سنوور دانان بۆ كاری ژنان لە ناو كۆمەڵگەی چەق بەستوودا

سنوور دانان بۆ كاری ژنان لە ناو كۆمەڵگەی چەق بەستوودا

كۆمەڵگەی كوردی وەك هەر كۆمەڵگەیەكی تر هەر لە مێژەوە ژن ڕۆڵی خۆی تیایدا بینیووە، تا ڕادەیەكی باش ڕێگە پێدراو بووە بۆ ئەوەی كار بكات بە مەرجێك سنورە باوەكان نەبەزێنێت، لەمێژووی هەنوكەی كوردیشدا وەرچەرخانێكی ڕیشەیی لەهەڵەی سەپێنراوی كەلتووری بەسەر ژناندا تێشكاند، ڕۆڵی كاریگەری كرداری دەبینێت لەبەرگری لەنیشتمان و بەها مرۆڤایەتیەكان، بەڵگەش بوونی ڕۆڵی گەورەی كچە شەڕڤان و گەریلاكانە لەڕوبەڕوو بوونەوەی بیری تاریكی داعش، هەركاتێك باس لەژن و ڕۆڵی ژن كرابێت، ناكرێت كاریگەریەكانی كەلتووری پیاو سالاری پەراوێز بخرێت چونكە ئەوەی ژنی بەم بارودۆخە ئاڵۆزە گەیاندووە بابەتە بایەڵۆژیەكە نیە، هێندە پەیوەندیدارە بەو دابونەریتە باوو زاڵانەی كەلە زهنیەتی پیاو سالاریەوە سەرچاوەی گرتوە، سنور دانان بۆ ژن پێش هەر شتێكی تر جل و بەرگێتی، لە ناو كۆمەڵگە دواكەوتوەكاندا هەمیشە جل و بەرگ پێوەر بووە بۆ ڕەوشتی ژن، كۆمەڵگەی ئێمەش بێ بەش نییە لەو تێڕوانینانە كە بۆ كچ و ژن كراون بە پێوەر، دیدگای زۆرینەی خەڵك بۆ ژن ئەوەیە كە تەنها لەگۆشەنیگایەكەوە وەك ئامرازی چێژ لێوەرگرتن تەماشا بكرێت، ئەمەش خۆی لەخویدا ڕێگرە لەپێشڤەچوونی عەقڵی ژن، تواناكانی لەبار دەبات و پەراوێزی دەخات، تێڕوانینی ژن بۆ بەرجەستەكردنی بەهای ڕاستی خۆی كاركردنییەتی، چونكە بەوە ئەتوانێت گەشە بكات و وەك مرۆڤێكی كامڵ بوونی خۆی بسەلمێنێت، بەڵگەش بۆ ئەم قسانەم نموونەی خانمە چا فرۆشەكەی شاری سلێمانییە، لەم ماوەی پێشودا لە ڕێگەی ڕاگەیاندنەكان وسۆشیال میدیاكانەوە، خانمە چا فرۆشەكە بووە گرفتی گەورەی كۆمەڵگەی باشور، وەك ئەوەی كۆمەڵگە خاڵی بێت لەهەموو كێشەو گرفتێك، لە كاتێكدا ژیان و دۆخی كۆمەڵگە خۆی پڕە لە كارەسات، لەو كۆمەڵگەدا خەڵكانێكی پەراوێزخراو و عەقڵ دۆگما و نا ڕۆشنبیر هەمیشە بەو شتە لاوەكییانەوە سەرقاڵ دەكرێن، بۆ ئەوەی گرفتە سەرەكیەكانی خۆیان لە بیر بچێتەوە، گرفتەكە لە ئیش كردنی ئەم خانمەدا نەبوو، بەڵكو دەرهاویشتەو ڕەنگدانەوەی عەقڵیەتێكە كە پێی وایە ناكرێت كچێكی ناسكۆڵە و بە جل و بەرگێكی ئاواوە و لە سەر شەقامێك كار بكات. چاوەكان بەپلەی یەكەم لەسەر جل و بەرگەكەی بوو نەك لەسەر ناوەڕۆكەكەی لێرەدا جل و بەرگ دەبێتە ئەولەویەت و پێناسەی ڕاستەقینە بۆ ڕەوشت، هەر لە سەر ئەم بابەتەش، لەناو تۆڕە كۆمەڵایەتێەكان پۆستێكی یەكجار زۆر لە سەر ئەم خانمە كرا، كەسە توند ڕەوەكان بە هەموو شێوەیەك و بە ئاشكرا دژایەتی ئەم خانمەیان دەكرد، پێیان وابوو جل و بەرگەكەی لە ڕووی ئاین و شەرعەوە ڕێگە پێدراوە نییە، كەسانێكی زۆرییش داكۆكییان لە مافی ئەو كچە دەكرد كە ئازادانە بۆی هەیە كاری خۆی بكات، ئەمە خۆی لە خۆیدا كارێكی باشە، بەڵام زۆربەی ئەو كەسانەی كە داكۆكییان دەكرد پیاوە ڕۆشنفكرەكان بوون، هەر ئەم ڕۆشنفكرانە لە ناو خودی خێزانی خۆیاندا نەك هەر ئەو مافەیان لە هاوسەر و ژن و خوشكی خۆیان زەوتكردوە، بەڵكو زۆر نەشیاوانەش مامەڵەیان لە گەڵ دەكەن، ئەو پیاوانەش ڕێژەیان زۆر كەمن كە مەوداو و سنورەكانی پیاوسالاریان تێپەڕاندبێ، ئاسایی بێت بە لایانەوە ڕوخساری هاوسەریان یان كچییان یان خوشكیان ڕۆژێك ببینرێت و دەركەون و شانازی بە ڕۆڵ و بوونییانەوە بكەن و بە گرنگییەوە لێیان بڕوانن، كە واتە لە هەردوو تێڕوانینەكەوە ئەم شێوازی جل و بەرگە لە ناو كۆمەڵگەی ئێمەدا هێشتا پەسەند نییە و ناببێتە واقع و جل و بەرگیش وەك پێناسەی ڕەوشت لە زهنو هزری گشتیدا دەمێنێتەوەو ناتوانرێت بكرێتە دەرەوە.

زۆرترین بینراو