قوتابخانە ئەهلییەكان و چەند سەرنجێك !

بكر كریم حسن

 بەرێوەبەری گشتی چاڵاكی وەرزش و هونەرماستەر لە كارگێری پەروەردەیی

نوسەر و رۆژنامەنوسی میسری جەلال عامر دەڵێ"كشتوكال برسییەتی ناهێلێ‌ وپیشەسازی پێداویستییەكان دەستەبەردەكات، بەڵام فێركردن نیشتمانێك دەچێنێ‌ و دروست دەكات ودێنێتە بوون".
بێگومان فێركردن بەردی بناغەی دروست كردن و بنیاتنانی كۆمەڵگەیە، بۆیە گرنگە بەوپەڕی بایەخەوە گرنگی بە فێركردن بدەین بۆ پێشكەوتن وگەشەسەندن و پەرەسەندنی نیشتمانەكەمان.
لە فێركردنیش ئەوەی سەرنجی ڕاكێشاوم لەو دوو سێ‌ ساڵەی دوایی رێگەپێدان ومۆڵەتدان و كردنەوەی ئەو هەموو خوێندنە ئەهلییەیە بە هەموو جۆرەكانیەوە (پەیمانگە وئامادەیی و بنەڕەتی و باخچەی منداڵان) دەپرسین هۆكار چییە؟ ئایە كادیری فێركردن لە قوتابخانە حكومییەكان وەكو پێویست رۆڵی خۆی نابینێت؟ یان ئایە دەرچوون و پەڕینەوە و وەرگرتنی بڕوانامە لە قوتابخانە ئەهلییەكان زۆر ئاسان بەدەست دێت؟یان دەپرسین ئایە ئەهلییەكان چییان بەدەستهێناوە و حكومییەكان نەیانتوانیوە؟ دەكرێت بشپرسین كردنەوە و زۆری ئەو هەموو قوتابخانە و پەیمانگە ئەهلییە هێما و ئاماژەن بۆ سەركەوتنی خوێندنی ئەهلی؟ یانیش دەپرسین ئایا قوتابخانە حكومییەكان لە ئاست داواكاری نین؟ بێگومان ئەو پرسیارانە و چەندەها پرسیاری تری جۆراوجۆر لای زۆربەمان دروست بووە، وەڵامەكان بۆ خوێنەر جێ دەهێڵم.
ئەوەی گرنگە وپێویستە وەزارەتمان وەزارەتی پەروەردە بەدواداچوون و دیراسەت كردن و لێكۆڵینەوە و لێپرسینەوەی وورد دەست پێ بكات لە كردنەوەی ئەو هەموو قوتابخانە و پەیمانگە ئەهلییانەی لەو دوو سێ‌ ساڵەی دوایی كرانەوە؟ لێژنەكانی رێگەپێدانی كردنەوە و بەرێوەبەرایەتی خوێندنی ناحكومی و مەرجەكانی كردنەوەی قوتابخانە و پەیمانگەكان تا چەند لەگەڵ ڕێنمایی ویاساكانی خوێندنی ناحكومی و ئەو هەل ومەرجە دەگونجێن و لە هەمان كاتیشدا گرنگە بەراووردێك بكرێ رێژەی قوتابخانە ئەهلییەكان ساڵ بە ساڵ چەندە بە بەراوورد لەگەڵ قوتابخانە حكومییەكان و بە پێی شوێنی جوگرافی، هەروەها ژمارە و رێژەی قوتابییان بە بەراوورد لەگەڵ ژمارە و رێژەی قوتابییان لە قوتابخانە حكومییەكان لە زۆر رووەوە بەراوورد وهەڵسەنگاندنی پەروەردەیی بۆ بكرێت.
گرنگە وەزارەتی پەروەردە ئەوپەڕی بایەخ وگرنگی بە خوێندنی حكومی بدات لە هەموو قۆناخەكان لە پێناو خێزانە هەژاروكەم دەرامەتەكان، چونكە قوتابییانی هەژار خاوەن داهاتی دیاری كراون ناچارن لە قوتابخانە حكومییەكان بخوێنن، بۆیە پێویستە گرنگی زیاتر بە قوتابخانە حكومییەكان بدرێت و ژمارەی قوتابییان لە پۆلەكان كەم بكرێتەوە و مامۆستای زیرەك و بەتوانا و شارەزا لە قوتابخانە حكومییەكان دەوام بكەن و ڕێنمایی نوێ و بەدواداچوونی زیاتر بۆ قوتابخانە حكومییەكان بكرێ بۆ پەرەپێدان و گەشەپێدانی زیاتر لە هەموو روویەكەوە لە هەمان كاتیشدا یاسا و ڕێنمایی یەكلاكەرەوە هەبێت بۆ خوێندنی ئەهلی و نەهێشتنی ئەو جیاوازییە.

زۆرترین بینراو