شێنی فلووت: ئامانجم ئەوەیە موزیكی فۆلكلۆری زیندوو بكەمەوە

شێنی فلووت: ئامانجم ئەوەیە موزیكی فۆلكلۆری زیندوو بكەمەوە

رەمەزان هەرنی – سلێمانی : كچە موزیكژەن، شێنێ مەهداوی كە بە شێنێ فلووت ناسراوە لە دایكێكی كۆیی و باوكێكێ هەولێری چاوی بەدویا هەڵهێناوە, ماوەی چەندین ساڵە فلووت دەژنێت و بەشداری چەندین كاری هونەری كردووە ئامادەكاری دەكات بۆ چەندین كاری نوێی هونەری لە بواری موزیك.
موزیكژەن شێنێ فلووت, بە زاری كرمانجی گووت" كە یەكەمجار چاوم كردووتەوە گوێم لە دەنگی باوكم بووە كە حەیرانی دەگووت و دایكم خانمێكی دەست رەنگین بووە خوشكم موزیكژەن بووە، بۆیە بەهۆی كاریگەری ئەوان لەسەر من ساڵی 2006 دەستم بەكاری موزیكژەنی كرد, تا قوناغی ئامادەیم تەواو كرد هەر لە راهێنان دابووم لەسەر ئامێری فلووت دواتر چوومە كۆلێژی هونەرە جوانەكان بەشی موزیك , ئامێری فلووت دەژەنم, هەست دەكەم ئەم ئامێرە لە روحی مرۆڤ نزیكە و دەتوانم هەستەكانم بە رێگای فلووت دەرببرم و بگەینم بە بەرامبەرەكەم".
شێنێ گووتیشی" ساڵی 2006 كاتێك لە خۆلی منداڵپارێزی كوردستان بووم بەشداری كلیپێكم كرد بەناوی ( گدی گدی كارەكەم)، جارێ نامەوێت بەشداری هیچ كلیپێك بكەم تا كاری باشتر دەكەم, هەر ئەو كاتە بەشداری چەندین كۆنسێرتم كردووە لە هەولێرو سلێمانی".
شنێ باسی كاریگەری موزیك كرد لەسەر ژیانی و گووتی" موزیك یارمەتیدەرم بووە تا هەستەكانم دەرببرم و ژیانی زۆر جوانكردوومە، ووردی كردوومەتەوە لە ژیان، تا رێكخستنی ژیان و لە هەموو روویەكەوە، دەتوانم موزیك بەكار بێنم كاتی شتێكی ناخۆش بەسەرم دێت بۆ ئەوەی لەبیر خۆمی بەرمەوە".
ئەوەشی خستەڕوو " موزیكژەنی ئافرەتمان زۆرە، بەڵام رەنگە لەلایەن كەس و كاریانەوە دەرفەتیان بۆ نەرخسێت بۆ ئەوەی دەركەون، بە گشتی كۆمەڵگە هۆكاری كەم دەركەوتنی ئافرەتی موزیكژەنە، لەبەر ئەوەی تووشی توانج و رەخنەی زۆر دەبنەوە, بەڵام نابێت ئافرەت لەسەر قسەی كۆمەڵگە دەست بەرداری موزیكژەنی بێت و پێویستە بەردەوام بێت، بۆ هەمووان بسەلمێنێت، ئێمەش وەك گەلانی جیهان دەتوانین ببینە موزیكژەن".
شێنێ ئاماژەی بەوەشكرد" لە كوردستان زۆر گرنگی بە كاری موزیك نادرێت، ئەگەر لە بۆنەیەك نەبێت هیچ گرنگی بە موزیك نادرێت بە هیوام حكوومەتی هەرێمی كوردستان گرنگییەكی باشتر بە بواری هونەری بە گشتی و موزیك تایبەتی بدرێت، بۆ ئەوەی وەك وڵاتانی پێشكەوتوو لە بواری موزیك بگەینە لوتكە. پێویستە لە موزیكی بیانی دووركەوینەوەو گرنگی بە موزیكی فۆلكلۆری بدەین و ئامانجم ئەوەیە پەرە بە بوارەكەم بدەم لە بواری فۆلكلۆری و بەردەوام زیندووی بكەمەوە".

 

زۆرترین بینراو