سۆران یەكەمی ریزبەند خولی پلە نایابی كوردستانە دەبێتە میوانی برایەتی

سۆران یەكەمی ریزبەند خولی پلە نایابی كوردستانە دەبێتە میوانی برایەتی

زاری كرمانجی- سۆران: لە گەڕی چوارەمی خولی پلە نایابەكانی كوردستان بۆ تۆپی پێ, پێنجشەممە یانەی وەرزشی سۆران یەكەمی ریزبەند لە پایتەختی هەرێم دەبێتە میوانی یانەی برایەتی, سۆران لە كۆی 3 یاری خاوەنی 7 خاڵەو بە جیاوازی گۆڵ لەگەڵ یانەی سیروانی نوێ لە سەرووی ریزبەندە, هێرشبەرەكانی سۆران 4 گۆڵیان تۆماركردووەو گەیلانی گۆڵپارێزی تیپەكەو بەرگریكارەكان بۆ تەنها جاریئَكیش نەیانهێشتووە تۆڕەكەیان بهەژێ, یانەی میوان بە كۆكردنەوەی 5 خاڵ لە پلەی سێیەم دێت و دوو گۆڵی هەیەو گۆڵێكیشی لێكراوە.
لە یاری رابردووی یانەی سۆران كەبە ئەنجامی 3-0 لە یانەی پێشمەرگەی سلێمانی بردەوە, خاڵی بەهێزی تیپەكە بەرزیەتی رۆحی مەعنەوەیی بوو كە هەر لەسەرەتای یارییەكەو لە خولەكی 3 توانیان بەربەستی هێڵی بەرگری تیپی بەرامبەر بشكێنن و بە لێدانێكی سەری جوان هەوگار گۆڵی یەكەمی تۆماركرد, فشارەكانی سۆران بەردەوام بوو كە لێدانێكی تر ستوونی گۆڵی تیپی میوان هەژاندو بە گشتی تایمی یەكەم یانەی سۆران كۆنتڕۆڵی تەواوی یارییەكەی كردبوو, لە چارێگی یەكەمی تایمی دووەم پێشمەرگەی سلێمانی كەمێك فشاری بۆ سەر گۆڵی یانەی سۆران درووستكرد, بەڵام هەرزوو كاپتنی تیپەكە ئیدریس لە هێرشێكی هەڵگەڕاوە لە ناوەڕاستی یاریگە تۆپێكی بردو خستیە لای چەپی یاریگە بۆ یاریزانی گۆڵكار سیاكۆ و زیرەكانە توانی گۆڵی دووەم تۆماربكات و برینی سلێمانیەكان قووڵتر بكات, پێش تەواوبوونی یاری بە 9 خولەك دووبارە سیاكۆ لەلای چەپەوە تۆپێكی بردو پێنج یاریزانی تیپی بەرامبەری بڕی و دایە رەنجاو ئەویش بەبێ ترس بە لێدانێكی گۆشەی دوور گۆڵی سێیەمی تۆماركرد.
لەهەمان كاتدا لە یارییەكانی تری ئەم خولە پێشمەرگەی هەولێر میوانداری هەندرێن دەكات, یانەی زێرەڤانی دەبێتە میوانی دهۆك, هەردوو یانەی زاخۆو هەولێر لە یاریگەی یەكەمیان بەیەك دەگەن, پێشمەرگەی سلێمانی رووبەڕووی سیروانی نوێ‌ دەبێتەوەو هەردوو یانەی دراوسێ شێروانەو دەربەندیخان لە یاریگەی كەلار رووبەڕووی یەكتر دەبنەوە, ئەم هەفتەیە یانەی نەورۆز چاوەڕێیە.

بابەتى پەیوەندیدار وەرزشى

زۆرترین بینراو