زیاتر لە 8000 هەزار خوێن بەخشمان هەیە

زیاتر لە 8000 هەزار خوێن بەخشمان هەیە

دیدار-محەمەد هەسنانی
سەرۆكی رێكخراوی بەخشینی خوێن و ژیان، لە دیدارێكی زاری كرمانجیدا، تیشك دەخاتە سەر كێشەو گرفت و كارو چالاكییەكانی رێكخراوەكەیان و دەشڵێت " سەرەڕای كاركردنیان بە خۆبەخشی پشت بە ئەندامانمان دەبەستین بۆ بەڕێوەبردن و ئەنجامدانی كاروچالاكیەكانمان.
لەبەردەوامی قسەكانیدا، هونەر عەبدلواحید هەسنانی، سەرۆكی رێكخراوی بەخشینی خوێن و ژیان، بە زاری كرمانجی راگەیاند: "رێكخراوەكەمان لە ١٤ـی١ـی ٢٠١٥ بە فەرمی لە فەرمانگەی رێكخراوە ناحكومیەكان تۆمار كراوە، ئۆفیسی سەرەكیمان لە قەزای سۆرانە و لە زۆر بەی شارو شارۆچكەكان ستافی كارگێڕیمان هەیە بە شاری كەركووكیشەوە، كە لەو شارو شارۆچكانە زیاتر لە 17 لقمان كردونەتەوەو سەربە رێكخراوەكەمانن و هەریەكەو بە ستافێكی كاراو بوون ئەندامانیان لە سنوورەكەیان خزمەت پێشكەش بە هاووڵاتییان دەكەن و لەكاتی پێویستدا هاووڵاتییان بۆ نەخۆش و كەس و كاریان، پەویوەندی رێكخراوی سەرەكی و لقەكانمان دەكەن و جۆری خوێنەكەیان بۆ دابین دەكرێت".
لەبەشێكی دیكەی قسەكانیدا سەرۆكی رێكخراوی بەخشینی خوێن و ژیان، بە زاری كرمانجی گووت: " لە كۆی بارەگای سەرەكی و 17 لقی سنوورەكەمان زیاتر لە ٨٠٠٠ خوێن بەخش ناوی خۆیان تۆمار كردوەو لەوانە ١١٤٠ ئەندام هەڵگری ناسنامەی رێكخراون، كە١٢٠ یان وەك كارگێر سەرپەرشتی كاروچالاكیەكانی رێكخراو دەكەن، شێوازی وەرگرتنی ئەندامانیش بریتییە لەوە هەر كەسێك توانای خوێن بەخشینی هەبێت و ئارەزووی ئەندامێتی هەبێت، پەیوەندی بە رێكخراو و ستافی لقەكانی سنوورەكەی دەكات و وەك ئەندام ناوی تۆمار دەكرێت و جۆری خوێنەكەشی دەستنیشان دەكرێت، بۆ ئەوەی لە كاتی پێویستی پەیوەندی پێوە بكەین تا سەردانی فلان سەنتەرو نەخۆشخانەو بانكی خوێن بكات بۆ بەخشینی خوێن".
‎ هونەر عەبدلواحید هەسنانی، سەرۆكی رێكخراوی بەخشینی خوێن و ژیان، دەشڵێت: "ژمارەی گشتی و لقەكانی رێكخراوەكەمان لە سەرجەم نەخۆشخانە و بانكەكانی خوێن هەیە، لە كاتی پێویست كەس و كاری نەخۆش پەیوەندیمان پێوە دەكات و ئێمەش لە ڕێگای خوێن بەخشە دڵسۆزو خۆبەخشەكانمان خوێنی پێویستی بۆ دابین دەكەین، هەروەها لەكاتی پەیوەندی كردن بەو ئەندامەی كە داوای خوێن بەخشینی لێدەكەین، لە پێناو تەندروستی ئەو پرسیاری ئەوەی لێدەكەین، ئایا ماوەی چەندە خوێنت بەخشیووە چونكە پێویستە چەند مانگێك تێپەڕبێت ئەو كات جارێكی دیكە خوێن ببەخشێتەوە".
سەرۆكی رێكخراوی بەخشینی خوێن و ژیان، ئەوەشی ئاشكرا كرد: "هەوڵمانداوە لەماوەی چەند ساڵەی دامەزراندنی رێكخراوەكەمان ئاماری بەخشێنی خوێن لەلای خۆمان تۆمار بكەین، بەمەش تا ئێستا بە گشتی زیاتر لە 24 هەزار بوتڵ خوێنمان بەخشیووە، بەمەش ئەنداممان هەیە چەندین بوتڵ خوێنی بەخۆبەخشانە بەخشیووە، لە هەمانكاتیشدا خەڵكی دیكەش هاتووە لە رێگەی لقەكانمان و رێكخراوەكەمان خوێنیان بەخشیووەو هاوكاربوونە".
‎ هونەر عەبدلواحید، راشیدەگەینێنت: " جگەلەوەی لە رێگەی ئەو كەسانەی كە نەخۆشیان هەیە خوێنیان پێدەبەخشین لە هەمانكاتیشدا، لە هەر شوێنێك بانكەكانی خوێن یان نەخۆشخانەو سەنتەرێكی تەندروستی پێویستیان بە خوێن بێت و پەیوەندیمان پێوە بكەن و بە كەمترین كات هەڵمەتی خوێن بەخشین ئەنجام دەدەین و ئەنجامیشمان داوەو توانیومانە بە دەیان بوتڵ خوێن لەم جۆرە هەڵمەتانە ببەخشین، پزیشك و كارمەندانی تەندروستیش هاوكارمان دەبن، بۆ وەرگرتنی خوێن و گرتنەبەری رێكارە تەندروستییەكان لەو جۆرە هەڵمەتانەی خوێن بەخشین".
سەرۆكی رێكخراوی بەخشینی خوێن و ژیان، ئاماژەشی بەوەدا: "جگەلە بەخشینی خوێن لە لایەن ئەندامانی رێكخراوەكەمان، بەتایبەتی ئەمساڵ بۆ چارەسەری تووشبووانی كۆرۆنا پلازمای خوێن بەكارهێنرا، بۆ پەیداكردنیشی كەمیك ئاستەم بوو، بەڵام خۆشبەختانە تا ئێستا هەر نەخۆشێك پێویستی پێ بووبێت و پەیوەندی پێوە كردبین پلازمای پێویستمان بۆ دابین كردوەو بەردەوامیش دەبین لەسەر ئەم جۆرە كارە مرۆڤانەیە".
هونەر عەبدلواحید هەسنانی، ئەوەش دەخاتەروو: "ماوەیەك بوو كێشەی سەرەكیمان نەبوونی شوێنێك بوو بۆ ئەوەی بتوانین كاروباری لقەكەمان تێدا بەڕێوەبەرین و زیاتر خزمەت پێشكەش بكەین، خۆشبەختانە دوای هەوڵی بەردەوام، بە سوپاسەوە لە لایەن د. كاروان جمال بەڕێوەبەری تەندروستی سۆران، شوێنێكی شایستە دابین كرا بۆ ئۆفیسی سەرەكی رێكخراوەكەمان".
لەدوا قسەكانیدا سەرۆكی رێكخراوی بەخشینی خوێن و ژیان، رایگەیاند: " كێشەو گرفتە سەرەكیەكانمان زیاتر، نەبوونی پاڵپشتی ماددیە ئەوەش وای كردوە سەرەڕای كاركردنیان بە خۆبەخشی پشت بە ئەندامانمان ببەستین بۆ بەڕێوەبردن و ئەنجامدانی كاروچالاكیەكانمان، بە هەرگیز لە پێناو كاری مرۆڤانە كۆڵنادەین و خزمەتی بەردەوام پێشكەش دەكەین.

 

بیروڕا

زۆرترین بینراو