عێراق بۆ شەڕی ناوخۆ ئامادە كرا

ئیسماعیل ئیبراهیم

بۆ ئەوەی شەڕی ناوخۆ لە هەر وڵاتێك هەڵگیرسێت تەنها پێویستی بە پێكهاتەی جیای نەتەوەیی یا مەزهەبی و دینی نییە، بەڵكوو پێویستی بە چەندین هێزی چەك بەدەستی جیاجیا و بارگاوی كراوی بە هزری توند و تیژی و رەتكردنەوەی ئەوی دیكەیە، هێزێك تەنها بڕوای وابێت هەموو راستییەكان لای ئەوە، لای ئەویش نەبێت هەر دەبێ ئەو هێزە قسەی یەكەم و كۆتایی بكات و ئەوەی بیەوێت دەبێ وابكرێت.
عێراق ئێستا خاوەن ئەو هێزە ئامادە كراوەیە، هەم لە رووی چەكەوە هەمیش لە رووی هزرییەوە، عێراقێك دوێنی سوونە تا بۆی كرا شیعەی كۆمەڵكوژ كرد، گوندی خاپوور كردن و بە ملیۆنانی ئاوارەی وڵاتان كرد، شیعەیەك كە ئێستا دەستەڵاتی بەدەستەو تۆڵەی نەهامەتییەكانی لە سوونە دەكاتەوە، بە هەر دوو كیشیان ئامادەن ئەوەندە لە كورد بكوژن كە ئاسەواری نەك لە عێراق بەڵكو لەسەر زەوی نەمێنێت. لە نێو ئەو پێكهاتانەش هێزی جۆراجۆر و سەیرو سەمەرە هەیە، هێزێك كە سەربڕین و كۆرپەلە كوشتن و هەڵدڕینی سكی ئافرەتی دووگیانیان لا وەك ئاوی خواردنەوەیە، هێزێك كە بە ئاماژە ئامادەی كردەوەی كۆمەڵ كوژییە.
ئەم هێزانەی نێو پێكهاتەكانی شیعە عێراقیان لە بواری ئابووری و ئاسایشەوە بەرەو ئەم قۆناغە هێنا، بێ گومان ئەم قۆناغەش سەرەتای دۆخێكی زۆر مەترسیدارە، پێكهاتەكانی سوونەش رێك وەك شیعەوان، ئەمە جگە لە چەكدارەكانی داعش و ئەلقائیدە و چەندین هێزی دیكەی یاخی، كە لە نێو پانتایی وڵاتی عێراق بوونیان هەیە، جا بیهێننە بەرچاوی خۆتان، ئەو هێزانە لە كۆنتڕۆڵ دەربچن و هەر یەكەو لە دژی ئەوی دیكە شەڕ بكات و كەس بەزەیی بەوی دیكە دانێتەوە، هیچ هێزێك ئامادە نەبێت ئەوی تر قبول بكات، واتە عێراق زۆر باش بۆ جەنگێكی درێژخایەنی خوێناوی نێوخۆیی ئامادە كراوە، جەنگێك ئەگەر رووبدات كۆتایی عێراقی ئێستایە و سەرەتای عێراقی دابەشبوو دەبێت.
سەردانی كردنی جێگری سەرۆكی ئەمریكا لە هەفتەی رابردوو بۆ هەولێر بێ ئەوەی بچێتە بەغدا لە خۆڕا نەبوو، پەیامێك بوو بۆ سەرانی بەغدا بە هەموو پێكهاتە سیاسی و هێزە جیاوازەكانەوە، كە شكۆی عێراق و ئێوە هەیبەتی ئێوە ئیتر لێرە تا كاتێكی نادیار كۆتایی هات.
عادل عەبدولمەهدی، دەست لە كار كێشانەوەی رادەستكرد و وازی لە كورسی هێنا، پرسیارە ئاڵتوونییەكە ئەوەیە، كێ دێتە شوێنی؟، كێ فریاد رەسی عێراق دەبێت؟، عێراق بەرەو كوێ ؟
كورد دەبێ چی بكات و بەرەو كوێ؟. لە ئەگەری هەڵگیرسانی جەنگی ناوخۆ كێ قوربانی یەكەم دەبێت؟. ئایا چەقی ململانێكانی نێوان وڵاتانی ناوچەكە و زڵهێزانی جیهان عێراقە یا لە وڵاتێكی دیكە؟ ئایا ئەو وڵاتانەی دەستوەردان دەكەن لە شەڕی ناوخۆ تەنها تەماشاكەر دەبن و سەرمایەیان زیاتر دەكەن و چەكی زیاتر بە هێزەكان دەفرۆشن و نەوتەكەی باشتر و بە ئاسوودەتر دەبەن، یا رێگە لە هەڵگیرسانی ئەم شەڕە دەگرن؟.
ئاماژەكان وای نیشاندەدەن لە هەموو روویەكەوە عێراق بۆ ئەو شەڕە ئامادە كراوە كە هەژموونی ئێران لە تەواوی وڵاتانی ناوچەكە كەم بكرێتەوە تا ئەو ئەندازەیە بچووك بكرێتەوە كە نەتوانێت بۆ دەیان ساڵی دیكە بكەوێتەوە سەر خۆی، واتە شەڕی ئێرانەو لە عێراق و وڵاتانی دیكەی وەك یەمەن، لوبنان و سوریە دەكرێت.
بێ گومان پڕوشكی ئەم شەڕە لە كورد دوور نابێت، گرنگە سەركردایەتی سیاسی كورد زۆر ژیرانە سەرەدەری لەگەڵ رووداوە چاوەڕوانكراوەكانی عێراقی دوای عادل بكات، تا كمترین پڕوشكی ئاگری شەڕی بەركەوێت.

بابەتى پەیوەندیدار بیروڕا

گەنج و داینەموو

گەنج و داینەموو

دەرمانناسی

دەرمانناسی

رواندزیانی

رواندزیانی

بیروڕا

زۆرترین بینراو