كورد لە رەمەزان حەشر بە گۆشت دەكات

كورد لە رەمەزان حەشر بە گۆشت دەكات

محەمەد ئامۆكەیی - سۆران: هەموو ساڵێك لەگەڵ هاتنی مانگی رەمەزانی پیرۆز بازاڕی گۆشت فرۆشەكان جمەیان دێت لە كڕیار، ئەم سالێش هاوشێوەی ساڵانی تر خواست لەسەر گۆشتی سوور و پێداویستیەكانی تری خواردەمەنی زیادی كردوە، ئەم بازاڕ گەرمیە وایكردوە بەهۆی زۆری خواست هەندێ لەكەل و پەلەكان گۆڕان كاریان بەسەر نرخەكان دابێت، بەپێی ئامارەكانی بەڕێوەبەرایەتی گشتی سامانی ئاژەڵ، لە هەرێمی كوردستان، زیاتر لە سێ مڵیۆن و پێنج سەد سەر مەڕ و بزن و 250 هەزار رەشە وڵاغ و 2 هەزار گامێش هەن، لەم رێژەیە نزیكەی شەسەت هەزار مەڕ و بزن و هەشت سەد و پەنجا هەزار رەشە وڵاغ ساڵانە سەر دەبڕدرێن.
نەبەز قەساب، گۆشت فرۆشێكە لە نێو بازاڕی گۆشت فرۆشانی سۆران دەڵێت" هاتنی مانگی رەمەزان بازاڕی ئێمەی گەرمكردوە، بەر لە رەمەزان خەڵك وەك پێویست گۆشتی نەدەكڕی بەڵام ئێستا جیاوازتر لە مانگەكانی تر رۆژانە كڕیارەكان سەردانمان دەكەن بۆ كڕینی گۆشت"
ئەو گۆشت فرۆشە ئاماژەی بەوەشدا" رۆژ هەیە نزیكەی دووسەد كیلۆ گۆشت دەفرۆشم و لە رووی نرخەشەوە هەر وەك خۆیەتی و گۆڕان كاری بەسەردا نەهاتووە، هەرچەندە ئێستا نرخی ئاژەڵەكان لەبەرزبونەوەدایە، بەڵام گۆشت فرۆشەكان هیچ گۆڕان كارییەكیان لە بەرزكردنەوەی نرخ نەكردوە، لەبەر ئەوەی خەڵك هەژارە و هەیە توانای كڕینی نیە ئەگەر لەمە زیاتر نرخەكەی گرانتر بێت.
گلەی ئەوەشی لە شارەوانی كرد" مانگانە بڕێك پارە لە دوكاندارەكان وەردەگیرێ كەچی ئەو زەبالەییەی بەردەم دوكانی گۆشت فرۆشان چەندین مانگە خراپ بووە شارەوانی نەیتوانیەوە دانەیەك دابین بكات، ئەوەشی خستەروو كرێی دوكانەكان لەسەنتەری شاری سۆران گرانە و داوایكرد پێداچونەوەیەك بكرێت بۆ ئەوەی ئەوانیش بتوانن نرخی گۆشت و پێدوایستیەكانی تر كەم بكەنەوە.
عەلی گۆشت فرۆشێكی تربوو ئەو بەدەم لێكردنەوەی گۆشت ئارەقی كردبوو، بۆ زاری كرمانجی گووتی" بەیانیان دەبێت زوو لە خەو هەستم بێمە دوكان، لێرەش چاوەڕێ دەكەم تا لە سەربڕخانە گۆشتمان بۆ دێت و لێرەشەوە بە كڕیارەكان دەیفرۆشین، ئاژەڵەكانیش خۆماڵین و هیچ نەخۆشیەكیان نییەو بە شێویەكی تەندروست سەر دەبڕدرێن، مۆری دكتۆری فیتەرنەری لەسەرە بۆ ئەوەی كڕیار دڵنیا بێت لەوەی گۆشتەكە ئەشێت بۆ خواردن".
عەلی ئەوەشی گووت" تەنیا گۆشتی گۆلك دەفرۆشم لەبەر ئەوە زیاتر ئەو كەسانەی روو لە دوكانەكەم دەكەن داوای گۆشتی گۆلك دەكەن، هۆكارەكەشی ئەوەییە گۆشتی گۆلك نەرمەی زیاترە و خەڵك زیاتر سوودی لێ دەبینێت بۆ ئەو خواردنانەی ئەیانەوێت لە ماڵەوە ئامادەی بكەن.
سەروەر ئەحمەد، پیشەی مریشك فرۆشە دەڵێت" سەرەتای مانگی رەمەزان نرخی مریشك گران بوو بەڵام ئێستا هەرزان بووە ئەوەش وایكردووە خەڵك بە لێشواو لەبەردەم دوكانەكانی مریشك فرۆشەكان بوەستن بۆ كڕینی مریشك، هەرزان بوونی نرخ سوودی بۆ ئێمەی فرۆشیار و كڕیار هەیە لەبەر ئەوەی هەرزان بوونی كیلۆی مریشك زیاتر وادەكات خواست لەسەر مریشك زیاد بێت و بەوەش فرۆشی مریشك بەرزدەبێتەوە".
سەروەر زیاتردەشڵێت" ئەو چەند رۆژەی لە رەمەزان رۆشتووە نرخی مریشك بۆ خوار دوو هەزار دابەزیوە ئەوەش هۆكار بووە كە خەڵك زیاتر مریشك بكڕێت نەوەك گۆشتی سوور." ئەو مریشك فرۆشە لە بەردەوامی قسەكانی دا ئەوەشی گووت" ئێستا رۆژانە سەرووی 200 مریشك دەفرۆشم و دەبێت لە بەیانییەوە زوو بەخەبەر بێم بۆ ئامادەكردنی مریشك بۆ ئەوەی كڕیارەكانم نەوستن و بێزار نەبن.
لەتیف محەمەد دوكانی گۆشتی هاوردەكراوی هەیەو گووتی" لەگەل هاتنی رەمەزان سرووشتی خەڵكی ئێرە وایە زیاتر روو دەكەنە گۆشتی خۆماڵی و كەمتر گۆشتی بەستوو دەكڕن هەر چەند نرخەكەشی هەرزانە، بەڵام وەك گووتم نایكڕن لەو مانگە زیاتر ئەوانەی سەردانمان دەكەن خەڵكی كەم دەرامەتن و توانانی كڕینی گۆشتی خۆمالیان نیە".
لەتیف زیاتر گووتیشی" ئەو گۆشتەی لێرە دەیفرۆشین لە چەند وڵاتێكی جیا هاوردەی كوردستان دەكرێت، ئەوانیش وڵاتانی بەڕازیل و ئوستڕالیاو ئۆرگوای، زۆر جار خەڵك باس لە كوالیتیەكەی دەكەن و دەڵێن رەنگی گۆشتەكە دەگۆڕدرێت ئەمەش گومان دروست ئەكات وادەكات كڕیار نەیكڕێت، ئێمە ناهەقیان ناگرین لەبەر ئەوە هەر گۆشتێك بخێرتە نێو ساردكەرەوە بۆ چەند رۆژێك گۆڕانكاری بەسەر رەنگی دادێت، بۆیە دڵنیای كڕیارەكانم دەكەمەوە ئەو گۆشتەی من دەیفرۆشم بە كوالیتی كۆنتڕۆڵ دا تێپەڕ دەبێت و ئەشێت بۆ خواردن.
حیكمەت حسێن هاونیشتیمانیێكی سۆران بوو ئەو بە مەبەستی كڕینی كەل و پەلی رۆژانە هاتبووە نێو بازاڕی سۆران، دەڵێت" كاتێك مانگی رەمەزان دێت مرۆڤ حەزی بۆ زۆرشت دەچێت تایبەت گۆشت، هەمیشە ئێمەی كوردیش گۆشت خۆر بووینەو نەك روەك خۆر، ئەوەی دەبینرێت لێرە نرخی سەرجەم كەل و پەلەكان گران، ناكرێت بەم مانگە پیرۆزە نرخەكان بەرز بكرێنەوە، گۆشتی سوور نرخی 11 هەزار بۆ 13 هەزارە ئەوەش گرانەو دەبێت لایەنی پەیوەندی دار پێداچونەوەیەك بە نرخ بكات، لەبەر ئەوەی ئەگەر خانەوادەیەك پێنج كەس بێت سێ كیلۆ بكڕیت نزیك 40 هەزار دینار دەكات، ئەوەش بارگرانییە بۆ كەسی یەكەمی ماڵ چوونكە مرۆڤ ئێستا ناتوانێت فریا چی بكەوێت.

زۆرترین بینراو