ساكار: وێنەكێشان بۆ من دوور كەوتنەوەیە لە بێنازی دایك

ساكار: وێنەكێشان بۆ من دوور كەوتنەوەیە لە بێنازی دایك

دیمانە: هۆژین شەوكەت دری-هەولێر
خەونی منداڵی ساكار وێنەكێشان بوو، ئێستاش بۆ دووركەوتنەوە لە بێنازی و نەبوونی دایكی وێنە دەكێشێت، هونەرمەندی بواری وێنەكێشان ساكار یونس تەمەن ٢١ ساڵ دانیشتووی شاری هەولێرە، پەیمانگەی كومپیوتەر بەشی ئایتی تەواو كردووە، ماوەی ٦ ساڵە هۆگری وێنەكێشان بووە و ٣ ساڵە بەشێوەی ئۆنڵاین خەڵك وێنەی خۆی دەنێرێت و ئەو دووبارە دەیكێشێتەوە.
ساكار بە زاری كرمانجی گووت" وێنەكانم تەنها شێوازی رەش و سپین و كار لەسەر ئەم شێوازە دەكەم، خەڵك زیاتر داواكاری لەسەر ئەم جۆرە وێنە كێشانە هەیە نەك رەنگاو رەنگ، وێنەكێشان حەز و ئارەزووی منداڵیم بوو، كە گەورە بووم بوو بە خەونم، یارمەتیدانی مامۆستاكەم بووە هۆكاری بەدیهێنانی خەونەكەم و گەورەترین پاڵپشتی هونەریم ئەو بوو خەونەكەی بەدیهێنام، ئێستا وێنەكێشان بووە بە پێشەی من لە چەندین وڵاتی جیاواز داواكاریم بۆ دێت وەك بریتانیا و ئەمریكا لە كوردستانیش لە زۆربەی شارەكانەوە داواكاریم بۆ هاتووە بە تایبەت هەولێرو سلێمانی بەڵام لە ئێستادا تەنها بۆ هەولێر گەیاندنم هەیە ئەوانی تر كەسەكان خۆیان دێن وەریدەگرنەوە یا لە رێگەی خزمێكیان كە لە هەولێرە دەگاتەوە دەستیان".
ساكار كە لە تۆری كۆمەڵایەتی بە sakar_artist ناسراوە گووتیشی" تۆری كۆمەڵایەتی یەكەم رێگای منە دەتوانم كارەكانم تێدا بە خەڵك بناسێنم، داواكاریەكان لە رێگای ئەكاونتی سناپ و ئینستگرامەكەم وەردەگرم، نرخی وێنەكانم بە پێی قەبارەكەی نیە بەڵكو لەسەر دیقە و زۆری كەسەكان دەگۆردرێت، هەفتەی چوار وێنە دەكێشم، هەر وێنەیەك ١٧ كاتژمێر كاری لەسەر دەكەم جگە لەوانەی زۆر تایبەت داواكاریم بۆ دێت بە شێوازی VIP ٣٢ كاتژمێربە وردی كاری لەسەر دەكەم، توانیومە لە ریگەی تۆری كۆمەڵایەتیەوە قازانجێكی باش بكەم جگە لەم كارە هیچ كارێكی ترم نیە تەنها وێنەكێشم".
گووتیشی" وێنەكێشان بۆ من دوور كەوتنەوەیە لە خەمی ژیان و بێنازی دایك، گەورەترین زەحمەتی لەبەردەم كارەكەمدا قسەی خەڵكە، زۆرجار پێم دەڵێن وێنەكێشان گوناهە و نابێت ئەم كارە بكەیت، من بە خەونەكەم گەشتم ئامانجم ئەوەیە رۆژێك لە رۆژان بگەم بە لووتكەی وێنەكێشان و خولی تایبەت بكەمەوە، خەونی منداڵیم بەدیهات ئێستا هەوڵ بۆ باشتر دەدەم، دەمەوێت ببم بە باشترین كچە وێنەكێشی كورد"

 

زۆرترین بینراو