كاتی دەستپێكردنەوەی چامپیۆنزلیگ ئاشكرابوو

كاتی دەستپێكردنەوەی چامپیۆنزلیگ ئاشكرابوو

زاری كرمانجی- ئاژانسییە هەواڵییە وەرزشییەكان: راپۆرتی رۆژنامەكانی ئەوروپا كاتی دەستپێكردنەوەی یارییەكانی خولی یانە پاڵەوانەكانی ئەوروپایان ئاشكراكرد، كە پێشتر و بەهۆی بڵاوبوونەوەی ڤایرۆسی كۆڕۆناوە یارییەكان راگیرابوون.
تۆڕی سكای سپۆرتی ئیتاڵی ئاشكرایكردوە كە لە رۆژانی 7و8ی مانگی هەشت یارییەكانی یۆڤانتس لەگەڵ لیۆن و بەرشەلۆنە لەگەڵ ناپۆلی ئەنجام دەدرێن، كە یۆڤی لە نێو یاریگەی یۆڤانتس ئەرێنا یارییەكەی ئەنجام دەدات و كامپ نۆش باوەش بۆ یارییەكەی ناپۆلی و بەرشەلۆنە دەگرێتەوە.
هەمان سەرچاوە ئەوەشی ئاشكراكردوە، كە دوای كۆتاییهاتنی ئەو چوار یارییەی كە لە قۆناغی شانزە ماون ئەنجام بدرێن، یارییەكانی قۆناغی هەشت دەست پێدەكات كە تەنها بە ئەنجامدانی یەك یاری دەبێت و یارییەكانیش لەنێوان 12 و 15ی هەمان مانگ بەڕێوەدەچن، كە یاریگەی لشبۆنە ئەو یارییانە لەخۆدەگرێت، دواتر یارییەكانی قۆناغی پێشكۆتایی چامپیۆنزلیگ لە 18 و 19ی هەمان مانگ بەڕێوەدەچن و رۆژی 23ی مانگی هەشت یاری كۆتایی پاڵەوانێتییەكە بەڕێوەدەچێت.
هاوشێوەی یارییەكانی چامپیۆنزلیگ، یارییەكانی یورۆپالیگیش لە شارەكانی ئەڵمانیا بەشێوازی یەك یاری ئەنجام دەدرێن و لە نێوان 10 تاوەكو 21ی مانگی هەشت یارییەكان بەڕێوەبچن.
بەشێوەیەكی فەرمی تا ئێستا چارەنووسی ئەو دوو پاڵەوانێتیە گەورەیە ئاشكرا نەبووە، بەڵام بڕیارە ئەمڕۆ چوارشەممە یەكێتی تۆپی پێی ئەوروپا كۆبوونەوەیەك ئەنجام بدات و بڕیاری كۆتایی بدات لەسەر چارەنوسی ئەو دوو پاڵەوانێتیە.

بابەتى پەیوەندیدار وەرزشى

زۆرترین بینراو