كچ و كۆڕانی ئاكرێ فێری ژەنینی موزیك دەكرێن

كچ و كۆڕانی ئاكرێ فێری ژەنینی موزیك دەكرێن

رەمەزان هەرنی– ئاكرێ : ئاكرێ ی هونەر و موزیك، خاوەنی چەندین گورانیبێژو موزیكژەنی بەتوانایە كە شوێن پەنجەییان دیارە لە نێو هونەری كوردی، لە ئێستادا مامۆستایەكی پەیمانگەی هونەرە جوانەكانی ئاكرێ كچ و كوڕانی شارەكە فێری ژەنینی موزیك دەكات،
چیا ئاكرەیی، موزیكژەن و مامۆستای پەیمانگای هونەرە جوانەكان بە زاری كرمانجی راگەیاند"بۆ یەكەم جار لە ساڵی 2008 سەنتەرێكی تایبەت بە فرۆشتنی ئامێرەكانی موزیك دانرا و كاری ئێمە گرێدراوی فرۆشتنی ئامێری موزیكە، پێشتر هاوشارییان بۆ كڕینی ئامێرێكی بچووك، دەبوایە سەردانی دەرەوەی شار بكەن، بەڵام لە دوای كردنەوەی ئەو سەنتەرە، ئیدی ئەوان پێویستیان بە دەرەوەی شار نەماوە"،
لەسەر ئاشناكردنی كچ و كوڕانی شار بە موزیك و فێركردنیان، چیا دەڵێ‌"خولی جۆراوجۆرمان كردۆتەوە بۆ ئەو كچ و كوڕانەی ئارەزوی فێربوونی موزیك ژەنینیان هەیە و، لەبەرامبەر بەشداریكردن بڕە پارەیەكی كەم لە فێرخوازان وەردەگرین و داشكاندنی تایبەتیشمان كردووە بۆ ئەوانەی بارودۆخی ئابوورییان باش نییە",
ئەوەش دەڵێ‌"ئەو كەسانەی لە خولەكانی ئێمە فێری ژەنینی موزیك بوونە، لەسەر ئاستی كوردستان كار دەكەن، بە شێوەیەكی گشتی ئێستا باشتر لە جاران گرنگی بە بواری موزیك دەدرێت، لەلای هەردوو رەگەزەوەو دایك و باوكانیش زیاتر لە جاران گرنگی بە بەهرەی منداڵەكانیان دەدەن لە فێربوونی موزیكدا"،
ئاماژەی بەوەشكرد"گورانی تۆمار دەكەین لەگەڵ سرود بەشێوەیەكی پێشكەوتوو بۆ ژمارەیەكی زۆر هونەرمەندی ناوچەكە كارمان كردوە"، هەروەها ئەوەش دەڵێ‌"بەگشتی هونەرمەندان و بەهرەمەندان ئەم جۆرە ئامێرانە دەكرن ( ساز، گیتار، عود، كەمان، جمبش) لەگەڵ چەندین ئامێری تر كە كەلوپەلیان هەرزانە و بەئاسانی دەست دەكەون"،
چیا باس لە پێشوازی گەرمی كچ و كوڕانی ناوچەكە دەكات بۆ خولەكانی فێربوونی موزیك و دەست خۆشی لەو دایك و باوكانەش دەكات كە هاندەری رۆڵەكانیانن بۆ فێربونی ئامێرێكی موزیك.

زۆرترین بینراو