سەدان گوندی سۆران كێشەی ئاوی خواردنەوەیان هەیە

سەدان گوندی سۆران كێشەی ئاوی خواردنەوەیان هەیە

موڕشید برادۆستی – سۆران: لە سنووری قەزای سۆرانی سەر بە پارێزگەی هەولێر رێژەیەكی زۆری گوندنشینان كێشەی ئاوی خواردنەوەیان هەیە و بەدەست نەبوونی ئاو دەناڵێنن .
سۆران سەرباری ئەوەی ناوچەیەكی شاخاوی و سەرچاوەی باشی ئاوی وەك كانیاو و رووباری هەیە، بەڵام لە زۆر شوێن حكومەت وەك پێویست گرنگی پێنەداوە یا قەیرانی دارایی هۆكاربووە بۆ چارەسەر نەكردنی كێشەی ئاو .
رەزاق كانیەڕەشی دانیشتووی دەشتی بەرازگرە لە سنووری سیدەكان بە زاری كرمانجی گووت" ماوەی چەندین ساڵە كێشەی ئاوی خورادنەوە لە زۆربەی زۆری گوندەكانی سنوورەكەمان هەیە، چەندین جار بە رەسمی داواكاریمان لە حكومەت كردووە بەڵام هێشتا چارەسەری بێ ئاوی گوندەكەمان نەكراوە، ئەویش بەهۆی تێكچوونی سیستەمی تۆڕی ئاوی گوندەكەمانە، ساڵانی پێشتر بەهۆی بێ ئاوی حكومەت بە تانكەر ئاوی بۆ دابین كردووین بەڵام ئێستە ئەم بەرنامەیەش نەماوە و دابین كردنی ئاویش بە تانكەر نەماوە".
دووپاتی كردەوە" هەر بەهۆی بێ ئاوی چەندین گوندشینی گوندەكەمان گوندەكەیان جێهێشتووە و روویان لە سەنتەری سیدەكان و سۆران كردووە، ئەمەش كێشە بۆ هاووڵاتییان و دواجار بارگرانیش حكومەتیش درووست دەكات".
عەبدوڵڵا شێخۆ موختاری گوندی نزاری لە دەشتی هێرتێی سیدەكان بە زاری كرمانجی گووت" گوندەكەمان لە زۆربەی خزمەت گوزاریەكان بێبەشن و دیارترینیان بێ ئاویە، ماوەی چەندین ساڵە كێشەی ئاوی خواردنەوەمان هەیە و رۆژ بە رۆژیش نزاری بەفراوانی بەخۆیەوە دەبینێت و كێشەی كەم ئاویش گەورەتر ئەبێ، تۆڕی ئاوی گوندەكەمان و سەرچاوەی ئاومان خراپە و پێویستە حكومەت ئاوڕێكمان لێ بداتەوە .
ئەو موختار دەڵێت " پێشتر لێدانی بیری ئاو ئاسایی بوو زۆبەی گوەندەكان لە رێگەی بیر رزگار بوونە لە بێئاوی، ئێستا حكومەت هەم رێگرە لە لێدانی بیر و سیستەمی دابەش كردنی ئاویشمان بۆ چاك ناكات و بەردەوام گوندەكەمان كێشە و گرفتی ئاوی هەیە، لە رێگەی وشە داوای كرد ئاوڕێك لە گوندەكەیان بدرێتەوە .
قارەمان شێخۆ بەڕێوەبەری فەرمانگەی ئاوی سیدەكان بە زاری كرمانجی گووت" لە سنوورەكەمان " 132 " گوندی ئاوەدان بوونی هەیە, لەو رێژیەیەدا نزیكەی 60 گوند بەردەوام كێشەی ئاوی خورادنەوەیان هەیە, لای خۆمانەوە هەموو هەوڵێك دەدەین بۆ چارەسەر كردن,خواستێكی زۆرمان هەیە بۆ جێبەجێ كردنی پرۆژەی نوێ و گۆڕینی تۆڕكانی ئاو، بەڵام نەبوونی ئیمكانیاتی پێویست رێگرە لە چارەسەر كردنی كێشەی ئاوی ئەو شوێنانە".
زیاتر گووتی" كێشەی ئاوی گوندەكان جۆرا و جۆرە، هەندێكییان بەهۆی بەرفراوان بوونییان گرفت بۆ بەشێك لە ماڵ و دانیشتوانان درووست بووە بەهۆی نەگەیشتن و رانەكێشانی تۆڕی ئاو, هەروەها هەندێ گوند هیچ سەرچاوەی ئاویان نەماوە یان بەهۆی گەرمای هاوین سەرچاوەی ئاوی خواردنەوەیان ووشك بووە.
دووپاتی كردەوە" ئەمساڵ بەرنامەی وشكەساڵیش جێبەجێ نەكرا، ساڵانی پیشتر لە چوارچێوەی ئەم بەرنامەیە بە تانكەر ئاو بۆ سەرجەم ئەو گوندانە دابین دەكرا كە كێشە و گرفتی ئاویان هەبوو، ئەمەش كێشەی زۆری بۆ گوندنیشینانی دەڤەرەكەمان و فەرمانگەكەمانی دروست كردووە .
بەڕێوەبەری ئاوی سیدەكان، ئاماژەشی بەوەدا" سەرووی خۆمان لە كێشەی ئەو گوندانە ئاگادار كردۆتەوە، هەر كاتێك بوددجەیەكی پێویست دابین كرا بێگومان گرفتی كەم ئاوی و بێ ئاوی گوندەكان چارە دەكەین".
لای خۆشیەوە تەحسین سەعدوڵڵا بەڕێوەبەری ئاوی سۆران بە زاری كرمانجی راگەیاند" لە سنووری بەڕێوەبەرایەتییمان نزیكەی " 200 " گوند بوونی هەیە، لەو رێژیەیەدا نزیكەی 100 گوند بەردەوام كێشەی ئاوی خورادنەوەیان هەیە, لای خۆمانەوە هەموو هەوڵێك دەدەین بۆ چارەسەر كردن، خواستێكی زۆرمان هەیە بۆ جێبەجێ كردنی پرۆژەی نوێ و گۆڕینی تۆڕكانی ئاو، بەڵام نەبوونی ئیمكانیاتی پێویست رێگرە لە چارەسەر كردنی كێشەی ئاوی ئەو شوێنانە".
بەڕێوەبەری ئاوی سۆران دەڵێت" كێشەی ئاوی گوندەكان جۆرا و جۆرە، هەندێكییان بەهۆی بەرفراوان بوونییان گرفت بۆ بەشێك لە ماڵ و دانیشتوانان درووست بووە بەهۆی نەگەیشتن و رانەكێشانی تۆڕی ئاو، هەروەها هەندێ گوند هیچ سەرچاوەی ئاویان نەماوە یان بەهۆی گەرمای هاوین سەرچاوەی ئاوی خواردنەوەیان ووشك بووە، بۆیە لەرێگەی تانكەرەوە ئاویان بۆ دابین دەكەین".
ئاماژەشی بەوەدا" سەرووی خۆمان لە كێشەی ئەو گوندانە ئاگادار كردۆتەوە، هەر كاتێك بوددجەیەكی پێویست دابین كرا بێگومان گرفتی كەم ئاوی و بێ ئاوی گوندەكان چارە دەكەین".
لە سنووری بەڕێوەبەرایەتی ئاوی سۆران، 29 هەزار بەشداربوو و هاوبەشی ئاو هەیە، زیاتر لە 12 ملیار دینار قەرزی ئاو لای هاووڵاتیانی دەڤەرەكەیە لە سۆران خەڵك تەنیا 11% پابەندە و پارەی ئاو دەدەن .

 

بیروڕا

زۆرترین بینراو