سیاسەت تا قیامەت

سمكۆ محەمەد

 

داخراوی بازنە سیاسییەكان لە دونیای ئێمەدا بەرادەیەكە كە دەڵێی قەدەرێكە‌و فەرز كراوەتە سەرمان، قەدەرێك هەمیشە لەو فەزایەدا بژین پێی دەڵێن سیاسەت، هەڵبەت مەبەستم لەخودی چەمكی سیاسەت خۆی نییە كە وەك كایەیەكی زانستی دەخوێندرێ و پێویستییەكی رۆژانەشە، بەڵام ئەوەی لە كوردستان ناوی لێندراوە سیاسەت، بۆتە كاری گروپ بەندی و هەر گروپێگ لە دژی گروپێكی تر سیاسەت دەكات و خەڵكیش بۆ پەراوێز، من بۆیە ئەم بابەتە موناقەشە دەكەم، چونكە خەریكە لە دەرەوەی سیاسەت شتێك نامێنێت ژیانی پێوە گرێ بدەین و هەموو دیاردەیەكی پەروەردەیی و كۆمەڵایەتی و فەرهەنگیش ناوی سیاسەتی لێنراوە.
ئەگەر چی دژی ئەوەم سیاسەت بەگروپ و دەستەبژێرەوە گرێبدرێت و تەنها ئەو كارێكتەرانە بتوانن لە رێگەیەوە چارەنووسی زۆرینە دیاری بكەن كە راستەوخۆ بەشداری سیاسەت دەكەن و چالاكن، بەپێچەوانەوە لەگەڵ ئەوەدام خەڵك لە فەزای گشتیدا مومارەسەی سیاسەت بكەن، تا ئەو رادەیەی فشاریش درووست بكرێت بۆ دیاریكردنی فەزایەكی نوێ لە سیاسەت، بەڵام مانای ئەوەش نییە هەموو ژیان ببێت بەگەمەی سیاسەت و لە هیچ رێگەیەكیشەوە نەگەینە ئامانج و هەمیشە گینگڵی تێدا بخۆین، یان ئەوەی ژیان هەمووی خەفەقانی بێت و بۆشاییەك نەبێت بۆ ژیانی ئاسایی، هەر وەك ئەوەی لە هاوكێشەی سیاسی عێراق و كوردستان لەنێوان پێكهاتە سیاسی و نەتەوەیی و مەزهەبییەكان بەگشتی و لە كوردستان لە نێوان پێكهاتە سیاسسەكان بەتایبەتی بەردەوامی وەرگرتووە و كۆتایی نایات تاكو رۆژی قیامەت.
ئەمەی ئێستا رۆژانە دیمەنە جیاوازەكانی سیاسەت وەك بەرهەمی گروپێكی سیاسی دەیبینین و هیچ دەسەڵاتێكیش بۆ گشت نەماوە سنوورێك بۆ ئەو كێشمەكێشە بەردەوامە دابنێت و سیناریۆ لە دوای سیناریۆ بەرهەم دێت و دووبارە دەبنەوە، لەوەش دەچێت بەهۆی خۆدوور گرتنی گشت بێت كە خەڵك فریو دەدرێت، یا لەوە دەچێت وەك نەخۆشییە درێژخایەنەكانی جاران بێت، كە تا قیامەت ببێتە خوورەی جەستەی كۆمەڵگە، ئەگەرنا چۆن دەبێت نەخۆشییەكان دەستنیشان كرابێت و هەموو لایەك هەست بە مەترسی ئەو نەخۆشیانە بكەن و حەكیمێك نەبێت چارەسەرێكی بۆ بدۆزرێتەوە، بە مانایەكی تر چۆن دەبێت ئەو دەستەبژێرە سیاسییە هێندە بێباك و كەمتەرخەم بن كە خەڵك لەئەنجامی ئەو كێشمەكێشە سیاسیەدا سەرقاڵ بكرێن و لە دڵەراوكێدا بژین، یان هەمیشە خەون بەسەقامگیریی سیاسییەوە ببینن وەك هاتنی گۆدۆ، ئەوان بێخەم بخەون.
رەنگە ئەم سیاسەتە تا قیامەتەی لە عێراق و كوردستان هەیە، ئاسۆیەكی باشی هەبێت بۆ كورد، بەو پێیەی هەم لەگەڵ عێراق دۆخەكە بەنەفعی كوردە و هەم لەتوركیا خەریكە گۆڕانكاری هەڵبژاردنەكانی شارەوانی، بەرەو دۆخێكی سەقامگیر دەچێت و هەم لە سوریا ئاگرە سوورەكە لەكورد دوورە، هەم كەیسی ئێران دواخراوە لە ئێستادا، بەڵام پرسیارە سەرسوور هێنەرەكە ئەوەیە لە هەرێمی كوردستان كە تەنها كورد خۆیەتی حوكمڕانی خۆیەتی، كە چی لەبەرامبەر ناكۆكییەكی بەردەوامە كە هەم دەستەبژێر و هەم خەڵكیش دەزانن كڕۆكی بابەتەكان چین، یەك لەسەر یەك كەڵەكە دەكرێن و هەروا بە هەڵواسراوی دەمێننەوە، بەتایبەتی ئەو بابەتانەی كە راستەوخۆ پەیوەندییان بەژیانی خەڵكەوە هەیە و خەریكە لەدەسەڵاتی خەڵكی دەسەندرێتەوە، نموونەش مەسەلەی ساغكردنەوە و یەكلایی كردنەوەی دەستوورە كە تا ئێستا بوونی نییە و بۆشاییەكی گەورەیە لەژیانی سیاسی كوردستان، لەحاڵێكدا هەستیارترین شت كە دەبێ خەڵك بەشداری تێدا بكات دەستوورە، بەو پێیەی پەیوەندی بە ئێستا و داهاتووی هەموو تاكێك و كۆمەڵگە بەگشتی هەیە، بۆیە ئەمە سیاسەتە كە خەڵك ناچار كراوە بەشدار بێت تێیدا، تاقیامەتییە و لە هەموو بابەتێكدا داخراو بێت، دەبێ لەمەدا كراوە بێت.

 

 

 

 

 

زۆرترین بینراو