شارەوانی هەریر سزای خاوەن ئاژەڵەكان دەدات

شارەوانی هەریر سزای خاوەن ئاژەڵەكان دەدات

محەمەد ئامۆكەیی- هەریر: دیاردەی مانگاو مەڕو بزن لە چەند شارێكی كوردستان بوونی هەیەو تاكوو ئێستا ئەو دیاردەیە لە لایەن بەرپرسانی شارەوانیەكان نەتوانراوە كۆنتڕۆل بكرێت، بۆ رێگریكردن لە بوونی ئاژەڵی بەڕەڵا شارەوانی هەریر بڕیارێكی دەركردووە، هەر ئاژەڵێك لە نێو شۆستەكان ببینرێت خاوەنەكانیان سزای ماددی دەدات، بەشێكی زۆری هاووڵاتیانیش بڕیارەكەیان پێ باشەو داوا دەكەن" بڕیارەكە كاتی نەبێت لەبەر ئەوەی بوونی مانگاو هەموو ئاژەڵە ماڵیەكان سیمای شار ناشرین دەكەن.
سەردار ئیسماعیل، هاونیشتیمانیەكی هەریرە، گووتی" یەكێك لەو دیاردە ناشرینانەی هەیە لەشارەكەمان بوونی مانگاو و مەڕو بزنە لە نێو شەقامەكان، رۆژانە بەچاوی خۆمان دەبینین گەڵای دارەكان دەخۆن و ئەوەش كاریگەری دەبێت لەسەر وشك بوونی درەختەكان كەم گەشەكردنیان."
ئەو هاووڵاتیە باس لەوەش دەكات" ئەگەر سەیری دووسایدی هەریر باتاس بكەین دەبینین هیچ دارێكی وای لێنیە تەنیا چەند درەختێك نەبێت ئەوەیش خەڵك خۆی چاندون و مانگاكان بە رۆژی روناك دێن دەیخۆن، ئێستا شارەوانی بڕیارێكی باشی داوە ناهێلێت ئەو ئاژەڵە بەڕەڵایانە بێنە سەر شەقامی گشتی، بۆ ئەوەی شارەكەمان سیمای جوانتر بێت، ئەو دووسایدەی باسیشم لێوەكرد شارەوانی هەریر، دەتوانێت داری باش لە نێوەندی ئەو دووسایدە بچێنێت، هەم سیمای شەقامەكە جوان دەبێت و بۆ لایەنی ژینگە پارێزیش شتێكی بەسود و باش دەبێت، لەبەر ئەوەی ئێستا ئەو رێگایە هەتا بڵێی سیمای شاری ناشرین كردوە.
هاووڵاتیەكی تریش دەڵێت" ئاژەڵی ماڵی نەك لە نێو شەقامەكانە بگرە لە نێو گەڕەكەكانی هەریرو باتاس، بەخێودەكرێن، جگە لە ناشرینكردنی سیمای ئەو گەڕەكانە لە رووی تەندروستیش زیانی هەیەو جگە لە بۆنی ناخۆش، شار وەك گوند نیە هەق وایە لایەنی پەیوەندی دار بڕیارێك لەو بارەوە دەربكات و نەهێلێت كەس لە نێو گەڕەكەكانیش ئاژەڵ بەخێو بكات."
باس لەوەش دەكات" دوای بڕیارەكەی شارەوانی ئێستا ئەو دیاردەیە بەرەو كەمبوونەوە دەچێت، هیواخوازین بڕیارەكە كاتی نەبێت و ئەو خاوەن ئاژەڵانە سزا بدرێن كە ئاژەڵەكانیان دەنێرنە نێو شەقامەكان.
سەرۆكی شارەوانی هەریر، زاهیر بناوی، بەزاری كرمانجی راگەیاند" رۆژانە خەڵك گلەی دەكرد لەوەی كە مانگای بەڕەڵا لە نێو شەقامەكان هەن و دوای ئەوەی چەند جارێك لە ساڵانی رابردوو بڕیاری قەدەغەكردنمان دا، بەڵام سزاكە وەك ئەمجارە نەبوو بۆیە نەتوانرا كۆنتڕۆلی ئەو دیاردەیە بكەین، دوای وەرگرتنی گازندەی خەڵك لەسەر ئەو ئاژەڵانەی كە بەرۆژ و شەو لەسەر شەقام دەبون، سكاڵاكەیان بەهەند وەرگیرا ئێستا بڕیاری ئەوەمان داوە هەر مانگایەك یاخود ئاژەڵێكی تر لەسەر شەقام بینرا لە رێگەی تیمەكانانەوە سبوغ دەكرێت بۆ ئەوەی خاوەنەكەی سزای ماددی بدەین."
زاهیر بناوی، راشیگەیاند" ماندووبونێكی زۆرمان بینی بۆ ئەوەی بزانین خاوەنی ئەو ئاژەڵانەی دێنە سەر شەقامەكان كێن، ناوەكانمان لا تۆماركراون و ناردمانن بۆ بنكەی پۆلیس لەوێ خاوەنەكیان بانگێشت كراون و بەڵێن نامەیان لێوەرگیراوە بۆ ئەوەی ئاژەڵەكانیان لە ماڵەوە بەخێو بكەن نەوەك لەسەر شەقام و نێو بازاڕ." ئێستا دیاردەكە نەماوە ئامانج لەو سبوغ كردنەش ئەوەیە كە ئاژەڵەكان بناسرێنەوە بۆ ئەوەی سزای ماددی خاوەنەكانیان بدرێت.

زۆرترین بینراو