كاكەییەكانی دەشتی مووسڵ لە نێو هەڕەشەی بەردەوام دان

كاكەییەكانی دەشتی مووسڵ لە نێو هەڕەشەی بەردەوام دان

رەمەزان هەرنی- زاری كرمانجی: كاكەیی (یارسان) ئایینێكی كۆنی كوردییە، پێش هەزاران ساڵ لە حەوزی چیاكانی زاگرۆس هەبوونە و تا ئێستا درێژەی بە مانەوەی خۆیان داوە، لە عێراق و كوردستان پێیان دەڵین "كاكەیی"، بەپێی هەندێك ئامار لە سەرتاسەری عێراق نزیكەی 120 هەزار كەس دەبن. باوەڕدارانی (یارسان) لە شوێنەكانی ناوەندی پارێزگاكانی كەركووك، دیالە، نەینەوا، سلێمانی، هەڵەبجە، هەولێر، بەغدا و پارێزگای سەلاحەددین دەژین.
رەجەب كاكەیی، سەرۆكی رێكخراوی میترا بۆ گەشەپێدان و رۆشنبیریی یارسانەكان بە زاری كرمانجی راگەیاند" چەند ئارامگەی پیاوچاكان و زیارەتگەیەك لە گوندەكانی هاوار و هاوارە كۆن و دەرەتووی هەڵەبجەی شەهید و ئارامگەی ئیمام ئەحمەد لە كەركووك و ئارامگەی زاوە شاسوار لە شاری كفری و ئارامگەی باوەمەحمی ناسراو بە باوە پڵاوی لە قەزای خانەقین و ئارامگەی شاە برایم لە بەغدا و پێنج مەزارگە لە دەشتی نەینەوا هەن، كە هەر پێنج شوێنە پیرۆزەكە لەلایەن داعشەوە تەقێندرانەوە، دوای رزگار كردنی دەشتی مووسڵ لەلایەن هێزی پێشمەرگە و خەڵكی كاكەیی شوێنە پیرۆزەكانیان نۆژەنكرانەوە".
گووتیشی " كاكەییەكان لەو چوار پارێزگایە هەمیشە دەستیان لەسەر دڵیانە و هەمیشە هەڕەشەی چەكدارەكانی داعشیان لە سەرە، جگە لە جیاوازیی ئایینەكەیان، جوگرافیاكەشیان بووەتە بەڵای سەریان، جگە لە جیاوازیی ئایینی پێكهاتەكان، جواگرافەكەیان ستەمێكی گەورەی لە پێكهاتەكان كردووە، هەڕەشەی چەكدارانی داعش كۆتایی نەهاتووە بۆ سەر ئایین و پێكهاتەكان، هەر جارێ داعش شوێن پێی خۆی ببینێ گورزێك لە كمە ئایینەكان دەدا، كاكەییەكانیش لەو سنوورە بەهۆی بۆشایی ئەمنی و نەبوونی گرەنتی هەمیشە نیشانەی چەكدارەكانن".
ئەوەشی خستەڕوو" كاكەییەكان جگە لەوەی هەڕەشەیەكی جددییان لەسەرە، ئێستا ناوچەكانیان رووبەڕووی گۆڕینی دیمۆگرافیا دەبنەوە دوو گوند لە ڕۆژئاوای داقووق، كە داعش داگیری كردبوون، تەواو وێران بوون، دواتر هێزی پێشمەرگەی بە هاوكاریی هێزەكانی هاوپەیمانان رزگاریان كردنەوە".
روونیكردەوە" لە دوای رووداوەكانی 16 ئوكتۆبەری 2017 دانیشتووانی گوندێك نەیانتوانی بگەڕێنەوە، تەنیا ماڵە عەرەبەكان گەڕاونەتەوە و هەندێك زەویی كشتوكاڵیش كە پێشتر رژێمی بەعس خاوەنزەوییەكانی تەرحیل كردبوو، دواتر لە دادگای كێشەی موڵكداری گەڕێندرانەوە، بەڵام دووبارە عەرەبەكان بە شێوەیەكی سەیر لە دادگاوە زەوییەكانیان وەرگرتەوە. زیاتر لە چواردە هەزار دۆنم زەوی كە پێشتر تەعریب كرابوو ساڵی 2007 لە دادگای كێشەی موڵكداری یەكلا بووەوە بۆ كاكەییەكان، بەڵام عەرەبەكان دەرناچن، ئەو عەرەبانە لە پرۆسەی تەعریب هاتبوون تا ئێستا ماون، ئێستاش مەترسی چۆڵبوونی گوندەكانمان هەیە كە دواتر دەبێتە هۆی گۆڕانكاریی دیمۆگرافی".
ئاماژەی بەوەشكرد" لە سەرەتای هاتنی داعش 42 كەس بوونەتە قوربانی، 11كەسیش بێسەروشوێنن، بێگومان هەڕەشەكان لەسەر كاكەیی و بە ئامانجكردنیان لەلایەن گرووپە توندڕەوەكان و داعشەوە و، لەلایەن گرووپە مەزهەبگەرا شیعەكانەوە بەردەوامن".

زۆرترین بینراو