كافتریاكان دەبنە بكوژی گەنجانمان

كافتریاكان دەبنە بكوژی گەنجانمان

بەرەڤان شاكر سلێمان لاچ: رۆژانە ژمارەیەكی زۆری گەنج سەردانی كافتریاكان دەكات، ئەمە جگە لەوەی لە سەرەتادا كافتریاكان چاودێریێكی كەمیان لەسەربوو، بەڵام لە ماوەی ڕابردوودا چاودێریێكی زۆر خراوەتە سەر كافتریاكان، بەمەش ئاستی خزمەتگوزاری و سەڵامەتی ناو كافتریاكان باشتربووە.
بەڵام وەك چالاكوانان دەڵێن، تا ئێستا كافتریاكانی كوردستان ستاندارد نین و هۆكارێكن بۆ بڵاوكردنەوەی بێكاری بەناو گەنجاندا، ئەمە لە كاتێكدایە كافتریاكان هۆكارێكی سەرەكین بۆ بڵاوكردنەوەی نەخۆشی شێرپەنجەی قورگ و سییەكان.
بنار شەوقی، كوڕە گەنجێكی سۆرانەو دەڵێت" رۆژانە سەردانی كافتریا دەكەم، بەلایەنی كەمەوە یەك یا دوو نێرگلە دەكێشم، بۆ ئەمەش رۆژانە نزیكی 10هەزار دینارم بۆ كافتریا داناوە".
ئەو گەنج گووتیشی" لەبەر بێ كاری دەچمە كافرتیا، ئەمە سەڕەڕای ئەوەی دەزانم نێرگلە كێشان و كافتریاكان زیانی زۆری هەیە".
بەختیار قادر، دەڵێت" لە سۆران شوێنێك نییە گەنجان داڵدە بدات، ئەگەر سەردانی كافتریا نەكەم بچمە كوێ؟
ئەگەر منیش كارم هەبا هیچ مەجبوور نیم بچمە كافتریا، بگرە لەوانەیە هەر كاتی ئەوێشم نەبێت، بەڵام زانكۆم تەواوكرد و بێكار دەژیم، هەر كەسێكیش كە پێم دەڵێت كافتریا و نێرگلە زیانی زۆر هەیە، پێی دەڵێم كارێكم بۆ بدۆزەوە ئەوە لە ژیاندا سەردانی كافتریا ناكەم".
دیدار جەبار، دەڵێت" من بۆ كات بەسەربردن سەرانی كافتریاكان دەكەم، شەوانە لەگەڵ هاوڕێیانم سەردانی كافتریاكان دەكەین، من پێشتر جگارەم دەكێشا، بەڵام ئێستا تەركم كردووە و زیاتر نێرگلە دەكێشم، بەبۆچوونی من نێرگلە هیچ كاریگەرییەكی خراپی بۆ تەندروستی من نەبووە".
گووتەی ئەم گەنجانە لە كاتێكدایە پسپۆڕانی نەخۆشییەكانی شێرپەنجە دەڵێن" كێشانی هەر نێرگلەیەك زیانەكەی بەرامبەر كێشانی 40 جگارەیە، ئەمە ئەوە دەردەخات زیانەكانی نێرگلە كێشان زۆر زۆرن.
بەڵام ئەوەی ئێمە دەیبینین رۆژانە ژمارەیەكی زۆری گەنجانمان لە كافتریاكان خەریكی نێرگلە كێشانن، بەمەش ئەو كافتریانە بۆنەتە هۆی ئەوەی ژمارەیەكی زۆری گەنجانامن تۆشی نەخۆشی ببن، بگرە كافتریاكان لە ئایندەیەكی نزیكدا دەبنە بكوژی سەرەكی گەنجانمان، ئەو گەنجانەی كە دەشڵێن لە كافتریاكان دادەنیشین و نێرگلە ناكێشین، ئەوا ئەوانیش بەشدارن لە هەڵكێشانی ئەو دووكەڵە ژەهراوییەی كە لەوێ هەیە، بەمەش هەڵكێشانی دووكەڵ و كێشانی نێرگلە جیاوازییەكی ئەوتووی نییە".
چالاكوانێكی مەدەنیش دەڵێت" كافتریا ماوەیەكی كەمە هاتووتە ناو ئێمە، بۆیە تا ئێستاش لە كوردستان زیاتر كافتریاكان بۆنەتە شوێنی نێرگلە كێشان، كەچی دەبوایە بەم شێوازە نەبووایە، بۆیە دەبێت لایەنی پەیوەندی دار كار بۆ ئەوە بكات كە كافتریاكان لە ناوەندێكی نێرگلە كێشانەوە بگۆڕێت بۆ شوێنێك كە گرنگی بە توانانی گەنجان بدات".
ئەو چاڵاكوانە دەشڵێت" دەبێت ڕێكخراوەكانی كۆمەڵگای مەدەنی كار بۆ ئەوە بكەن وشیاری تەندروستی و هزری بەناو گەنجاندا بڵاوبكاتەوە، ئەمەش بۆ ئەوەی چیدیكە كافتریاكان نەبنە هۆكاری نەخۆشكەوتنی گەنجانمان.
ئەمە جگە لەوەی ئەگەر شوێنێك هەبێت بۆ خۆخەریككردنی گەنجان، ئەوا ڕێژەی سەردانی گەنجان بۆ كافتریاكان زۆر كەمدەبێتەوە و گەنجانمان لە مەترسییە تەندروستی و كۆمەڵایەتییەكان دووردەكەونەوە".

 

زۆرترین بینراو