سەرهەڵدانەوەی مانگا لە خەلیفان دەستی پێكردوە

سەرهەڵدانەوەی مانگا لە خەلیفان دەستی پێكردوە

راپۆرت محەمەد ئامۆكەیی- خەلیفان: یەكێك لەو دیاردە ناشارستانیانەی هەیە لە نێو بازاڕی خەلیفان بوونی مانگای خۆماڵیە لە سەنتەری شارەكە، بوونی ژمارەیەك مانگا وایكردووە بەشێك لەو درەختانەی لە ساڵانی رابردوو چێنراون بەهۆی خواردنی لەقی گەڵاكانەوە گەشەنەكەن و هەندێكیشیان لەنێو چوون بەدەر لەمەش بوونی ئەو مانگایانە گرفتی بۆ دوكاندارانیش دروستكردوە، زاری كرمانجی لەسەر چەند بارە سەرهەڵدانەوەی ئەم دیاردە ناشارستانیە بۆچوونی هاووڵاتیانی خەلیفان و گەشتیاران و لایەنی پەیوەندی داری وەرگرتوە.
محەمەد ئیسماعیل هاووڵاتییەكی شارەكەیەو دەڵێت" رۆژانە لەنێو بازاڕی شاری خەلیفان مانگا دەبینرێت، ئەوەش تا بڵێی دیاردەیەكی ناشرینە، لەبەر ئەوەی خەلیفان شوێنێكی ستراتیژیە، رۆژانە بەهەزاران گەشتیار و خەڵكی تر بەنێو سەنتەری شار هاتووچۆدەكەن، ئەوەش وادەكات نێو بانگ و سیمای شار ناشرین بێت بەهۆی زۆری ئەو هەموو مانگایە."
ئەو هاووڵاتییە لەبەردەوامی قسەكانی دا ئەوەشی گووت" چەندین ساڵە لە خەلیفان دار دەچێنرێت بەهۆی خواردنی گەڵای دارەكان دوای ماوەیك دارەكان وشك دەبن و لەنێو دەچن بۆیە دەتوانم بڵێم مانگا زیانێكی زۆری لە دارەكانی نێو بازاڕ داوە، چەند جارێكیش بەخۆم ئەو مانگایانەم دەركەم، بەڵام دوای چەند كاتژمێرێك هاتونەتەوە، هەق وایە ئەو خاوەن مانگایەنەش كەمێك ویژدانیان هەبێت، چیتر مانگایەكان بەڕەلای نێو بازاڕ نەكەن.
هەموو بەیانیەك بەنێو شارێك دەڕۆم كە پڕیەتی لە مانگا من لە بەرپرسانی شارەكە دەپرسم چۆن توانای ئەوەیان نیە ئەو دیاردە ناشرینە كۆنتڕۆڵ بكەن، ئەزانی شار واتە شوێنی كرانەوەی رۆشن فكری، بەڵام ئەوەی دەیبینم بەداخەوە لە سەنتەری شار لە باخچەی ئاژەڵان دەچێت بەهۆی ئەو هەموو مانگایە، ئەمە قسەی فەرمانبەرێكی حكومییە كە لەیەكێك لە شارەكانی سنووری پارێزگای هەولێر زۆربەی بەیانیان روو لە سۆران دەكات.
دوكاندارێكی شارەكەش ئاماژە بەوەدەكات" گیرمان خواردوە بەدەست ئەو مانگایانە لەبەر ئەوەی نیوەڕۆیان كە دەچینەوە ماڵەوە بۆ پشودان دەبێت كەسێك بمێنێتەوە بۆ ئەوەی ئاگاداری ئەو میوەیە بێت كە لەدەروە حەرزمان كردوە بۆ فرۆشتن، لەبەر ئەوەی زۆر جار ئەو مانگایانە بەكۆمەڵ هێرش دێنن و هەرچی میوە هەیە دەیخۆن بۆیە داوا لەسەرۆكی شارەوانی دەكەین، وەك قەزای سۆران دەست بەسەر ئەو مانگایە بگیرێت بۆ ئەوەی سیمای شار جوانتر بێت و ئێمەش رزگارمان بێت لەدەست مانگایەكان.
وەلید سەمەد گەشتیارێك بوو لە شاری شەقڵاوە، بەرەو ناوچە گەشتیارەكانی سۆران دەچوو لەنێو بازاڕی خەلیفان وەستابوو بۆ كڕینی كەل و پەلی گەشت گووتی" لە زۆر شوێن باس لەوە دەكرێت كە هیچ شارێك ئەوەندەی خەلیفان مانگای لێنیە مەبەستم نێو بازاڕەكەیەتی، سەرەتای گەیشتنمان بۆ دەروازەی شار چەند مانگام بینین خەریكی خواردنی گەڵاكانی داربوون، بۆیە ئەو قسەیەم بیرهاتەوە كە پێشتر باسی لێوەدەكرا، دەكرێت لایەنی پەیوەندی دار چارەسەرێك بۆ ئەو دیاردەیە دابنێت چونكە بەڕاستی ناشرینە ئەو هەموو ئاژەڵە لە نێو بازار بە ئارەزوی خۆیان بسوڕێنەوە.
لەسەر سەرهەڵدانەوەی مانگا لە نێو بازاڕی خەلیفان، تاریق ئیبراهیم مەغدید، سەرۆكی شارەوانی خەلیفان، بە زاری كرمانجی راگەیاند" دیاردەی مانگا لەنێو بازەڕەكان لە زۆر شوێن هەیە، لەوانیە خەلیفانیش لەو رووەوە پشكی شێری بەركەوتبێت لە زۆری مانگا لە سەنتەری شار، دوای بڕیارەكەی شارەوانی سۆران كە قەدەغەی مانگای لە نێو بازاڕ كرد بۆ مانگێك ئەو ئامێرەی ئەوان مانگایەكانیان پێ دەگواستەوە بۆ خەلیفانیشان هاتوو، توانیمان دەست بەسەر چەند مانگایەك بگرین و خاوەنەكانیان سزا بدەین بۆ ئەوەی چیتر مانگایەكانیان نەهێنە نێو بازاڕ و بیبەن بۆ دەردۆری شار."
سەرۆكی شارەوانی خەلیفان ئاماژەی بەوەشكرد" ئێستا ئاگادارین كە چەند بارە ئەو دیاردەیە سەری هەڵدایتەوە بە رۆژی روناك مانگا دەسوڕێنەوە بگرە زیانی زۆریشیان بە درەختەكان گەیاندوە، لە رێگەی زاری كرمانجی داوا لە بەڕێوەبەری شارەوانیەكانی سۆران دەكەم هانایان بۆدەبین هاوكارمان بێت و ئەو ئۆتۆمبێلەی كە تایبەتە بەگواستنەوەی مانگایەكان بۆمان دابین بكات، بۆ ئەوەی بەزوترین كات بتوانین ئەو دیاردەییە نەهێلین، هەروەها لە رێگەی مینبەری مزگەوتەكانیش چەندین جار مامۆستایانی ئاینی باسیان لەو دیاردەیە كردوە ئامۆژگاری خەڵكیان كردوە، بەڵام بەداخەوە خەڵكەكە پابەندی ئەوەش نەبونە.

بیروڕا

زۆرترین بینراو