فوئاد عوسمان: دەرماڵە و كرێی خوێندنی كوڕ و كچانی شەهیدان خەرج دەكرێت

فوئاد عوسمان: دەرماڵە و كرێی خوێندنی كوڕ و كچانی شەهیدان خەرج دەكرێت

دیمانە –ڕائیب شێروانی: فوئاد عوسمان، گووتەبێژی وەزارەتی شەهیدان و ئەنفالكراوانی حكوومەتی هەرێمی كوردستان لە دیمانەیەكی تایبەتدا لەگەڵ هەفتەنامەی زاری كرمانجی گووتی:" لە سەماوە سێ گۆڕی بە كۆمەڵ دۆزراونەتەوە و شوێنەكەش فراوانە و پێ دەچێت چەند گۆڕێكی دیكەش مابن، لە سنووری شنگالیش زیاتر لە 70 گۆڕ دۆزراونەتەوە. دەشڵێ:" یاسای شەهیدانی هەرێمی كوردستان هەموار دەكرێتەوە تاكو هاوسەنگ بێت و مووچەی كەسوكاری شەهیدان بچێتە سەر بەغدا، جگە لەوەی دەرماڵە و كرێی خوێندنی كوڕ و كچانی شەهیدان دابەشدەكرێت.
گوتەبێژی وەزارەتی شەهیدان و ئەنفالكراوانی حكوومەتی هەرێمی كوردستان رایگەیاند:" دوای ئەوەی كە یەكەم گۆڕی سەماوە هەڵدرایەوە لەو سێ گۆڕەی كە دۆزراونەتەوە، كە 171 رووفاتی تێدا بوو، ئێستا رووفاتەكان گوازراونەتەوە بۆ پزیشكی دادی بەغدا تاكو سەمپلی ئێسكی لێ وەربگیرێت، تاكو بەراورد بكرێت لەگەڵ خوێنی كەسوكاری ئەنفالكراوان، دوای ئەوە رووفاتەكان دەگوازرێنەوە بۆ زێدی باب و باپیرانیان و بە خاك دەسپێردرێن، دوو گۆڕی دیكەش ماون بریارە لەو یەك دوو هەفتەیەدا كاریان لەسەر بكرێت و هەڵبدرێنەوە، بەڵام شوێنەكە فراوانە و پێ دەچێت گۆڕی زیاتری تێدا بێت.
فوئاد عوسمان، گوتیشی:" لە سنووری شنگال بەتایبەتی لە گوندی كۆچۆ 15 گۆڕ هەڵدراونەتەوە كە زیاتر لە 235 رووفاتیان تێدا بوو، هەر لە كۆچۆ گۆڕی دیكەش ماوە لە داهاتوودا كاری لەسەر دەكرێت، هەتا لە سنووری شنگال گۆڕی زۆر ماوە لە داهاتوودا تیمە نیشتمانییەكان كاری لەسەر دەكەن، كە تا ئێستا زیاتر لە 70 گۆڕ دۆزراونەتەوە.
فوئاد عوسمان، گوتەبێژی وەزارەتی شەهیدان و ئەنفالكراوانی حكوومەتی هەرێمی كوردستان ئاماژەی بۆ ئەوەشكرد:" دوای ئەوەی كە لیژنەیەك لە بەغدا بە سەرۆكایەتی ناجح شەمەڕی سەرۆكی دەزگای شەهیدانی عێراق پێكهات و راسپاردەكانی دایە ئەنجوومەنی وەزیران تایبەت بە زیندانیانی سیاسی هیچ گرفتێكی یاسایی نیە، بەڵام تایبەت بە مووچەی كەسوكاری سەربەرزی شەهیدان جیاوازی یاساییمان هەیە، پێویست بەوە دەكات كە لە داهاتوودا یاسای شەهیدانی هەرێمی كوردستان هەموار بكرێتەوە تاكو هاوسەنگ بێت و مووچەكانیان بچێتە سەر بەغدا، ئەوەش پێویستی بە كاتە.
گوتەبێژی وەزارەتی شەهیدان و ئەنفالكراوانی حكوومەتی هەرێمی كوردستان ئاشكراشی كرد:" بە گوێرەی بەرنامەكان، بەرنامەی كابینەی نۆیەم درێژە پێدەری كارەكانی كابینەی هەشتەم دەبێت چ كار كردن لەسەر گۆڕە بە كۆمەڵەكان، چ كار كردن لەسەر ناساندنی جینۆساید، چ لە پێشكەشكردنی خزمەتگوزاری بە كەسوكاری سەربەرزی شەهیدان بە گوێرەی یاسای ماف و ئیمتیازاتی كەسوكاری سەربەرزی شەهیدان.
لە كۆتاییدا فوئاد عوسمان، گوتەبێژی وەزارەتی شەهیدان و ئەنفالكراوانی حكوومەتی هەرێمی كوردستان گوتی:" دەرماڵەی خوێندنی كچ و كوڕانی شەهیدان بەردەوام بوو، بەڵام بەهۆی ئەو قەیرانەی كە توشی هەرێمی كوردستان بوو، وەكو وەزارەت ئێمە قەرزاری زۆرێك لەو زانكۆیانەی كە كوڕ و كچی شەهیدان تێدا دەخوێنن بووین، لەبەر ئەوەی حكوومەتی هەرێم نووسراوێكی ئاراستەی زانكۆییەكان كرد، كە ئەوان پەیوەندیان بە كچ و كۆڕی شەهیدانەوە نەبێت، بەڵكو خۆی تێچووەكانیان دابین دەكات، بۆیە ئێمە بە بەردەوامی كارمان كردووە بۆ دابینكردنی ئەم قەرزە بۆ زانكۆییەكان بەتایبەتی لە چەند رۆژی رابردوودا رەزامەندی درا لەسەر خەرجكردنی دەرماڵە و كرێی خوێندنی كچ و كوڕانی شەهیدان بۆ ساڵی 2017- 2018، ئێمە لە هەوڵەكانمان بەردەوام دەبین، بۆ ئەوەی دەرماڵە و كرێی خوێندنی ساڵی 2018- 2019ـیش دەستەبەر بكەین و بكەوینەوە سەر سكەی خۆمان".

زۆرترین بینراو