فەهمی تەوفیقی شێوەكار: خوشەویستیەكی بێ سنوورم هەیە بۆ تابڵوكانم

فەهمی تەوفیقی شێوەكار: خوشەویستیەكی بێ سنوورم هەیە بۆ تابڵوكانم

رەمەزان هەرنی – دینارتە : شێوەكاری گەنجی شارۆچكەی دینارتە لە سنووری قەزای ئاكرێ كە ماوەی چەندین ساڵە كاری هونەری دەكات و چەندین تابڵوی دروستكردووەو ژمارەیەك دیواریشی نەخشاندووە لە چوار چێوەی كاری شێوەكاری.
شێوەكار فەهمی، لە دیمانەیەك بە زاری كرمانجی راگەیاند"لە قوناغی سەرەتایی خوێندن حەزم لەسەر بواری وێنەكێشان هەبوو، لەو كاتەوە مامۆستاكانم زۆر پاڵپشتم بوون و بوونە هۆكارێك بۆ ئەوەی زیاتر ئەو بوارەم لا خوشەویست بێ، لەو كاتەوە دەستم لە وێنە كێشان هەڵنەگرت تا ئێستا"،
گوتیشی"زۆربەی كاتەكانم بە دروستكردنی تابلۆ بەسەر دەبم، ئەو كاتەی فلچەو قەڵەم هەڵدەگرم و تابڵویەك دروست دەكەم، زۆر ئارام دەبمەوە.زۆربەی تابڵوكانم خەیاڵی و خەمۆكی و سروشتێن، تابڵو بۆ شێوەكار وەك هاورێیەكی وەفادار وایە و هاوبەشی خۆشی و ناخۆشییەكانی شێوەكارە"،
ئاماژەی بەوەشكرد"تابلۆیەكانم لەزۆربەی ماڵ و قوتابخانەو شوێنە گشتیی و گەشتوگوزارەكان هەیە، هەر كاتێ چاوم پێیان دەكەوێتەوە پێ دڵخۆش دەبم"،
فەهمی تاكو ئێستا دەرفەتی ئەوەی بۆ نەرەخساوە پێشانگەیەكی تایبەت بە وێنەكانی بكاتەوە، بۆیە دەڵێ‌"چاوەڕێ كۆتایی هاتنی كۆرۆنا و ئاسایی بوونەوەی بارودۆخی ژیان دەكەم، ئەو كات پێشانگەیەكی تایبەت بە وێنەكانم دەكەمەوە كە ئێستا زیاتر لە 100 وێنەی ئامادەكراوم هەیە".

زۆرترین بینراو