كوشتن، لەسێدارەدان، ئەشكەنجە و بەندكردن تەنگی بە هاووڵاتییانی كورد هەڵچینییەوە

كوشتن، لەسێدارەدان، ئەشكەنجە و بەندكردن تەنگی بە هاووڵاتییانی كورد هەڵچینییەوە


زاری كرمانجی: بە پێی راپۆرتێكی رێكخراوی مافی مرۆڤی هەنگاو، كە پشتی بە بەڵگەی تایبەتمەندەوە بەستووە، رۆژانە پێشێل كردنی مافی مرۆڤ لە ئێران لە بەرامبەر كوردانی رۆژهەڵات پەرەدەستێنێت، لە هەمانكاتیشدا كوشتن بە تەقەی راستەوخۆی هێزەكان و لە سێدارەدان و سەپاندنی سزای قوورسی زیندان و ئەشكەنجەدان بە شێوەی بەرچاو زیادی كردووە.
بەپێی راپۆڕتەكە لە مانگی رابردوو 90 حاڵەتی زەق و ئاشكرا بووی پێشل كردنی مافی مرۆڤ و كوژران و لە سێدارەدان هەبووە.
لە راپۆڕتەكە هاتووە لەماوەی مانگی ڕابردوودا 18 كۆڵبەر و كاسبكار لە سنوورەكانی كوردستان بوونەتە قوربانی كە 6 كەسیان گیانیان لە دەستداوە و پێنج كەس لەو شەش كەسە بە تەقەی ڕاستەوخۆی هێزە چەكدارەكانی ئێران و توركیا گیانیان لە دەست داوە.
هەروەها 12 كۆڵبەر بریندار بوون كە 10 حاڵەتی بە تەقەی ڕاستەوخۆ بووە و دوو كەسیش بە هۆی تەقینەوەی مین بریندار بوون.
لە بارەی لە سێدارەدانیشەوە لە راپۆڕتەكە ئاماژە بەوە دراوە كە" لە مانگی رابردووی ئەمساڵ لایەی كەم 6 هاووڵاتیی كورد لە بەندیخانەكانی ئورمییە و خوڕەمئاوا لەسێدارە دراون. پێنج كەسیان بە تۆمەتی قەتڵی ئەنقەست و كەسێكیان بە تۆمەتی بازرگانی كردن بە ماددە سڕكەرەكان ئەو حوكمەیان بە سەردا سەپابوو".
هەروەها ئاماژە بەوە كراوە " لەو ماوەیەدا بەندكراوێكی كورد لە بەندیخانەكانی خوڕەمئاوا لە ژێر ئەشكەنجە كوژراوە و بەندكراوێكیش لە ئورمیە بە هۆی درەنگ گواستنەوە بۆ ناوەندە دەرمانییەكان گیانی لە دەست داوە".
زیاتر روونكراوەتەوە كە " لە ماوەی مانگی ڕابردوودا، پێنج هاووڵاتیی كورد لە سنوورەكانی كرماشان، ئیلام، مەریوان، سەردەشت و پیرانشار بە هۆی تەقینەوەی مین بوونەتە قوربانی كە كەسێكیان گیانی لە دەست داوە، دوو هاووڵاتیی دیكەی مەدەنیش لە شارەكانی بانە و سەوڵاوا بە تەقەی هێزە چەكدارەكانی ئێران گیانیان لە دەست داوە".
راپۆڕتەكەی رێكخراوی هەنگاو بۆ چاودێری كردنی ماف مرۆڤ لە بارەی دەست بەسەر كران و سەپاندنی حوكم نووسیویەتی " بە پشتبەستن بە ئامارەكانی هەنگاو، لەماوەی مانگی ڕابردوودا لانیكەم 47 هاووڵاتیی كورد لەلایەن ناوەندە ئەمنییەكانی حكوومەتی ئێرانەوە بە تۆمەتی چالاكی سیاسی و مەدەنییەوە دەستبەسەر كراون كە دوو كەسیان مێرمنداڵ بوون.
هەروەها، حەوت هاووڵاتیی كورد بە تۆمەتی چالاكی سیاسی، مەزهەبی و مەدەنی سەرجەم حوكمی 11 ساڵ و 6 مانگ بەندكرانیان بە سەردا سەپاوە".

زۆرترین بینراو