عەشتار پلانی گەورەی  بۆ وەرزشی عێراق هەیە

عەشتار پلانی گەورەی بۆ وەرزشی عێراق هەیە

هۆژین شەوكەت دری: عەشتار عەلی كامل عەزاوی كچە وەرزشوانی عێراقی ساڵی 1984 لە مۆسكۆ هاتووتە دنیاوە، ساڵی 1991 چووە بۆ لەندەن هەر لەوێ دەست دەكات بە خوێندن و كاركردن، ٩ ساڵ پێش ئێستا لە دوبەی بوو لە بواری بەرهەمهێناندا كاری كردووە، ماوەی چەندین ساڵە دەستی كردووە بە وەرزش، چەندین جار لەلایەن كەسانێكی دژ بە دەركەوتنی ئافرەت رێگری لێكراوە بۆ بەرەوپێشچوون و بەردەوام بوونی لەسەر وەرزشكردن.
عەشتار لە دیمانەیەكی تایبەتی زاری كرمانجیدا باسی لە سەركەوتنەكانی كرد و گووتی" جوجیتسو یارییەكی زۆرانبازیە، لەم یاریەدا خۆ بەدەستەوەدان و بەدەستهێنانی خاڵ هەیە، لە هەموو شوێنێك وەك یەكە هەندێك وڵاتی دورگەی عەرەبی راهێنەری باشیان لە بەرازیلەوە هێناوە و دەتوانین لە ئێستادا قارەمانی باش بەرهەم بهێنین لەم وەرزشەدا، دەستم كرد بەم یاریە تا بتوانم و فێر ببم چۆن پارێزگاری لەخۆم بكەم، ئەمە بۆمن زۆر گرنگ بوو وەك ئافرەتێكی عەرەب لە كۆمەڵگایەكی وادا وەرزش بكات و قبۆڵبكرێت، هەمیشە رێگریم هەبووە پێیان دەگووتم ئەم یارییە بۆ ئافرەتان نییە تەنها پیاوان توانای ئەنجامدانی ئەم وەرزشەیان هەیە، هەوڵی وەستاندنیان دام و رێگر بوون لە بەرەوپێش چوونم، بەڵام ئێستا دوای سەركەوتنەكانم هیچ كەسێك نییە رێگریم لێبكات و هەوڵی وەستانم بدات.
گووتیشی" لە زۆر پێشبركێی جیاوازدا بەشداریم كردووە، زۆریانم لەدەستدا و سەرنەكەوتم، دوبارە هەوڵم داوە دوای چەندین جار دۆران بە بەهێزی گەرامەوە ناو یاریەكانم و بەردەوامیم پێی دا، من هەرگیز عێراقم نەبینیوە، هەمیشە شەرو جەنگ بوونی هەبووە تیرۆر نەوەستاوە ئارامی باڵی بەسەر عێراق نەكێشاوە تا بگەرێمەوە، عێراق هەمیشە لە دڵی مندایە سەربەرزم بەوەی ئاڵای وڵاتەكەم لە پێشبركێكاندا بەدەستەوە دەگرم، هەر شتێك كە دەیكەم بۆ وڵاتەكەمە هیوادارم بتوانم لە داهاتوودا زیاتر كار بكەم بۆ بەرەو پێشبردنی خۆم و وڵاتەكەم، من لە عێراق نەبووم بەڵام بۆ عێراق یاریم كردووە توانیومە مەدالیای زیوی بەدەست بهێنم لە جامی جیهانی ئاسیا و قارەمانی جیهانی، پلانی زۆر گەورەم هەیە بۆ وەرزشی عێراق پلاتفۆرمێكم دەستپێكرد و پێشبڕكێیەكمان دەستپێكرد چەندین وەرزشوانی بەناوبانگی عێراقیمان بانگێشت كردبوون پێشوازییەكی باشی لێكرا، ئەوەی پێویستە دەبێت چاودێرییەكی باشی وەرزش بكەین بۆ داهاتووی عێراق، هیوام وایە شوێنێكی تایبەت بكرێتەوە بۆ ئافرەتان و پیاوان بە راهێنەرایەتی كەسانی بە ئەزموون و خاوەن توانای باش نەك كەسانێك كە توانای راهێنەرایەتیان نەبێت، ئەوكات خەڵكی عێراق دەگەریتەوە بۆ ئەو وەرزشە باشەی ساڵانی پێشووتر هەیبووە".
عەشتار سەبارەت بە گەرانەوەی بۆ عێراق و بەرەوپێشبردنی ئەم وەرزشە بۆ زاری كرمانجی گووتی ”گەرانەوە بۆ عێراق؟! ئەمە بۆ منیش جێگای پرسیارە نازانم داهاتووی من چۆن دەبێت و چی لێدیت، گرنگترین شت بۆمن كە بتوانم لە بواری وەرزشیدا ئەنجامی بدەم بۆ وڵاتەكەم دەمویست لەوێ بومایە، دەمتوانی نزیكەی 50 كەس رابهێنم و هاوكاریان بم لە وەرزشدا، بەڵام دەمەوێت زیاتر بیر لە پرۆژە بكەمەوە گەر بتوانم پرۆژەیەك وەربگرم و كاری لەسەر بكەم دەتوانم بە هەزاران عاشقانی وەرزش رابهێنم و فێریان بكەم و كاری زۆرباش بكەم، زۆرجار بیر لەوەدەكەمەوە كاری زۆر گەورە بكەم بۆ عێراق ناتوانم ببم بە یەكەم كەس و باشترین كەس تەنها ئاواتم بەرەوپێشبردنی وەرزشە دەمەوێت پەرەی پێبدەم وایلێبێت وەرزشوانان بە سەربەرزیەوە لەناو خەڵك بڵێن ئێمە وەرزش دەكەین و سەربەرزین بە وەرزشەكەمان“.

 

زۆرترین بینراو