عێراق بە دوو بردنەوە گەیشتە چوارگۆشەی زێڕین

عێراق بە دوو بردنەوە گەیشتە چوارگۆشەی زێڕین

ئەمڕۆ چوار یاری ئەنجام دەدرێن
زاری كرمانجی: لە میانەی پاڵەوانیەتی جامی كەنداو 24, هەڵبژاردەی عێراق لە نێوان هەر 7 هەڵبژاردەكانی بەشداربووی پاڵەوانیەتیەكە باڵا دەستی خۆی نواندو پێ دەچێ بگەڕێتەوە ئاستی جارانی و هەموو ئەو هەڵبژاردە دراوسێیانە و بگرە ئاسیاییەكانیش حسابێكی جیاوازتر لە جارانی بۆ بكەن, بە دوو بردنەوەی لەسەر یەك لەگەڵ هەردوو هەڵبژاردەی قەتەڕو ئیمارات ترسی خستە نێو دڵی ئەوانی تریش, قەتەڕییەكان كە هەر لە ئێستاوە بە جۆرەها شێوەو هێنانی چەندین راهێنەرو وانەی مەشقی نوێی تۆپی پێ خەریكن بناغەی تیپێكی پۆڵاین بۆ مۆندیالی 2022 لە وڵاتەكەیان دادەڕێژن, لەگەڵ ئەوەشدا خولی قەتەڕی ساڵانێكی زۆرە گرنگی تەواو بە یاریزانی پیشەگەر دەدەن و گرنگی زۆر باشیش بە یاریزانەكانی خۆیان دەدەن, ئیماراتییەكانیش بە هەمان شێوە بەهۆی دەوڵەمەندی یانەكانیان, گرانترین یاریزان و راهێنەرانی بیانی پەلكێشی یانەكانیان دەكەن, عێراقیش سەرەڕای بوونی هەزاران كێشەی سیاسی و ئابووری رۆژ بەرۆژ لە پێشكەوتنی وەرزشی دان.
ئەمڕۆ دووشەممە لە دوا گەڕی قۆناغی یەكەم, هەر 8 هەڵبژاردە بەشداربووەكە لە چوار یاری یەكلاكەرەوەی گەیشتن بە چوارگۆشەی زێڕین رووبەڕووی یەكتر دەبنەوە, لە كۆمەڵەی یەكەم: عێراقیەكان بە دوو بردنەوەو 6 خاڵ سەركەوتنیان مسۆگەر كردووەو دوا یارییان لەگەڵ هەڵبژاردەی یەمەن دەبێت كە هەردوو یارییەكی پێشوو بە ئیمارات و قەتەڕ دۆڕاند, ئەم یارییە لە كاتژمێر 5 و نیو دەستپێدەكات, لە هەمان كاتیشدا شەڕی گەیشتن بەم قۆناغە لە نێوان قەتەڕی خاوەن ماڵ و ئیماڕات دەبێ, هەردووكیان بە بردنەوەیەك و دۆڕانێك خاوەنی 3 خاڵن, بەڵام قەتەڕیەكان بە گۆڵی زیاتر لە پلەی دووەمن, واتە بە ئەنجامی یەكسانیش ئیماڕات دەنێرنەوە ماڵەوە.
لە كۆمەڵەی دووەم كە هەڵبژاردەكانی سعوودیە, كوێت, عومان و بەحرێن لەخۆ دەگرێت, تا راددەیەك ئاڵۆزی بەم كۆمەڵەیەدا دیارە, لەبەر ئەوەی كوێت 3 خاڵی هەیەو لە سعوودیەی بردەوە, عومان و بەحرێن لە یاری یەكەمیان یەكسانبوون و هەردووكیان یەك خاڵیان هەبوو, پێرێ شەممە لە گەڕی دووەم عومانییەكان 2-1 لە كوێتیان بردەوەو خاڵەكانیان بوون بە 4, لە یاری دووەمی ئەم كۆمەڵەیەدا بەحرێن و سعوودە بەیەك گەیشتن و سعوودەی بە ئەنجامی 2-0 سەركەوتنی بەدەستهێنا, پلەی یەكەم عومان 4 خاڵ 2 گۆڵی هەیەو گۆڵێكی لێبووە, پلەی دووەم بە جیاوازی گۆڵ كوێت و سعوودیە, دواتر بەحرێن تەنها خاڵێكی هەیە, لەم كۆمەڵەیە تا ئێستا هیچیان گەیشتنیا مسۆگەر نەكردووەو لە دوو یاری ئەمڕۆ هەموو شتێك دەرئەكەوێ, كە لە كاتژمێر 8 ی شەو بەحرێن رووبەڕووی كوێت دەبێتەوەو سعوودیەش لەگەڵ عومان یاری دەكات.

بابەتى پەیوەندیدار وەرزشى

بیروڕا

زۆرترین بینراو