شوێنەگشتیارییەكان چۆڵن

شوێنەگشتیارییەكان چۆڵن

"زیانێكی زۆرمان بەركەوت كەسیش قەرەبوومان ناكاتەوە"
ئا/ هۆژین شەوكەت
شوێنە گەشتیارییەكان ئەمساڵ بە هۆی بوونی ڤایرۆسی كۆڕۆنا و قەدەغەی هاتۆچوو زیانێكی زۆریان بەركەوتووە، زیانێك كە نەیتوانیوە قەرەبووی ئەو تێچوویە بكاتەوە كە خاوەن شوێنە گەشتییارییەكان لە سەرەتای ساڵدا تێیدا سەرفیان كردووە، داخستنی ئەم شوێنانە و رێگری كردن لە سەردانكردنی گەشتیاران وایكردووە هاووڵاتییان روو لە لێواری رووبارەكان بكەن و مەترسی بخەنە سەر ژیانی خۆیان، لە بەدواداچوونێكی زاری كرمانجی بۆ سەیرانگای سیرین، ئەو سەیرانگایەی ساڵێك لەمەوبەر خاوەنی سەیرانگاكەی بۆ رزگاركردنی گیانی گەشتیارێكی عەرەب لە خنكان كۆڕێكی بوو بە قۆربانی، باسمان لە چەندین كێشە و گرفتی ئەمساڵی شوێنە گەشتییارییەكان كرد، لە چاو ساڵانی رابردوو ئەم شوێنە وەك سەیرانگاكانی تر زیان زۆر زیاتر بووە لە قازانج، ئەمەش وایكردووە خاوەن شوێنە گەشتییارییەكان نارەحەت ببن و داوای قەرەبوو لە حكومەت دەكەن.
عوسمان سەعید بەرسیرینی خاوەنی سەیرانگای سیرین سەبارەت بە نەهاتنی گەشتیار و زیانەكانی بە زاری كرمانجی گووت" داوامان لە حكومەتی هەرێم هەیە قەرەبووی ئەو شوێنە گەشتییاریانە بكاتەوە چونكە زەرەر و زیانێكی زۆریان بەركەوتووە، من لە رواندزەوە سەردانی ئەم شوێنە دەكەم بە ئوتومبێل هاتۆچوو دەكەم بەر لە نەورۆز ئێمە ئامادەكاری دەكەین هەموو كەپرەكانمان بە شێوازێكی ستاندارد و بێ كێشە ئامادەكردووە ، ساڵانە دەبێت كەپرەكان بگۆڕین چونكە لەبەر تیشكی خۆر، با و باران تێكدەچن ئێمەش ناچارین بیانگۆڕین، ئەو بڕە پارەیەی ئەمساڵ لەم شوێنانە سەرف كراوە هەمووی بە بەلاش بووە نەمانتوانیوە هیچ سوودێكی لێ وەربگرین چونكە گەشتیارمان نەبووە تەنها لە دوو رۆژی جەژن چەند گەشتیارێك سەردانیان كردین بەڵام كم بوون قەرەبووی ئەو زیانە ناكاتەوە و ئەمساڵ زیانمان زیاتر بووە لە قازانج، سەبارەت بە سەیرانگای سیرین زۆر جیاوازترە لەو شوێنانەی خەڵك سەردانی دەكات چونكە لێرە نزیكە ١٠ تا ١٢ كەپرمان هەیە هەموو ئەو كەپرانەش لەیەك جیانە و مەودای نێوانیان دوورە، ئەو گەشتیارەی سەردانی ئێرە بكات گەر هەڵگری ڤایرۆسەكە یا لە رووی دەروونیشەوە تەواو نەبێت ناتوانێت ئەم بارەی خۆی بۆ گەشتیارانی تر بیگوازێتەوە چونكە رێگری لە بەریەككەوتن كراوە لەگەڵ كەسانی تر جیا لەو كەش و هەوایەی تێیدا هاتووە، سوودێكی زۆر لەم گەشتەی دەبینێت و دوور دەكەوێتەوە لە ژاوە ژاوی شار و بوونی نەخۆشییەكانی ناو شار، كەپرەكان تا ٥ مەتر مەودایان هەیە ئەمەش رێگری لەوە دەكات هاووڵاتیان بەركەوتنیان لەگەڵ یەك هەبێت هەریەكەو لەگەڵ ئەوخێزانەی لەگەڵی هاتووە دەمێنیتەوە ئەوانەش لە ماڵەوە هەر پێكەوەن و هیچ كێشەیەك نابێت".
گووتیشی" دوای تەواو بوونی گەشتەكانیش هەموو شوێنەكان بە دەرمانی تایبەت دەرمانڕێژ دەكەین و خاوێنی دەكەینەوە ناهێڵین هیچ پاشماوەیەكی بە زیان لەو شوێنانە بمێنێتەوە، بەڵام بە داخەوە هەر گەشیارێك روو لەم شوێنە بكات گەشت و گوزار پەیوەندیمان پیوە دەكات و پێمان دەڵێت هیچ كەسێك وەرمەگرن، ئەمەش وایكردووە خەڵك روو لە لێواری رووبارەكان بكات ئەو شوێنانە هەم لە رووی پاك و خاوێنی بە پێی پێویست نین، هەمیش شوێنی مەترسیدارن و هیچ ئاگادار كردنەوەیەكی لێ نییە تا گەشتیار بتوانێت زانیاری لەسەر قوڵی شوینەكە بزانیت زۆرجار تووشی كێشەی گەورە دەبنەوە و ژیانیان لە مەترسیدا دەبێت، هەر چەند رۆژێك بەر لە ئێستا كەسێك لێرە لە سەرووی شوێنی گەشتیاریمان خنكا، هۆكاری ئەوەش رێگە پێنەدانە بە گەشتیار تا بتوانێت لە شوێنی گەشتیاری و لە ژێر رێنماییەكان گەشتەكەی بكات و داوای هاوكاری لە خاوەن شوێنە گەشتییارییەكان وەربگرێت بۆ سەلامەتی گیانی خۆی خێزانەكەی ئەمەش ناچاریان دەكات بچێتە لێواری رووبارەكان، و ژیانیان بخەنە مەترسییەوە".

 

 

 

 

 

 

 

 

 

زۆرترین بینراو