سەرجەم چالاكییەكانی یەكێتی تۆپی پێی كوردستان راگیران

سەرجەم چالاكییەكانی یەكێتی تۆپی پێی كوردستان راگیران

زاری كرمانجی- هەولێر: یەكێتی تۆپی پێی كوردستان لە راگەیێندراوێكدا بڕیاری راگرتنی سەرجەم چالاكییەكانی راگەیاند، ئەم بڕیارەش لە رۆژی چوارشەممەی رابردووەوە جێبەجێ كرا، واتا یاری كۆتایی خولی تۆپی پێی یانە پلە یەكەكانی كوردستان كە بڕیاربوو پێنچشەممە لە چەمچەماڵ لە نێوان هەردوو یانەی چەمچەماڵ و هەڵۆدا بكرێت دواخرا.
بەپێی زانیارییەكان تا سەرەتای مانگی داهاتوو چالاكییەكان دەستپێناكەنەوە.
هەفتەی رابردوو گەڕی 17 ی خولی نایابی كوردستان بەڕێوەچوو, تیاییدا سۆران بە گۆڵێكی بێ وەڵام بە برایەتی دۆڕا, دەربەندیخان و شێروانە 1-1 یەكسان بوون و هەندرێن و پێشمەرگەی هەولێر بە بێ گۆڵ یەكسان بوون, بە هەمان ئەنجامیش سیروانی نوێ و پێشمەرگەی سلێمانی یەكسان بوون, هەولێریش 2-0 لە زاخۆی بردەوەو دێربی شاری دهۆك بە ئەنجامی 2-0 لە سوودی زێرەڤانی بەكۆتا هات كاتێ لە دهۆكی بردەوە.
تا ئێستا نەورۆزو برایەتی و پێشمەرگەی هەولێر لە پلەكانی یەكەم و دووەم و سێیەمن بە كۆكردنەوەی 26 خاڵ, بەڵام نەورۆزو پێشمەرگەی هەولێر یارییەكیان كەمتر ئەنجام داوە, یانەی سۆرانیش بە كۆكردنەوەی 16 خاڵ لە ریزبەندی یازدەمە.
دەقی راگەیێندراوەكەی یەكێتی تۆپی پێی كوردستان:-
لەسەر داوای حكومەتی هەرێمی كوردستان و لێژنەی باڵای بەرەنگاربوونەوەی ڤایرۆسی كۆڕۆنا، لەبەر بەرژەوەندی گشتی بڕیارماندا سەرجەم چالاكییەكانی یەكێتی تۆپی تۆپێی كوردستان بۆ كاتێكی نادیار بوەستێت، لەگەڵ هیوای سەلامەتی و تەندروستییەكی باش بۆ سەرجەم كوردستانیان بە گشتی و وەرزشوانان خۆشەویست بە تایبەتی.
یەكێتی تۆپی پێی كوردستان
11/3/2020

زۆرترین بینراو