سەرۆکی هەرێمی کوردستان هەڵدەبژێردرێت

سەرۆکی هەرێمی کوردستان هەڵدەبژێردرێت

ئەمڕۆ پەرلەمانی کوردستان بۆ دەنگدان لەسەر هەڵبژاردنی سەرۆکی هەرێمی کوردستان کۆدەبێتەوە، پێنج کەس بۆ ئەو پۆستە بەربژێرن و نێچیرڤان بارزانی بەربژێری پارتیی دیموکراتی کوردستان بەهێزترین بەربژێرە.

بەپێی رێککەوتنی نێوان گۆڕان، پارتی و یەکێتی زۆرترین پەرلەمانتار دەنگ بە نێچیرڤان بارزانی دەدەن بۆ ئەوەی ببێتە سەرۆکی هەرێمی کوردستان.

بەپێی رێکارەکان، بۆ رۆژی دەنگدان ئەو پێنج بەربژێرەی دەیانەوێ ببنە سەرۆکی هەرێمی کوردستان ناچنە پەرلەمان، تەنها سیڤییەکانیان دەدرێتە پەرلەمانتاران و لەسەر ئەو بنەمایە دەنگیان پێدەدرێت. هەر کەس متمانەی پەرلەمانتارانی وەرگرت، سوێندی یاسایی دەخوات، وه‌كو پێشتریش ئومێد خۆشناو، سەرۆکی فراکسیۆنی پارتی، بە ماڵپەڕی فه‌رمیی پارتی دیموكراتی كوردستانی راگەیاندبوو، "ئەمڕۆ تەنیا سەرۆکی هەرێمی کوردستان لە پەرلەمان هەڵدەبژێردێت و رێوڕەسمی سوێند خواردنی سەرۆکی هەرێمی کوردستان، دەکەوێتە پاش جەژنی رەمەزانەوە".

دوای ئەوەی دەنگ بە سەرۆکی هەرێمی کوردستان درا، فراکسیۆنی پارتی وەک براوەی یەکەمی هەڵبژاردنی پەرلەمانی کوردستان ناوی مەسروور بارزانی بۆ پێکهێنانی کابینەی نۆیەمی هەرێمی کوردستان دەداتە سەرۆکایەتیی پەرلەمان.

سەرۆکایەتی پەرلەمانیش ناوی ئەو بەربژێرە دەداتە سەرۆکی هەرێمی کوردستان، ئەویش بەپێی پرۆتۆکۆڵ مەسروور بارزانی بانگهێشت دەکات و رایدەسپێرێت بۆ پێکهێنانی کابینەکەی.

لە دوای راسپاردنی، مەسروور بارزانی ماوەی 30 رۆژی لەبەردەمدایە بۆ پێکهێنانی کابینەی نۆیەمی هەرێمی کوردستان.

نێچیرڤان ئیدریس مستەفا بارزانی، به‌ربژێری پارتی دیموكراتی كوردستان بۆ سه‌رۆكایه‌تی هه‌رێمی كوردستان.

- لە 21ی ئەیلوولی 1966 لە حاجی ئۆمەران لەدایكبووە
- لە 1975 لەگەڵ بنەماڵەكەیدا ئاوارەی ئێران بوون
- خوێندكاری بەشی زانستە سیاسییەكان بووە لە زانكۆی تاران
- لە 1989 بووەتە ئەندامی مەكتەبی سیاسیی پارتی
- لە 1996 بووەتە جێگری سەرۆكوەزیرانی هەرێمی كوردستان
- لە 1999 بووەتە سەرۆكوەزیران (كابینەی چوارەم)
- 2006 بووەتە سەرۆكوەزیران (كابینەی یەكگرتنەوە)
- لە 2011 بۆ 2013 جارێكی دیكە بووەتەوە سەرۆكوەزیران
- لە 2013 جارێكی دیكە پۆستی سەرۆكوەزیرانی وەرگرتەوە تاوەكو 2018
- لە كۆنگرەی 13ی پارتیدا بووەتە جێگری سەرۆكی پارتیی دیموكراتی كوردستان
- 3/12/2018 كرایە بەربژێری پارتی دیموكراتی كوردستان بۆ پۆستی سەرۆكی هەرێمی كوردستان
- خێزاندارە و باوكی چوار منداڵە بەناوەكانی (ئیدریس، چیاڤان، رانیە و مایا).

زۆرترین بینراو