سۆران لە یەكەم یاری یەكسان بوو پێنجشەممە رووبەڕووی دهۆك دەبێتەوە

سۆران لە یەكەم یاری یەكسان بوو پێنجشەممە رووبەڕووی دهۆك دەبێتەوە

زاری كرمانجی-سۆران: هەفتەی رابردوو رەوڕەوەی خولی پلە نایابی كوردستان بۆ تۆپی پێ دەستیپێكرد و یانەی وەرزشی سۆران لە یەكەم یاریدا لەگەڵ یانەی وەرزشی نەورۆز بەبێ گۆڵ یەكسان بوو, ئەمەو یانەی سۆران پێنجشەممەی داهاتوو دەبێتە میوانی یانەی دهۆك, رەفیق سەعید راهێنەری یانەی سۆران سەبارەت بە یاری رابردوو لەگەڵ نەورۆز و یاری رۆژی پێنجشەممەی داهاتوو لەگەڵ دهۆك لە لێدوانێكدا بۆ هەفتەنامەی زاری كرمانجی گووتی" یارییەكە لە رووی تەكتیكی زۆر ئاڵۆز بوو هۆیەكەشی بۆ ئەوە دەگەڕێنمەوە یاریزانەكانمان یەكەم جاریانە لە پلە نایاب یاری دەكەن و یاریگەش بچووكتر بوو بۆیە هەردوو یانە بە ترسەوە یارییان دەكرد, سەرەڕای ئەم ئاستەنگانەش ئێمە هەندێك دەرفەتی گۆڵكردنمان درووستكرد كە بەلانی كەم دەتوانرا یەكێكیان گۆڵ بێت, بە شێوەیەكی گشتی لە ئاستی یاریزانەكان رازیم و هەندێ كێشەی بچووكمان هەن دەبێ چارەسەریان بكەین, هەرچەندە ئەوان پارساڵ دووەمی نایابی كوردستان بوون بەڵام ئاستمان وەك یەك بوو, خاڵێكیش بۆ هەردوولا دادپەروەرانە بوو".
سەبارەت بە یاری داهاتووی تیپەكەی مامۆستا سەعید گووتی" پێموایە یاریێكی ئاسان نابێت بەڵام ئێمەش ئامادەكاری باشمان كردووەو یانەی دهۆكیش خاوەن مێژوێكی گەورەی تۆپی پێیە, لەم یارییەدا پێویستمان بە تەركیزێكی باش هەیە تا كەمترین هەڵە بكەین, دەبێ یاریزانەكان ئەوە باش بزانن كەبۆ دهۆك گەشت دەكەین بۆ بردنەوە دەچین و یانەی سۆران پاروێكی ئاسان نابێ بۆ هیچ تیپێك".
ئەنجامەكانی تری خولی پلە نایاب بەم شێوەیە بوو: سیروانی نوێ بە گۆڵێكی بێ وەڵام لە زێرەڤانی بردەوەو پێشمەرگەی هەولێر پاڵەوانی وەرزی رابردوو بە ئەنجامی 2-1 لە شێروانەی بردەوە, هەولێرو پێشمەرگەی سلێمانی 1-1 یەكسان بوون و هەردوو یاری هەندرێن برایەتی و دەربەندیخان دهۆكیش بەبێ گۆڵ یەكسان بوو.

زۆرترین بینراو