زیاتر لە 500 مزگەوت و 3 كەنیسە لە سنووری قەزاكانی سۆران هەن

زیاتر لە 500 مزگەوت و 3 كەنیسە لە سنووری قەزاكانی سۆران هەن

دیدار –ڕائیب شێروانی : د. پشتوان سرێشمەیی، بەرێوەبەری بەرێوەبەرایەتی ئەوقافی سۆران لە دیدارێكدا لەگەڵ هەفتەنامەی زاری كرمانجی دەڵێ، زیاتر لە ٥٠٠ مزگەوت و ٣ كەنیسە لە سنووری قەزاكانی سۆران هەن، لە 274 مزگەوت وتاری رۆژی هەینی دەخوێندرێتەوە، 183 وتاربێژی فەرمی و ٩١ خۆبەخش هەن. دەشڵێ، مامۆستای ئایینی هەڵگری پەیامێكە لەسەرووی هەموو حزبەكانەوەیە ئەویش پەیامی ئیسلامە، بۆیە دەبێت مامۆستایانی ئاینی مەلایەتی خۆیان بكەن نەك حیزبایەتی، چونكە تا مامۆستا بێلایەن بێت سەنگ و قورسایی زیاتر دەبێت، مینبەر موڵكی هیچ كەس و لایەنێك نیە، تەنها موڵكی ئیسلامە، ئیسلامیش چمان لێ داوا دەكات ئەوە دەبی بگۆترێت، بە ڕەچاو كردنی ئاسایشی نەتەوەیی و كۆمەڵایەتی و هۆشیار كردنەوەی خەڵك بە دانایی و بە حیكمەت بەبێ بریندار كردن و تەشهیر كردنی هیچ كەس و لایەنێك، لەگەڵ ئەوەی كاری هەرە گرنگمان گەڕانەوەی موڵكەكانی وەقف دەبێت، چونكە بەڕاستی موڵكێكی زۆر هەیە لە سنووری سۆران لە دەست خەڵكە بە كرێیەكی ساڵانە.
بەرێوەبەری بەرێوەبەرایەتی ئەوقافی سۆران رایگەیاند:" بەڕێوەبەرایەتی ئەوقافی سۆران سنوورێكی فراوانی هەیە، هەر چوار قەزای سۆران، ڕواندز، چۆمان و مێرگەسۆر بە هەموو ناحیەكانیانەوە لە خۆ دەگرێت، زیاتر لە ٥٠٠ مزگەوت و ٣ كەنیسە لە سنووری ئەو چوار قەزایە هەن، لە 274 مزگەوت وتاری رۆژی هەینی دەخوێندرێتەوە، 183 وتاربێژی فەرمی و ٩١ خۆبەخش هەن، لەو خۆبەخشانە زۆربەیان دەرچووی كۆلیژی شەریعەن، بەڵام دانەمەزراون یاخود دامەزراون، بەڵام لەسەر میلاكی ئەوقاف نین، بەشێكی تریان مامۆستایانی ئایینی خانەنشینن لە ئەوقاف، بەڵام تا ئێستاش وتاریان هەیە بە گرێبەست وتار دەخوێنەوە.
د. پشتوان سرێشمەیی، دەشڵێ:"كەم شوێن هەن لە كوردستان تەنانەت ئەو گوندانەی كە دووریشن بێ مزگەوتن، زۆربەی گوندەكان مزگەوتیان بۆ دروستكراوە چ لە ڕێی ئەوقاف یا لە ڕێی خێرخوازانەوە كە وەزارەتی ئەوقاف ڕێگەی پێداون، بەڵام لە چەند ساڵی ڕابردوو بەهۆی قەیرانی داراییەوە و هاتنی داعش و دابەزینی نرخی نەوت و كێشەكانی نێوان هەولێر و بەغداو هاتنی ئاوارەیەكی زۆر، زۆربەی پڕۆژە حكوومیەكان وەستێنران، چونكە پرۆژە بە پارە دەكرێت كە پارەش نەبێت بەچی پرۆژە بكرێت.
سەبارەت بەوەی تا ئێستا لە سنووری ئێوە هیچ مامۆستایەكی ئاینی سزادراوە، ئەگەر سزا دراوە لەبەر چی بووە؟ د. پشتوان سرێشمەیی، بەرێوەبەری بەرێوەبەرایەتی ئەوقافی سۆران دیاركرد:" لەو حەوت مانگەی رابردوو كە من دەستبەكاربوومە هیچ مامۆستایەكی ئایینی سزا نەدراوە.
دەربارەی ئەوەی زۆرجار دین و سیاسەت تێكەڵ بە یەكدی دەكرێت بەڕێوەبەرایەتی ئەوقافی سۆران د. پشتوان سرێشمەیی، ئاشكرای كرد:" ئەگەر بە شێوەیەكی ئەكادیمی بڕوانینە بابەتەكە سەرچاوەكانی شەریعەتی ئیسلام پێمان دەڵێن، كە سیاسەت بەشێكە لە دین، وە دین حاكمە بەسەریەوە، چونكە ئیسلام دینە، دەولەتە، عقیدە و شریعەتە، هەروەها مەنهەجێكی تەواوە لە هەموو رووێكەوە بۆ ژیان ئەگەر بە شێوازێكی راست و دروست وەك خۆی پەیڕەو بكرێت، بەڵام دەكرێت پرسیارەكەت بەو شیوازە بێت دڵنیاشم هەر ئەو مەبەستەت هەیە تێكەڵكردنی دین و حزبایەتی، بەڕاستی ئەمە جێگەی هەڵوەستە لەسەر كردنە، بە ڕای خۆم زۆر ناشرینە مامۆستای ئایینی حزبی بێت یان حزبایەتی بكات ئەگەر بە دروستی بە مانایی وشە مامۆستا بێت، جا هەر حزبێك بێت بە راست و چەپەوە، چونكە مامۆستای ئایینی هەڵگری پەیامێكە لەسەرووی هەموو حزبەكانەوەیە ئەویش پەیامی ئیسلامە، بۆیە پەیامی من بۆ تێكرای مامۆستایانی ئایینی ئەوەیە ئەگەر بیانەوێت سەركێشی خەڵكی موسلمان بكەن لە ڕووی ئایینی و كۆمەڵایەتیەوە و خاوەن پێگەیەكی بە هێز تر بن و قسەكانیان زیاتر گاریگەری هەبێت، دەبێت مەلایەتی خۆیان بكەن نەك حیزبایەتی.
بەرێوەبەری بەرێوەبەرایەتی ئەوقافی سۆران ئاماژەی بۆ ئەوەشكرد:" دەبێت مامۆستایانی ئایینی خاوەن كەسایەتیەكی بەهێز بێت و كەسایەتی خۆی لە هەموو ڕووێكەوە بپارێزی، لە ڕووی زانستییەوەش دەبێت خوێندنەوەی بەردەوامی هەبێت، بەردەوام پڕ چەك بێت لە هێنانەوەی بەڵگەكان، چونكە ئێمە ئومەتی بەڵگەین، وەكو لەسەرەوەش ئاماژەم پێكرد مامۆستا تا بێلایەن بێت سەنگ و قورسایی زیاتر دەبێت، مینبەر موڵكی هیچ كەس و لایەنێك نیە، تەنها موڵكی ئیسلامە، ئیسلامیش چمان لێ داوا دەكات ئەوە دەبی بگۆترێت، بە ڕەچاو كردنی ئاسایشی نەتەوەیی و كۆمەلایەتی و هۆشیار كردنەوەی خەڵك بە دانایی و بە حیكمەت بەبێ بریندار كردن و تەشهیر كردنی هیچ كەس و لایەنێك.
سەبارەت بە كێشە و داواكارییەكان، د. پشتوان سرێشمەیی، جەختی لەوەكردەوە:"زۆر لەو گەنجە خۆبەخشانە دەرچووی كۆلیژن چەندین ساڵە خزمەت دەكەن بەبێ بەرامبەر داوای دامەزراندن دەكەن یان گرێبەست كەچی هیچ ناكرێت، یان هەندێك مزگەوت پێویستیان بە نۆژەنكردنەوە هەیە، هەندێك شوێن پێویستیان بە دروستكرنی هۆلی بۆنەكان هەیە بۆ پیاوان و خانمان ئەوە بەلای منەوە كێشەن، بە كورتی داواكردنی هەر شتێك بەرژەوەندی گشتی تێدا بێت بۆ ئێمە گەورەترین كێشەیە ئەگەر نەتوانین جێبەجێیان بكەین یان نەتوانین خزمەتێكی بەرچاو بكەین، لەگەڵ ئەوەی كار بۆ ئەوە دەكەین كە فەرمانبەرەكان دەوامێكی ڕێك بكەن و مزگەوتەكان خاوێن ڕابگرن و چاودێری وردیان دەكەین، ئەوەی كەمتەرخەم بێت سزا دەدرێت و ئەوەی باشە پاداشت دەكرێت.
لە كۆتایدا د. پشتوان سرێشمەیی، بەرێوەبەری بەرێوەبەرایەتی ئەوقافی سۆران گوتی:" كاری هەرە گرنگمان گەڕانەوەی مولكەكانی وەقف دەبێت، چونكە بەڕاستی موڵكێكی زۆر هەیە لەم دەڤەرە لە دەست خەڵكە بە كرێیەكی ساڵانە، كاری جددی بۆ ئەم بابەتە دەكەین لە ئاییندەدا بەڵام كارێكی هەمەلایەنەیە، راستە كاری ئێمەیە بە پلە یەك، بەڵام بەتەنهاش ناكرێت، لەگەڵ ئەوەی ڕێگر دەبین لە بڵاوكردنەوەی بیری توندڕەوی جا هەر كەسێك و گرووپێك و لایەنێك بێت، چونكە بە واجبی خۆمانی دەزانین ئاسایشی خەڵك بپارێزین".

 

زۆرترین بینراو