شوان كەریم: نرخی تاپۆكردنی خانووی زێدەڕۆ كەم دەكرێتەوە

شوان كەریم: نرخی تاپۆكردنی خانووی زێدەڕۆ كەم دەكرێتەوە

ئا: ڕائیب شێروانی: پڕۆژە یاسای تاپۆكردنی خانووی زێدەڕۆ یەكێك لەو پڕۆژانەیە كە پەیوەندیی بە هاووڵاتییانی كەمدەرامەتی هەرێمی كوردستانەوە هەیە، ئەندامێكی لیژنەی شارەوانییەكانیش رایگەیاند:" ئێستا پێداچوونەوە بە پڕۆژە یاساكەدا دەكرێت و نرخی تاپۆكردنی خانووی زێدەڕۆ كەم دەكرێتەوە كە لە نێوان 250 بۆ 300 هەزار خانووی زێدەڕۆیی لە هەرێمی كوردستان هەن، بە پەسەندكردنی ئەو پڕۆژە یاسایە كێشەی خانووی زێدەڕۆیی چارە دەبێت و هەرچی زێدەڕۆییە نامێنێت.
شوان كەریم، ئەندامی لیژنەی شارەوانییەكان لە پەرلەمانی كوردستان بۆ هەفتەنامەی زاری كرمانجی دیاركرد:" پڕۆژە یاسای تاپۆكردنی خانووە زێدەڕۆییەكان خوێندنەوەی یەكەمی بۆ كراوە، وەكو لیژنەی شارەوانی هەر لەسەر بابەتەكە دووجار كۆبوونەوەمان كردووە، بەڵام سەرۆكایەتی پەرلەمان لەگەڵ وەزارەتی شارەوانی پێیان باش بووە كە پرۆژە یاساكە بگەڕێتەوە وەزارەتی شارەوانی، بۆ ئەوەی سەرنج و تێبینییەكانی خۆیان بدەن، بەپێی ئەوەی بابەتەكە پەیوەندی بە پارەوە هەیە، هەروەها بەدواداچوون بكەن بەپێی جیاوازی بە پێی سنوورەكان، هەر شوێنێك، هەر پارێزگایەك، قەزا و ناحیەیێك بە پێی واقعەكە مامەڵەی لەگەڵ بكرێت، لەبەر ئەوەی یاساكە وەزارەتی شارەوانی مولزەم دەكات لە ماوەی دوو ساڵدا یاساكە جێبەجێ بكات، بۆیە دەبێت وەزارەت بەرچاو ڕوونیەكی هەبێت، بۆ ئەوەی كە یاساكە دەردەچێت بۆ ئەوانیش كێشە دروست نەبێت.
كەریم، گوتی:" تا ئێستا نرخ دیاری نەكراوە، بەڵام نرخەكان بەو شێوەیە دیاری دەكرێن، بەپێی شوێن و خەمڵاندنی نرخی شوێنەكان، ئەو شوێنانەی كە زێدەڕۆیان لەسەر كراوە، خۆی پێشنیازی پرۆژەكە لە سەرەتادا وا نووسراوە كە لە ناحیەكان 30 هەزار بۆ مەترێك، لە قەزاكان 40 هەزار و لە سەنتەری پارێزگاكانیش 60 هەزار دینار، بەڵام ئەو پێشنیازە گونجاو نیە، بۆ نموونە، لەنێو سەنتەری ناحیەدا بۆ هەر مەترێك ٣٠ هەزار دینار دیاری كراوە، لە هەندێ ناحیە نرخی زەوی زۆر بەرزە و ڕەنگە كێشە لە وەرگرتنی پارەدا نەبێت، بەڵام لە هەندێ ناحیە پارچەیەك زەوی نرخی بە چەند ملیۆن دینارێكە، چۆن دەكرێت دوو ئەوەندەی نرخی خۆی تەنیا بۆ تاپۆكردنەكەی وەربگیرێت، هەوڵدەدەین نرخی تاپۆ كردنی خانووی زێدەڕۆ كەم بكرێتەوە و لە بەرژەوەندی هاووڵاتیاندا دەبێت زیاتر لەوەی كە لە بەرژەوەندی حكوومەتدا بێت، بۆیە دەمانەوێ پرۆژەكە لە پەرلەمانەوە دەربكرێت كە لە بەرژەوەندیی خەڵكی هەژار و كەمدەرامەتی هەرێمی كوردستان بێت، ناكرێت بێ ڕەچاوكردنی هەندێ خاڵی گرنگ پڕۆژە یاسای تاپۆكردنی خانووی زێدەڕۆ لە پەرلەمان تێپەڕێنین.
ئەو ئەندامەی لیژنەی شارەوانییەكان لە پەرلەمانی كوردستان ئاماژەی بۆ ئەوەش كرد:" ئەم هەفتەیە وەزارەتی شارەوانی تێبینییەكانی خۆی دەدات و پرۆژە یاساكە رەوانەی پەرلەمان دەكاتەوە، ئەو كاتە دانیشتنی لەسەر دەكەین و لەگەڵ لیژنەی یاسایی دەگەینە بڕیارێكی كۆتایی و دەبەینەوە پەرلەمان و خوێندنەوەی دووەم و سێیەمی بۆ دەكرێت، پێموایە پێش سەری ساڵ یاساكە پەسەند دەكرێت و بەركار دەبێت.
شوان كەریم، ئەندامی لیژنەی شارەوانییەكان لە پەرلەمانی كوردستان ئاشكراشی كرد:" لە نێوان 250 بۆ 300 هەزار خانووی زێدەڕۆیی لە هەرێمی كوردستان هەن، بە پێی ئەو ئامارەی كە وەزارەت باسی دەكات، بە پەسەندكردنی ئەو پرۆژە یاسایە كێشەی خانووی زێدەڕۆیی چارە دەبێت و هەرچی زێدەڕۆییە نامێنێت".

 

زۆرترین بینراو