شوفێران  لە خراپی ڕێگای  سۆران  حاجی ئۆمەران نیگەرانن

شوفێران لە خراپی ڕێگای سۆران حاجی ئۆمەران نیگەرانن

ڕاپۆرت - عەبدولڵا ماویلی
شەماڵ ڕزاق عالی، دانیشتووی گوندی ڕێژدووری سەر بە شارەدێ قسرێیە، ئەو شوفێری بارهەڵگری هێلی حاجی ئۆمەرانە، خراپی رێگاكە بێزاری كردووە و زۆرجاریش ئۆتۆمبێلەكەی بەم هۆیەوە تووشی گرفت بووە، ئەو بۆ زاری كرمانجی گووتی" ئێمە ڕۆژانە بەم ڕێگایەدا هاتووچۆ دەكەین, رێگاكە زۆر خراپە و پڕە لە چاڵ و تاسە, چەندین جار ئۆتۆمبێڵی من و هاوپێشەكانم دووچاری گرفتی تەكنیكی بوونە, ئەمەش لە ئەنجامی خراپی ڕێگاكەوەیە, لە گەڵ ئەوەی رێگایەكی بازرگانی و گەشتیارییە, بەڵام وەك پێویست گرنگی پێ نەدراوە".
ئەم شوفێرە بارهەڵگرە لە درێژەی قسەكانیدا گووتی" پێویستە حكومەتی هەرێم گرنگی تەواو بەم رێگایە بدات, چونكە رێگایەكی نێودەوڵەتییە و رۆژانە هاتووچۆیەكی زۆری لەسەرە, بەهۆی سەختی و خراپی رێگاكە زۆر جار رووداوی هاتووچۆشی لێدەكەوێتەوە".
ئیدریس قادر، دانیشتووی قەزای چۆمانە و پیشەی شوفێری تەكسییە لە هێڵی حاجی ئۆمەران، ئەو بێزارە لە خراپی رێگاكە و بۆ زاری كرمانجی گووتی" بەڕاستی بێزار بووینە لە خراپی ئەم رێگایە, ئۆتۆمبێلەكانمان هەمووی تێكچوونە".
ئەو شوفێرە كە نموونەی سەدان شوفێری دیكە كە بە هۆی خراپی رێگاكە زیانیان بەكەوتووە، لە درێژەی قسەكانیدا گووتی" پارەی كرێی تەكسییەكانمان بەشی زۆری لە چاككردنەوەی ئۆتۆمبێل خەرج دەكەینەوە, زۆرجاریش رووداوی نەخوازراوی لێكەوتووتەوە، لەگەڵ ئەوەی رێگایەكی بازرگانی نێودەوڵەتییەو ڕۆژانە رێژەیەكی زۆر هاووڵاتییانی هەرێم ڕوو لە وڵاتی ئێران دەكەن, بە پێچەوانەشەوە, هاووڵاتییانی ئێرانیش دێنە كوردستان, خراپی رێگاكە دیمەنێكی ناشیرین نیشان دەدات".
گووتیشی" دوای بڕیاری كۆماری ئیسلامی ئێران و حكومەتی هەرێمی كوردستان لە سەر هەڵگرتنی پارەی ڤیزا, هاتووچۆی هاووڵاتییان زیادی كردووە, بۆیە پێویستە حكومەتی هەرێمی كوردستان گرنگی زیاتر بە ڕێگا و بانە سەرەكییەكان بدات".
خراپی رێگاكە كاریگەری لەسەر كاتیش كردووە، بە جۆرێك زیاتر لە نیوەی كاتی گەیشتن لە هاووڵاتییان و شوفێران دەكوژێت، هەروەك تەها ئیبراهیم كە شوفێرێكی بارهەڵگرە گووتی" رۆژانە بەم رێگایە هاتووچۆ دەكەم, پڕە لە تاسە و چاڵ ، بەهۆیەوە ناتوانین لە كاتی خۆی بگەینە شوێنی مەبەست, بۆیە داوا لە حكومەتی هەرێم دەكەم, جگە لە چاككدرنەوەی رێگا بیر لە دانانی دیواری پاڵپشت و هێماكانی هاتووچۆش بكەنەوە، لەبەر ئەوەی بەهۆی خراپی ڕێگاكە و یەك سایدی و زۆری پێچ و نەبوونی دیواری پاڵپشت زۆرجار شوفێران لە رێڕەوی خۆیان لایان داوەو كەوتوونەتە ناو رووبار و گیانیان لەدەستداوە".
لە كۆتایی قسەكانیدا ئەو شوفێرە گووتی" حكومەتی هەرێم پارەی ڕێگاكان و ژینگە لە شوفێران وەردەگرێت, كەچی سوود لەو پارەیە وەرنەگیراوە بۆ دووبارە بەكارهێنانەوە و چاككردنی رێگاوبانەكان".
ئەحمەد قادر، قائیمقامی قەزای چۆمان بە زاری كرمانجی راگەیاند" ئەمساڵ بە هۆی زۆری ڕێژەی باران بارین و كۆبوونەوەی ئاو لەسەر رێگای سەرەكی نێوان سۆران حاجی ئۆمەران، دوو چاری چاڵ و تاسەی زۆر بووەتەوە, ئەمەش گرفتی زۆری بۆ شوفێران دروستكردووە، ماوەی چوار ساڵی رابردوو بە هۆی قەیرانی دارایی نەمانتوانی گرفتی رێگاكان چارەسەر بكەین, بەڵام ماوەی چەند رۆژێكە بەڕَێوەبەرایەتی چاككردنەوە و پاراستنی ڕێگاوبانی هەولێر دەستی كردووە, بە چاككردنەوە و پڕكردنەوەی ئەو چاڵە و تاسانەی كە لە رێگاكە هەن".
ئەحمەد قادر لەبەردەوامی قسەكانیدا گووتیشی" ئێستا چاككردنەوەی رێگای سەرەكی چۆمان - حاجی ئۆمەران چووتە قۆناغی جێبەجێكردنەوە, ئەمەش دوایی ئەو بڕیارەی ئەنجوومەنی وەزیرانی دێت، كە رەزامەندی دەربڕی بۆ چاككردنەوە و پڕكردنەوەی ئەو شوێنانەی پێویستیان بە دووبارە نۆژەنكردنەوە هەیە، بۆ ئەم مەبەستەش گوژمەیەكیان بە بڕی 464 ملیۆن و 684 هەزار و 500 دینار بۆ تەرخان كردووە, لەبەر ئەوەی رێگایەكی ستراتیژی ناوچەكەیە، هەوڵەكانمان زیاتر چڕ دەكەینەوە, بۆ ئەوەی لە ماوەیەكی كورتدا بە شێوەیەكی ستانداردی جیهانی نۆژەنی بكەینەوە".

 

زۆرترین بینراو