سێ براكەی رۆژهەڵات چاویان لە سەركێشییەكی جیهانییە

سێ براكەی رۆژهەڵات چاویان لە سەركێشییەكی جیهانییە

زاری كرمانجی- ئاژانسییە هەواڵییە وەرزشییەكان: سێ برا لە رۆژهەڵاتی كوردستان، ماوەی 15 ساڵە یاری پاركۆر دەكەن، ئێستا ئامادەكاری دەكەن بۆ ئەوەی هەنگاوێكی جیهانی بنێن.
بەهنام، سامان و سیروان جەلیلی. ئەو سێ برایەن كە 15 ساڵە خولیایەكی زۆرییان بۆ یاری پاركۆر هەیە، ئەوان بە قووڵی چوونەتە نێو ئەو یارییە پڕ سەركێشییە و ئاستیان گەیشتووەتە یاریزانی پیشەگەر.
یاری پاركۆر یارییەكی پڕ سەركێشییەو پێویستی بە هێزی زۆری ماسولكەكانەو خێرای دەوێت، یاریزانی یارییەكە دەتوانێت بازی بەرز بدات و لە شوێنی بەرز خۆی هەڵبداتە خوارەوە یان بەسەر دیوار و باڵاخانەكان سەربكەوێت.
بەهنام جەلیلی، برا گەورەی ئەو خێزانە وەرزشوانەیە، رایگەیاند" سەختییەكی زۆرمان دیت لە كاركردن و بڵاوكردنەوەی یارییەكە، لەبەرئەوەی ئێمە پێشتر بەشێوەیەكی فەرمی كارمان نەدەكردو یارییەكە دوو ساڵە لە ئێران مۆڵەتی پێدراوە، بەڵام خۆم و براكانم زۆر خۆمان ماندوو كرد لەپێناو ئەوەی ئەم وەرزشە بەشێوەیەكی باش بڵاوبكەینەوە".
برا وەرزشوانەكانی بۆكان، لە چەند ساڵی رابردوودا سەدان هەواداری یارییەكەیان پێگەیاندووەو یارییەكەیان لەسەر ئاستی ئێران بڵاوكردۆتەوە، ئێستا ئەوان بەشێوەیەكی فەرمی وەك مامۆستاو شارەزای یارییەكە خولی راهێنان و پاڵەوانێتی بەڕێوەدەبەن.
بەهنام زیاتر گووتی" لە تەواوی ئێران كاردەكەین بەشێوەیەكی ئەكادیمی و یارییەكەمان باش پێشخستووە، هیوادارین بتوانین رۆژێك بێت بتوانین سەردانی هەرێمی كوردستان بكەین و خزمەتی وەرزشوانانی بكەین، دەمانەوێت ئەو ئەزموونەی هەمانە بیبەخشینە لاوانی هەرێمی كوردستان".
لێهاتوویی لاوەكانی رۆژهەڵاتی كوردستان بووتە جێگەی بایەخ لای داڤیب بێلی ئەستێری سینەمایی، بێل كە گەورە مامۆستای پاركۆرە لەسەر ئاستی جیهان و كوڕی رایمۆند بێلی داهێنەری یارییەكەیە، بەدواداچوونی كردووە بۆ كارەكانی لاوەكانی رۆژهەڵاتی كوردستان و دەیەوێت هاوكارییان بكات.
سیروان جەلیلی لەبارەی پلانەكانیان بۆ داهاتوو گووتی" بڕیاربوو بەر لە دوو ساڵ داڤید بێل ببینین و كاری گەورە بكەین لەسەر ئاستی رۆژهەڵاتی كوردستان، ئەوەبوو كارێكی سینەمایی بۆ درووستبوو دیدارەكەمان دواخرا، بەڵام لە چەند مانگی داهاتوو سەردانی فەڕەنسا دەكەین و لەگەڵ بێل كۆدەبینەوە، ئەو دەیەوێت هاوكاری بكەین و نوێنەرایەتی ئەو بكەین لەسەر ئاستی وڵاتانی رۆژهەڵاتی ناوەڕاست كاربكەین".
جەلیلی جەختی لەسەر ئەوەشكردەوە، ئێمە خەونی زۆر گەورەمان هەیە، لە رابردوو بەكەلوپەلی سادەو بێ هاوكاری خۆمان پێگەیاندووە، گەر هاوكاری بكرێین چاومان لە بەشداری كردنە لە پاڵەوانێتییە جیهانییەكان.

زۆرترین بینراو