قۆرت و چاڵەكانی بەردەم پەیمانگە و زانكۆی سۆران ئاستەنگی بۆ شوفێران و قوتابییانی دروستكردووە

قۆرت و چاڵەكانی بەردەم پەیمانگە و زانكۆی سۆران ئاستەنگی بۆ شوفێران و قوتابییانی دروستكردووە

راپۆرت-پشتیوان سیدەكانی: قۆرت و چاڵەكانی رێگای سەرەكی بەردەم پەیمانگەو كەمپی زانكۆی سۆران لە دێڵزیان، بەربەستی بۆ شۆفێران و قوتابی و مامۆستایان دروست كردووەو داواكارن هەرچی زووە پڕۆژەی خزمەتگوزاری بۆ ئەنجام بدرێت.
غەفور عەبدولڵا، یەكێكە لەو شوفێرانەی تاكسی، بۆ زاری كرمانجی دەڵێت " رۆژانە بەهۆی هێنان و بردنی قوتابییان بۆ فاكەڵتییەكانی كەمپی نوێی زانكۆی سۆران روو لە شوێنەكە دەكەم، بەڵام بەداخەوە ئەگەر سەیری رێگای بەردەم پەیمانگەی تەكنیكی سۆران بكەین تا دەگەیتە كەمپی زانكۆی سۆران، پڕیەتی لەقۆرت و چاڵ و لەكاتی باران بارینیشدا قوڕو چڵپاوی زۆر دروست دەبێت، ئەوەش گرفتی زۆر بۆ هاتووچۆی شوفێران و ئەو قوتابییانەش دروست دەكات كە رۆژانە روو لە شوێنەكە دەكەن، لەگەڵ ئەوەشدا رۆژانە قەرەباڵغی زۆر لە شوێنەكە دروست دەبێت و بووەتە گرفتی زۆر لەبەردەم هاتووچۆدا".
ئەم شۆفێرە خوازیاربوو كە لایەنی پەیوەندیدار ئاورێكی خێرا لەم رێگایە بدەنەوە و هەرچی زووە پڕۆژەی بۆ ئەنجام بدرێت و رێگاكە قیڕتاو بكرێت، هەروەها سیستەمی هاتووچۆ لەبەردەم پەیمانەگەو زانكۆ زیاتر رێكبخرێت بۆ ئەوەی شوێنەكە چیتر نەبێتە جێگەی نیگەرانی مامۆستاو قوتابیان و شۆفێران و هاووڵاتییان بەگشتی".
ئیدریس قوتابیەكی زانكۆی سۆرانە، بەزاری كرمانجی گووت " سەرەڕای ئەوەی باس لە پێشەنگی رێزبەندی زانكۆی سۆران دەكرێت، كەچی بەداخەوە ئەگەر سەیری رێڕەوی رێگای گشتی بەردەم پەیمانگەی تەكنیكی سۆران و كەمپی فاكەڵتییەكانی زانكۆی سۆران بكەین لە دێڵزیان، بەهۆی قوڕو چڵپاو و قۆرت و تاسە خەریكە بۆ هاتووچۆ نەشێت، بۆ ئەو مەبەستە چەندین جار داواكاری لە لایەنە پەیوەندیدارەكانی سۆران كراوە، بۆ ئەوەی چارەسەرێك بۆ ئەم گرفتە بكرێت و پڕۆژەی بۆ ئەنجام بدرێت".
ئەم قوتابیە ئەوەش دەخاتەروو " جگەلەوەی ئەم رێگایە ئاستنەگی لەبەردەم هاتووچۆی شۆفێران دروست كردووە لەهەمانكاتیشدا بەهۆی ئەوەی زۆربەی بەشە ناو خۆییەكان لەشوێنەكەن بەشێك لە قوتابیان بە پیادە ڕۆ دەچنە زانكۆ و پەیمانگە لە رێگادا جلەكانیان دەبێت بە قوڕو یان ئۆتۆمبێلێك لە گۆمە ئاوێك دەدات بەر قوتابیان دەكەوێت، ئەمەش بۆتە بیزاری و دڵگرانی هەموولایەك".
زەهرا قوتابی پەیمانگای تەكنیكی سۆران، بەزاری كرمانجی راگەیاند " تا دێت كێشەو گرفتەكانی بەردەم پەیمانگەو كەمپی نویبَی زانكۆی سۆران لە زیادبووندان و ئاستەنگەكانی بەردەم هاتووچۆ زیاتر دەبن، داواكارین لە حكوومەت بایەخی زیاتر بەم رێگایە بدات و هەرچی زووە ئەو ئاستەنگانە لاببردرێن و كە بەهۆی ئەم رێگایەوە لەشوێنەكە بوونیان هەیە" بەڕێوەبەری ناحیەی دیانا
مەغدید عەریف ئەحمەد، بەزاری كرمانجی راگەیاند " بەمەبەستی چارەسەركردنی بەشێوەیەكی سەرەتایی لەمساڵدا دەستمان كرد بە پڕكردنەوەی قۆرت و چاڵەكانی ئەم ریگایە، لەهەمان كاتیشدا لەقەراغ ئەم ریگایە جۆگەیەكمان دروست كرد تا ئاو نەچیتەوە سەر ریگاكە زیان بە شوێنەكە نەگەێنێت و دووچاری تێكچوون نەبێتەوە".
گووتیشی " بەهۆی بوونی پەیمانگەو فاكەڵتییەكانی زانكۆی سۆران رۆژانە قەرەباڵغی زۆر دروست دەبێت لەم رێگایە، بۆ ئەم مەبەستە كارمەندی هاتووچۆمان لەو شوێنانە داناوە، بەڵام پێویستە خەڵكیش هاوكاربێت بەتایبەت شۆفێران تا جەنجاڵی دروست نەبێت، هەروەها لەپلانی حكومەتیش دایە پڕۆژە بۆ ئەم رێگایە ئەنجام بدرێت و ڕیگاكە بەهیڵی٣٠ مەتری و ٤٠ مەتری دا دەڕوات بەشیوەیەكی جووت ساید چاك دەكرێت، كە پێشتر قەیرانی دارایی بەربەست بووە لەبەردەم ئەنجامدانی ئەم پڕۆژەیە.

زۆرترین بینراو