سیدەكان ... ئەگەری چۆڵ بوونی سێ گوند لە ئارادایە

سیدەكان ... ئەگەری چۆڵ بوونی سێ گوند لە ئارادایە

 

موڕشید برادۆستی - سیدەکان: بەهۆی نائارامی و شەڕ و پێكدادانی بەردەوامی سوپای توركیا و چەكدارانی پەكەكە مەترسی لەسەر ژیان و گوزەرانی گوندەكانی دەشتی هێرتێ لە دەڤەری برادۆست دروست كردووە .

ماوەی چەندین ساڵە پارتی كرێكارانی كوردستان " پەكەكە " لە سنووری گوندەكان و ناوچە شاخاویەكانی دەڤەری برادۆست لە سنووری سۆرلن جێگیر بوونە و بوونەتە مایەی كێشە و گرفت بۆ گوندنشین و هاووڵاتییان، چەكدارانی پەكەكە بەردەوام چاڵاكی سەربازی لە باكووری كوردستان ئەنجام دەدەن، وەك بەرپەرچ دانەوەیەك توركیا بە تۆپ و فڕۆكە تۆپباران و بۆردوومانی بنكە و بارەگاكانی پەكەكە لە باشووری كوردستان دەكات و لەم دوو ساڵەی دووایشدا هێزێكی زۆری پیادەی بە چەكی قورس و سووکەوە رەوانەی نێوخاكی كوردستانی لە سنووری ناحیەی سیدەكان كردووە .

جەلال عوزێر مووختاری گوندی خەلیفان سەر بە شارەدێی سیدەكان بە زاری کرمانجی گووت " بەهۆی هەبوونی چەكدارانی پەكەكە لە سنووری گوندەكەمان و گوندەكانی دەرووبەری، هێزێكی سوپای توركیا لە دامێنی چیاكانی گوندەكەمان جێگیر بوونە و بەردەوام بە فڕۆكەی بێ فڕۆكەوان چاودێری ووردی دەڤەرەكەمان دەكات، رۆژی شەممە چەكدارانی پەكەكە تەقەیان لە سەربازانی توركیا كردوو و دواتر تۆپخانەكانی وڵاتی توركیا بە چڕی گوندەكەمانی تۆپباران كرد و هەرچەندە دانیشتووانی گوندەكەمان سەلامەت دەرچوون، 20 سەر بزن و ئاژەڵی هاووڵاتییانی گوندەمان بەو هۆیەوە لە ناوچوون .

هەر بەهۆی تۆپبارانەكەی شەممە توركیا پیاو و ئافرەتێكی چەكداری پەكەكە لە سنووری سیدەكان كوژران، لە ماوەی رۆژانی رابردوو ئۆپەڕاسیۆنەكانی توركیا لە دەڤەری برادۆست چڕ تر بۆتەوە و بەردەوام تۆپباران و بۆردومانی ناوچەكە دەكات .

ئەو موختارە دەڵێت " تۆپبارانەكە بە شێوەیەك لە ئێمە نزیك بوو كە تەنها 100 مەتر لە خانووی ئێمە دوور بوو، ترس و دڵەڕاوكێی زۆری لای هاووڵاتییانی گوندەكەمان دروست كرد، خۆشبەختانە ئەمجارەش سەلامەت دەرچووین، بۆیە ناچار بووین لە ترسی تۆپبارانەكە گوندەكەمان جێبهێڵیین و ئاوارە بووین، بەڵام دووای وەستانی تۆپبارانەكە بەشێكی زۆری دانیشتووانانی گوند گەڕاونەتەوە، بۆیە ئەگەر شەڕ و پێكدادان و بۆردومانەكان بەردەوامی هەبێ ئەوا ناچارین بە یەكجاری گوندەكەمان جێبهێڵیین .
جیا لە گوندی خەلیفان، شەڕ و پێكدادانی توركیا و پەكەكەو نائارامی دەڤەرەكە ترس و دڵەڕاوكێی زۆری لای هەریەك لە گوندەكانی ئاڵەكا و سیرانیش لە دەشتی هێرتی سیدەكان درووست كردووە
رزگار ئەحمەد هاووڵاتییەكی دەشتی هێرتە لە سیدەكان بە " زاری كرمانجی گووت " زۆربەی دانیشتووانی گوندەكەمان و گوندەكانی دەرووبەری هیچ موچەیەكی حكومەت و حزبەكانیان نییە، بژێوی ژیانیان لەسەر بەخێو كردنی ئاژەڵ و مەڕ و بزنە، ئەویش بەهۆی هاتنی سوپای توركیا و هەبوونی پەكەكە بەخێوكردنی زەحمەت بووە و تەنانەت سوپای توركیا هۆشداری بە شوان و گوانەكانیان داوە كە نزیكەی قەرەقۆل و هێزەكەیان نەكەونەوە و ژیان و گوزەرانمان تێكچووە .بۆیە داوا لە حكومەت و لایەنی پەیوەندی دارەكان دەكەین هەوڵی تەواو بدەن بۆ گەڕانەوەی ئارامی بۆ گوندەكانمان .

ئیحسان چەلەبی بەڕێوەبەری ناحیەی سیدەکان پشت راستی هاتنی سوپای تورکیای بۆ نێو خاکی کوردستان لە سنووری کارگێڕیان دەکات بە زاری کرمانجی راگەیاند" سوپای توركیا زیاتر لە 10 قەرەقۆڵ و نوقتەی سەربارزی لە چیادێل و كتكین و دەشتی بەرازگر و چەند ناوچەیەكی دیكەی دەڤەری برادۆست درووست كردووە و زیاتر لە 50 كیلۆمەتر خاكی كوردستانی لە سنووری ناحیەی سیدەكان بەزاندووە .

و بەقسەی بەرپرسانی تەنهای بێت لە ناوچەكە، توركیا بە نیازی نەهێشتنی پەكەكەیە لە دەڤەری برادۆست .

ناحیەی سیدەكان لە رووی كارگێریەوە سەر بە شارۆكەی سۆرانە و خاوەنی 250 گوندە بەهۆی بۆردومان و تۆپبارانی وڵاتانی تروكیا و نا ئارامی ناوچەكە ، زیاتر لە 100 گوند تا ئێستا ئاوەدان نەكراوەتەوە هەروەها لە ساڵانی رابردوو دەیان خەلكی سڤیل بووەتە قوربانی .

زۆرترین بینراو