قاسم شەشۆ: ئەگەر تورکیا هێرش بکاتە سەر شەنگال دەبێتە شەڕی نێوان ئێران و تورکیا ئێمەش دەبینە قوربانی

قاسم شەشۆ: ئەگەر تورکیا هێرش بکاتە سەر شەنگال دەبێتە شەڕی نێوان ئێران و تورکیا ئێمەش دەبینە قوربانی

قاسم شەشۆ فەرماندەی هێزەكانی پێشمەرگەی شەنگال  لە دیمانەیەكی رادیۆی كوردی دەنگی ئەمریكا دەڵێت" چەند ڕۆژێكە حەشدی شەعبی هێزێكی زۆری هێناوەتە ناو شەنگال دەڵێن بۆشەڕی توركیایە وەك دەزانرێت قوەتی حەشدی شەعبی قوەتی ئێرانە، بۆیە ئەگەر توركیا هێرش بكاتە سەر شەنگال دەبێتە شەڕی نێوان ئێران و توركیا ئێمەش دەبینە قوربانی."

لەسەرەتای وتوێژەكەدا بەرپرسی هێزەكانی پێشمەرگەی شەنگال وتی" لەحاڵەتی هێرشی توركیا بۆسەر شەنگال ئێمە شەڕ ناكەین ئێمە تەنها بەرگری لەخۆمان دەكەین ئەگەرنا ئێمە نەشەڕی توركیا دەكەین نەشەڕی عێراق، ئێمە تەنها بەرگری لەخۆمان و ناوچەی خۆمان دەكەین."

قاسم شەشۆ وتیشی" بەهۆكاری پارتێكی سیاسی و حەشدی شەعبی ئەگەری دروستبوونی شەڕ هەیە لەشەنگالدا"

شەشۆ ئاماژەی بەدۆخی شەنگالیەكان دا و وتی" خەڵكی شەنگال لەئێستادا مورتاح نین دەترسن جارێكی تر بكوژرێنەوە و ئاوارە بكرێنەوە، هەرچەندە خۆیان ئەوانەی گەڕاونەتەوە دووبارە واخەریكە شەنگال جارێكی تر چۆڵ دەكەنەوە و ڕادەكەن چونكە خەڵك مەترسی زۆرە."

قاسم شەشۆ ڕەتیكردەوە چەكدارانی پەكەكە شەنگالیان چۆڵ كردبێت لەو ڕوەوە دەڵێت" پەكەكە هەر لەشەنگالدا ماون تەنانەت ژمارەیان زۆرتر بووە."

دەربارەی جێبەجێكردنی ڕێككەوتنەكەی نێوان هەرێم و بەغداد لەسەر شەنگال قاسم شەشۆ وتی" ئەو ڕێكەوتنە ئەبەد جێبەجێ نەبووە پەكەكە و حەشدی شەعبی دەڵێن ئێمە لەشەنگال دەرناچین هەم شەڕی پێشمەرگە دەكەین وە هەم شەڕی حكومەتی توركیاش دەكەین ئەگەرهاتن."

بەرپرسی هێزەكانی شەنگال دەشڵێت" ئێمە هیواداربوین ئەو ڕێككەوتنەی شەنگال لەنێوان حكومەتی عێراقی و حكومەتی هەرێم جێبەجێبكرێت بەڵام حەشدی شەعبی و حیزبە شیعیەكان ناهێڵن ئەو ڕێككەوتننامەیە جێبەجێبكرێت."

بەبڕوای قاسم شەشۆ ئەگەر ڕێككەوتنەكەی هەرێم و بەغداد لەسەر شەنگال جێ بەجێ بكرایە ئەوا ئەو مەترسیانەی لەسەر شەنگال هەن دروست نەدەبوون و توركیا نیازی هێرشی بۆسەر شەنگال نەدەبوو، لەو ڕوەوە دەڵێت" ئەگەر ڕێككەوتنەكەی جێبەجێ بكرایە پێشمەرگە و حكومەتی عێراقی داهاتنەوە شەنگال ئەمانەش دەچونەوە وە ئەمەی ئێستاش نەدەبوو، ئەگەر پەكەكە شەنگالی چۆڵ بكردایە توركیا هێرشی نەدەكرد توركیا لەبەر پەكەكە هێرش دەكات نەك لەبەر سڤیل و حكومەتی عێراقی، پەكەكە و حەشدی شەعبی بونەتە لایەنێكی ناباش بۆ شەنگال."

وتیشی"هیوادارم ڕێككەوتنەكەی نێوان هەرێم و بەغداد لەسەر شەنگال جێ بەجێبكرێت تاخەڵك مورتاح بێت چونكە ئەو ڕێككەوتنە جێ بەجێبكرێت خەڵكی شەنگال 100% مورتاح دەبێت بەكشانەوەی پەكەكە و حەشدی شەعبی لەشەنگال ڕێككەوتنەكە جێ بەجێدەكرێت و ئەمن و ئاسایش جێگیر دەبێت لەسەر شەنگال."

قاسم شەشۆ جەختیكردەوە" ڕوودانی هەر شەڕێك خراپە بۆ شەنگال ئەگەر شەڕ ڕوبدات مەبەستی ئەوان بۆ ئەوەیە شەنگال وێران بێت و چۆڵ بكرێت و خەڵكەی ئاوارە بێت ئەوە ئامانجی ئەوانە ئامانجی ئەوان لەبەرژەوەندی شەنگال نیە."

لەوەڵامی ئەو پرسیارەی ئایا هیچ هێزێك هەیە بەرگری لەشەنگال بكات لەحاڵەتی هێرشكردنی توركیا بۆ سەر شەنگال؟

قاسم شەشۆ لەوەڵامدا وتی" پەكەكە خەڵكی خۆی زۆر كۆكردۆتەوە لەشەنگالدا هەروەها حەشدی شەعبیش هێزێكی زۆری هێناوە، دەبینین توركیاش لەولاوە هەڕەشە دەكات ئیتر نازانم."

قاسم شەشۆ ئاماژەی بەوەشكرد" چەند ڕۆژێكە حەشدی شەعبی هێزێكی زۆری هێناوەتە ناو شەنگال دەڵێن بۆشەڕی توركیایە وەك دەزانرێت قوەتی حەشدی شەعبی قوەتی ئێرانە، بۆیە ئەگەر توركیا هێرش بكاتە سەر شەنگال دەبێتە شەڕی نێوان ئێران و توركیا ئێمەش دەبینە قوربانی."

بابەتى پەیوەندیدار سیاسەت

زۆرترین بینراو