زیاتر لە 35 ساڵ لەسەر كورسییەكەی خزمەت بە كەمئەندامان دەكات

زیاتر لە 35 ساڵ لەسەر كورسییەكەی خزمەت بە كەمئەندامان دەكات

دیدار-محەمەد هەسنانی: خاوەن پێداویستییەكی تایبەت لەشاری سۆران، بەهۆی رووداوێك چەندین ساڵە قاچەكانی لە دەستداوە، كەچی بەهۆی باوەڕ بەخۆبوونی توانیوویەتی وەك كەسێكی ئاسایی خزمەت بە كەمئەندامان بكات و هەلی كار بۆ چەندین خاوەن پێداویستی تایبەت بڕەخسێنێت.
فەخرەدین حەسەن، لە دایكبووی ساڵی 1965 خەڵكی دەڤەری باڵەكایەتی دانیشتووی قەزای سۆران، ئەندامی دەستەی كۆمەڵەی سۆران بۆ چاودێری كەمئەندامان، رایگەیاند: "لە ساڵی 1985 بەهۆی رووداوێكی نەخوازراو قاچەكانم لەدەستدا، بەبێ‌ ئەوەی چارەسەریم هەبێت، بەڵام بیرو باوەڕی بەهێز و تواناكانم وای لێكردم، كە وەك كەمئەندامێك رووبەڕووی ژیان ببمەوە، ژیانی هاوسەرگیریم پێكهێناوە و خاوەن دوو منداڵم ، هەروەها خانوو ئۆتۆمبێلی تایبەت بەخۆشم هەیە، هاتووچۆی من بە ئۆتۆمبێل و كورسییە كەمئەندامیەتیەكەمە، سەرچاوەی داهاتیشم تەنها مووچەی كەمئەندامی و بڕە هاوكاریەكی دیاری كراوی كۆمەڵی سۆران بۆ چاودێری كەمئەندامانە".
دەشڵێت: "كۆمەڵی سۆران، لەساڵی 1999 بەسەرپەرشتی خودا لێخۆشبوو (عەبدلواحید گوانی) دامەزرا، لەو كاتەوە لە رێگەی كۆنگرەوە توانیم بە ئەندامی دەستەی ئەم كۆمەڵەیە هەڵبژێردرێم، لەساڵانی دواتریش بە هەمانشێوە لە كۆنگرەو هەڵبژاردنەكان سەركەوتنم بەدەستهێناوە، ئەوەش بۆمن شانازیە دیارە خزمەتێكم پێشكەش بە كەمئەندامان و خاوەن پێداویستییە تایبەتییەكان كردووە، كە بۆ چەندین جار سەركەوتن بەدەستبهێنم، لە ماوەی كاركردنیشمدا چەندین سەرۆك بەشی كۆمەڵەم وەرگرتووە، لە ئێستاشدا بەرپرسی بەشی دارایی كۆمەڵی سۆران بۆ چاودێری كەمئەندامانم".
فەخرەدین حەسەن، ئەوەش دەخاتەروو: "كە سەرەڕای كەمئەندامییەتی توانیوویەتی لە رێگەی ئەم كۆمەڵەوە خزمەتی بەرچاو بە كەمئەندامان و خاوەن پێداویستییە تایبەتییەكان بكات، بە رەخساندنی هەلی كار بۆ چەندین كەمئەندام و دەستەبەركردنی هاوكاری بۆیان، دیارە سەرچاوەی هاوكارییەكانی كۆمەڵەكەمان بۆ كەمئەندامان، لە رێگەی دام و دەزگا خێرخوازییەكان و سەرمایەداران و خودا پێداوانە، كە لە رێگەی كۆمەڵەكەمانەوە هاوكاریەكانییان دەگەیەننە كەمئەندامان".
فەخرەدین حەسەن پێشی وابوو: "هەركەسێك بیرو باوەڕی بەخۆی بێت با كەمئەندامیش بێت، بەڵام سەركەوتوو دەبێت بەسەر ئاستەنگ و ئەم گرفتانەی دێتە سەر رێگای، بۆیە من هەمیشە دەڵێم زۆر كەس هەیە ئەندامێكی جەستەی لە دەستداوە و ناكاملە، كەچی لە كەسانێك ژیرو بە تواناترە ئەگەرچی لە رووی جەستەییەوەش مرۆڤێكی بێ‌ كەم و كۆڕیە، واتە ئەوەی مرۆڤ بەهێز دەكات باوەڕ بەخۆبوون و ئیرادەی بەهێزیەتی، چەندین نموونەشمان هەیە كەمئەندام هەیە خودا بەهرەو توانایەكی وای پیداوە زەحمەتە لە كەسی ئاسایی بەدی بكرێت".
لەدوا قسەكانیدا دەڵێت " ئەگەرچی خاوەن بڕوانامەی قۆناغی شەشەمی ئامادەییم، بەڵام توانیوومە بەشداری لە چەندین خول و سمیناری جۆراو جۆر لە ناوخۆیی و عێراق بكەم، كە لەم رێگەیەوە چەندین بڕوانامەم بەدەست هێناوە، هەروەها زۆر خولیاو ئاواتیشم هەیە كە بەدەستیان بهێنم، تا زیاتر خزمەت بە كۆمەڵگەو كەمئەندامان بكەم ئەم كارە بە شانازی دەزانم".

 

زۆرترین بینراو