێی خوێندنەوە قوتابییەكان لەو هەردووك بەشە نوێیەدا وەردەگیرێن، ئامادەكارییەكان بۆ جێبەجێكردنی سیستەنی پۆلۆنیا تەواو بوونە و هەر لەم ساڵەی خوێندنیشدا سیستەمی پۆلۆنیا لەسەر قوتابییەكان جێبەجێ دەكرێت.

زۆرترین بینراو