سدیق عەزیز: ئەو كاتەی بوومە پێشمەرگە خۆم بۆ شەهید بوون و لە سێدارەدان ئامادەكردبوو

سدیق عەزیز: ئەو كاتەی بوومە پێشمەرگە خۆم بۆ شەهید بوون و لە سێدارەدان ئامادەكردبوو

بەرەڤان شاكر سلێمان لاچ- پیرمام: دەبێت هەردەم گەلی كوردستان رێز لەو ئازادییە بگرێت كەوا ئێستا هەموو ئایین و ئانزا و رەنگە جیاوازەكان تێیدا پێكەوە دەژین، دەبێت هەموو لایەك ئەوە بزانن ئەو ئازادییەی ئێستای كوردستان بێ قۆربانی نەبووە، هەردەم دەبێت رێز لە خەبات و قۆربانیدانی ئەوانە بگیرێت كەوا خۆیان تەرخانكردبوو بۆ كوردستان.
لەم ژمارەی هەفتەنامەی زار كرمانجیدا مەبەستمانە تیشك بخەینە سەر چەند ووێستگەیەكی ژیان و خەباتی پێشمەرگەی شۆڕشی ئەیلول و گۆڵان ( سدیق عەزیز مەمویدی)، سدیق عەزیز لە ساڵی 1940 لە گوندی مەمویدان لە دایك بووە.
سدیق مزوری هەر لە منداڵیەوە ئاشنای كار و خەباتی نیشتیمان پەروەری بووە، ئەمەش بەهۆی نزیكی برا و ئامۆزاكانی لە شێخ ئەحمەد بارزانی و بارزانی نەمر.
دوای دەستپێكردنی شۆڕشی ئەیلول لە ساڵی 1961 سدیق عەزیز پەیوەندی بە شۆڕشەوە دەكات و چەكی شەڕەف لەشان دەكات، دوای ماوەیەك لە پێشمەرگایەتی شەڕەفی ئەوەی پێ دەبەخشرێت تا بەشداری لە داستانەكانی(لومانا، گەلیێ سپی، زاویتە, چەند داستانێكی تردا) بكات.
سدیق عەزیز یەكێك بووە لە باوەرپێكراوانی بارزانی نەمر و هەردەم بە كەسێكی راستگۆ ناسراوو بووە. سدیق عەزیز لە ژیانی پێشمەرگایەتی خۆیدا دوو جار بریندار دەبێت، بەڵام نە سەختی برینەكانی و نە ئازاری برینەكانی ناتوانێن بەسەر هەستی نەتەوایەتی و نیشتیمان پەروەری ئەودا زاڵ بێت.
سدیق عەزیز زیاتر لە 10 جار زیندانی كراو، بەڵام ئەوەی جێی شانازی ئەبووە لەو هەموو گرتن و ئازاردانەدا ناوی هیچ پێشمەرگە و زانیاریەكی نەدركاندووە، بوویە كاتێك لە ساڵی 1987 لە گەلی عەلی بەگدا دەكەوێتە ناو مەفرەزەیەكی سەربازی عێراقیدا، كاتێك لێپێچینەوەی لەگەڵ دەكەن ئەفسەرێكی عێراقی چەند ووشەی ناشرین بەرامبەر كورد و كوردستان و بارزانی نەمر دەڵێت، بوویە سدیق خۆی پێناگیرێت و وەڵامێكی تۆندی ئەو ئەفسەرە دەداتەوە، بوویەش بە تومەتی بێ رێزیكردن بەرامبەر ئەفسەرێكی عێراقی, سزای لە سێدارەدانی بۆ دەردەچێت، كاتێكیش بڕیاری لە سێدارەدانی بۆ دەخوێنەوە دەڵێت" ئەو كاتەی بووم بە پێشمەرگە خۆم بۆ شەهید بوون و لە سێدارەدان و هەموو ئازارێك ئامادەكردبوو، بوویە باكم بە لە سێدارەدان نیە"،
ئەم قەسانەی سدیق ترسێك دەخاتە ناو دڵی سەرباز و ئەفسەرە عێراقیەكانەوە و پێی دەڵێن دواین وەسیەتت چیە؟
لە وەڵامدا دەڵێت"من حەوت كۆڕم هەیە، هەر حەوت كۆڕەكانم بكەن بە قۆربانی بۆ كوردستان و سەرۆك بارزانی".
بەڵام دواتر وەبەر لێخۆشبوونێكی گشتی دەكەوێت و دوای ماوەیەك زیندانی ئازاد دەكرێت، بەڵام دواتر لە كاتی ئازادكردنیدا پێی رادەگەینن كەوا هەموو سەرباز و ئەفسەرەكان سەرسورمان ببوون كاتێك دوا وەسیەتی قۆربانیكردنی منداڵەكانی بووە لە پێناو كوردستان و سەرۆكەكەی.
دوای چەندین ساڵ چاوەروانی مژدەی دەستپێكردنی راپەڕین دەدرێتە سدیق عەزیز و نامەیەكی خۆ ئامادەكردنی بە دەست دەگات، بوویە ئەویش بە وورەیەكی زۆر و بە هەستێكی نیشتیمان پەروەرانەوە دەست دەكاتە خۆ ئامادەكردن بۆ رزگاركردنی كوردستان، بوویە بەشداریەكی كارای لە راپەڕینەكەی شەقڵاوە و پیرمام و هەولێر هەبووە، هەردەم وەك لاوێكی خوێن گەرم ئامادەبووە بۆ بەرگریكردن لە كوردستان.
شایەنی ئاماژە پێكردنە پێنج برای سدیق عەزیز، شەهیدی سەنگەری پارێزگاری كردنن لە كوردستان، ئەوانیش ( ئەحمەد عەزیز ساڵی ١٩٦٩، مح عەزیز لە رێگای چونی بۆ یەكێتی سۆڤیەت شەهید بووە، جادر عزیز ئەنفالكراوە، محەمەد عەزیز ئەنفالكراوە، شەوقی عەزیز لە ساڵی ١٩٣٢، لەكاتی ئاوەربوونیان بۆ توركیا شەهید بووە).
بەڵام بەهۆی ئەو ئازار و ئەشكنجەی بینیویەتی توشی نەخۆشی دڵ دەبێت، و لە بەرواری 2013-11-16 بە هۆی نەخۆشی دڵەوە, دڵە گەورەكەی لە لێدان دەوەستێت، بەڵام سدیق عەزیز دوای وەفاتیشی، ناوی خۆی بە سەربەرزی و سەرفرازی هێشتوتەوە.
لە هەمبەر ئەو خەبات و ماندوبوونەی كێشاویەتی شەڕەفی شەهیدی سەنگەری لە لایان سەرۆك بارزانیەوە پێ بەخشراوە.
لە كۆتایدا بنەماڵەی سدیق عەزیز دەڵێن" شانازیەكی چەندە گەورەیە مرۆڤ تەواوی تەمەنی خۆی لە پێناو گەل و نیشتیمانەكەی ببەخشێت. باوكمان ژیانێكی زۆر سەربەرزانەی بەرێكرد، ئامادەبوو لە پێناو كوردستان هەر قۆربانیەك بدات، بوویە لێرەوە بەڵێن بە باوكمان و بە تەواوی شەهیدان كوردستان دەدەین، تا دڵوپی خوێن خەبات لە پێناو كوردستان بكەین، ئامادە دەبین بۆ هەر قۆربانیدان و خۆفیداكاریەك".

زۆرترین بینراو