كوشتن و خۆكوشتن لە دەڤەری سۆران دەبێتە دیاردە

كوشتن و خۆكوشتن لە دەڤەری سۆران دەبێتە دیاردە

زاری كرمانجی –سۆران: لە بە دوواداچوونێكی زاری كرمانجیدا دەردەكەوێت لە دەڤەری سۆران كوشتن و خۆ كوشتنی پیاوان و ئافرەتان لە بەرز بوونەوەدایە پۆلیسی ناوچەكەش هۆشداری دەدات .
لە سەرەتای مانگی 11 تاكو ئامادەكردنی ئەو راپۆرتە، لە سنووری هەر چوار قەزای سۆران، رواندز، مێرگەسۆر، چەند حاڵەتێكی كوشتن و خۆكوشتن تۆمار كراون و توێژەرێكی كۆمەڵایەتیش هۆكارەكان دەخاتەڕوو.
پاش نیوەڕۆی رۆژی 6 – 11 – 2019 لە سەنتەری قەزای سۆران، لە ئەنجامی درووست بوونی دەمەقاڵی هاووڵاتییەك بە دەبانچە دەستدرێژی گولە لە چەند هاووڵاتییەكی تر دەكات لە ئەنجامدا چوار كەس دەكاتە قوربانی .
شەماڵ دێواری گووتەبێژی بەڕێوەبەرایەتی پۆلیسی سۆران بە زاری كرمانجی راگەیاند" لەسەر كێشەیەك، هاووڵاتییەك بە ناوی " ش ، ح ، م " تەمەن 31 ساڵ كوژرا و سێ هاووڵاتی تریش بە ناوەكانی " ج ، خ ، م " تەمەن 27 ساڵان و " ب ، ر ، ح " تەمەن 16 ساڵان و " ت ، أ ، ح " تەمەن 36 ساڵان هەرسێكییان دانیشتووی سۆرانن و پیشەییان كاسبە بە سەختی بریندار بوون، تەرمی كوژراوەكە لەسەر فەرمانی دادوەری لێكۆڵینەوە بەمەبەستی چۆنیەتی گیان لەدەستدانی رەوانەی پزیشكی دادی سۆران كراوە .
زیاتر گووتی" كەسێك بە ناوی " ع ، ح " دانیشتووی سۆران بە كوشتن و بریندار كردنی ئەو هاووڵاتییانە تۆمەتبارە و دووای رووداوەكە خۆی رادەستی یاسا كردووە. گووتیشی" لێكۆڵینەوەكان بەردەوامن و وەتۆمەتبار بەپێی ماددەی " 406 " بەندكراوە لەسەر فەرمانی دادوەر .
گووتەبێژی پۆلیسی سۆران دەڵێت " بەرەبەیانی رۆژی 2 – 11 – 2019 لە قەزای رواندزی سەر بە پارێزگەی هەولێر دوو كەس كوژران كە پیشەیان پێشمەرگە و پۆلیس بووە . هۆكارەكەش پەیوەست بووە بە كێشەیەكی كۆمەڵایەتی، لە ئەنجامدا دوو كەس بە ناوەكانی " ب ، ع ، ح " تەمەن 37 ساڵان، دانیشتوی ئاكۆیانی سەر بە قەزای ڕواندز پیشە پێشمەرگە، هەروەها " ك ، م ، ح " تەمەن 37 ساڵان دانیشتووی هەمان گوندی رواندز و پیشە پۆلیسی فریاكەوتنە لەسەر ڕیگای بێخاڵ نزیك تەلەفریك دەمەقاڵییان لە نێوان درووست بووە و بەشەڕهاتوون و بە چەكی دەمانچە ڕووبەڕووی یەكتر بونەتەوە .
ئاشكراشی كرد" لەئەنجامدا هەردووكیان زامدار بوون و دوای گەیستنی هێزەكانی ئاسایش و پۆلیس دەست بەجێ ڕەوانەی نەخۆشخانەكران، بەڵام بەداخەوە بەهۆی پێكەتنی گولە هەردووكیان گیانیان لەدەستدا".
گووتیشی " لە سەر فەرمانی دادوەر ڕەوانەی پزیشكی دادی كران بەمەبەستی پشكنینی دادی و هۆكار و چۆنییەتی گیان لە دەستدانی و لێكۆڵینەوە لە رووداوەكە بەردەوامی هەیە".
ئەو بەرپرسەی پۆلیسی سۆران دەشڵێ " لە رۆژانی رابردوو كەسێك بە ناوی بەناوی (س،خ،ح) تەمەن 43 ساڵ پیشەی پێشمەرگە، دانیشتووی گوندی كاولە سەربە ناحیەی پیران بە گولە كۆتای بە ژیانی خۆی هێنا، تەرمەكەی لەسەر فەرمانی دادوەر رەوانەی پزیشكی دادی سۆران كرا".
هاوكات، كاتژمێر 5ی سەر لە ئێوارەی رۆژی 6 – 11 – 2019 لە ناحیەی هەریری سەر بەقەزای شەقڵاوە، ئافرەتێك كوژرا. سەرچاوەیەك لە نەخۆشخانەی هەریر بە زاری كرمانجی، راگەیاند" تەرمێك بە كوژراوی گەیشتە نەخۆشخانەكەمان دیاربوو ئاسەواری گوڵەی بە لاشەوە دیاربوو، دوای ئەنجامدانی پشكنیكی پزیشكی تەرمەكەی ڕەوانەی پزیشكی دادی هەولێر كرا. بەپێی ئەو زانیاریانەی دەست زاری كرمانجی كەوتون ئافرەتە ناوی ( ب - ل- تەمەنی لە نێوان 25 بۆ 30ساڵانەو، لە لایەن كەسوكارییەوە بە پێنج گولەوە كوژراوە هۆكارەكەشی بۆ كێشەی خێزانی دەگەڕێتەوە".
، درەنگانی شەوی یەكشەمە 3 – 11 – 2019 لە گەڕەكێكی قەزای سۆران، لە رووداوێكی تردا، كچێكی 15 ساڵان لە ماڵەكەی خۆی بە خنكاوی دۆزرایەوە . لەو بارەیەوە، شێروان خالید گووتەبێژی بەڕێوبەرایەتی بەرنگاربوونەوەی توندووتیژی ئافرەتان و خێزان بە زاری كرمانجی راگەیاند" ئاگادار كراینەوە بە بوونی تەرمی كچێك بە ناوی " ڤ , ر , ح " تەمەن 15 ساڵان و دانیشتووی گەڕەكی بەرخودانی سۆران, بە لەچك و چەفیەی خۆی خۆی خنكادووە" .
ئاماژەشی بەوەدا" هۆكاری رووداوەكە دیار نییە و پەڕاوی لێكۆڵینەوە بۆ رووداوەكە كراوەتەوە و تەرمەكە رەوانەی پزیشكی دادی هەولێر كراوە بە مەبەستی هۆكار و چۆنیەتی گیان لە دەستدانی و لێكۆڵینەوە لە رووداوەكە بەردەوامی هەیە".
ئەو بەرپرسەی پۆلیس ئاشكراشی كرد" تەنها ئەمساڵ حەوت ئافرەت بەهۆی خۆ سووتاندن و خۆ خنكاندن گیانیان لە دەستداوە و ژمارەیەكی تریش خۆیان سوتاندووە بەڵام لە ژیان ماون و بەشی زۆری جەستەییان سووتاوە" .
لەوبارەیەوە، دەریاز عەلی گوانی توێژەری كۆمەڵایەتی لە سۆران بە زاری كرمانجی راگەیاند" كوشتن ئەو دیاردە كۆمەڵایەتیەیە كە لە هەموو كۆمەڵگاكان بوونی هەیە، بەڵام بە جۆر و فۆڕم و شێوازی جیا جیا، كە بریتییە لە كۆتایی پێ هێنانی ژیانی كەسێك لە لایەن كەسێكی تر، كوشتن وەك دیاردەیەكی كۆمەڵایەتی هەر لەسەرەتای مڕۆڤایەتی و دروست بوونی دوونیا هەبووە".
هەندێك جار ڕێژەكەی گۆڕانكاری بەسەر دادێت، ئەمەش بەپێی بارودۆخی كۆمەڵگا، ئەگەر سەیر بكەین لە چەند هەفتە یان چەند مانگی ڕابردوو ڕێژەی كوشتن بەرزبوونەوەیەكی مەترسیداری لە كوردستان بەخۆیەوە بینی، بە تایبەت كوشتن و خۆ كوشتنی پیاوان و ئافرەتان لە دەڤەری سۆران بەرز بوونەوەیەكی زۆری بە خۆیەوە بیینیوە، ئەم زێدە بوونەش مەترسی لە حاڵەتەوە بۆ دیاردە لێدەكرێت وە دەبێتە مەترسی و تێك چوون و شڵەژانی بارودۆخی ناوچەكە .
ئەو توێژەرەی كۆمەڵایەتی چەند هۆكارێكی كوشتن و خۆ كوشتن دەخاتەڕوو و دەڵێ" لاوازیی دامودەزگاكانی دەوڵەت بەگشتی و سیستەمی پەروەردە و دادگا و دامودەزگا ئەمنییەكان بەتایبەتی، هەروەها سیستەمی پەروەردە و خێزان نەیانتوانیوە ڕۆڵی خۆیان بگێرن لە دروستكردنی مرۆڤێكی تەندروست و ئارام لە ڕوی دەرونییەوە، شوێنە ئاینییەكان وەك پێویست نەیانتوانیوە خەڵك لە خراپی و سزا كوشتن بە باشی حاڵی بكەن، دادگاكان و هێزە ئەمنییەكان بەتەواوەتی نەیانتوانیوە وەك پێویست سزای تاوانبارن بدەن هەتا ئیستاش سوڵحی عەشایەری شوێنی دادگا كانیان گرتۆتەوە".
ئاماژەشی بەوەدا" هەبوونی ژمارەیەكی زۆری چەكی بێ مۆڵەت كە بێگومان كێشەی زۆری لە كۆمەڵگا دروست كردووە هەموو كەسێك دەتوانێ چەكی پێبێت و بەكاری بهێنێت بەبێ ئەوەی یاسا ڕێگەی پێدابێت ئەمەش دەبێتە هۆی زیادبوونی ڕێژەی كوشتن".
گووتیشی " دابونەریتی كۆمەڵایەتی، كلتوری سقەت كە رەنگە ئەم كلتور و دابونەریتانە وەهمێك بن یان هەندێك بارو دۆخی سیاسی و كۆمەڵایەتی بەسەر ئێمەی داسەپاندبێت، بونەتە بارگرانی بەسەر كۆمەڵگا، هەروەها كۆمەڵێك ئەڵقە و دراما لە هەندێك كەناڵ پەخش دەكرێن جیا لەوەی درامای توند و تیژ و تێكدەری كۆمەڵێك بەها و كلتورن ڕوحی ڕق و كینە بڵاو دەكەنەوە، پڕن لە كوشتن و كوشتار و خیانەت و درۆ لەهەمان كاتدا شێوازەكانی كوشتن بە سانای نیشان دەدەن . ئەمانە كۆمەڵێك هۆكارن كە بوونەتە هۆی بەرز بوونەوەی كێرڤی كوشتن كە چارسەرەكەشی لەدەست حكومەت و لایەنە پەیوەندی داراكانە تا ڕێگری بكەن لە زیاتر بوونی كوشتن لە كۆمەڵگادا".

بیروڕا

زۆرترین بینراو