كۆڵانێكی بەرخودان بێ خزمەتگوزارییە

كۆڵانێكی بەرخودان بێ خزمەتگوزارییە

محەمەد ئامۆكەیی- دیانا: لەچەند گەڕەكێكی قەزای سۆران و ناحیەیی دیانا، دەستكراوە بەقیڕتاوكردنی كۆڵانەكان گەڕەكی بەرخودان یەكێكە لەو گەڕەكانەی هاووڵاتیان گازندەی ئەوەدەكەن كە یەكێك لە كۆڵانەكان بێ خزمەتگوزارییەو داوادەكەن لایەنی پەیوەندی دار ئاوڕێكیان لێ بدنەوە.
عەبدی لەزگین هاونیشتیمانیێكی گەڕەكی بەرخودانە لە ناحیەی دیانا، بۆ زاری كرمانجی گووتی" زۆربەی كۆڵانەكانی چوار دەورمان قیڕتاوكراون تەنها كۆڵانی ئێمە نەبێت، من لە بەرپرسانی شارەكە دەپرسم بۆچی بەس گەڕەكێكی هەژار نشین بێ خزمەتگوزارییە زۆربەی ئەو ماڵانەی لێرە نیشتەجێن خاوەن شەهید و ئەنفالن، ناكرێت خەڵكێك خاوەن قوربانی بێت و گەڕەكەكەی ناوی بەرخودانبێت وەها پاداشتی بدەنەوەو فەرامۆش بكرێت."
ئەو هاووڵاتییە ئاماژەی بەوەشكرد" لەگەڵ چەند كەسێكی گەڕەك چووینەتە شارەوانی سۆران قائیمەقامیەت و بگرە پارێزگاری هەولێریش، بەڵام وەڵامی ئەوان ئەوەبووە كە پارەی پێویست نیە بۆ قیڕتاوكردن، داواكەین هەرچی زووە خەمێكمان لێبخۆن و لەو نەهامەیتە رزگارمان بێت و گەڕەكەكەمان سیمای شاری پێوە دیاربێت.
هاووڵاتییەكی تریش باسی لەوەكرد" جگە لە نەبوونی رێگای قیڕِتاو ئەو كۆڵانە گرفتی تریشی هەیە وەك نەبوونی مەنهۆڵ و بۆ ئەوەی لە كاتی باران بارین ئەو ئاوەی لە ماڵانیش دێتە دەروە لە جیاتی ئەوەی مەنهۆڵ هەبا لە شوێنێك كۆدەبێتەوە و ئەوەش وادەكات زۆر جار ئاو بچێتە نێو حەوشەی ماڵەكان، بۆیە ئاوڕ دانەوە لەو كۆڵانە ئاوڕدانەوەیە لە خەبات و ماندووبوونی كەس و كاری شەهیدان و ئەنفال كراوەكان.
لای خۆیەوە مەغدید عەریف ئەحمەد، بەڕێوەبەری ناحیەی دیانا بە زاری كرمانجی راگەیاند" نەك هەر ئەو كۆڵانەی گەڕەكی بەرخودان بەڵكوو زۆر شوێنی تر ماون لە سەنتەری ناحیەكەمان وەك گەڕەكی نەهری و چەند شوێنی تر، بۆیە چاوەڕوانی ئەوەین لەگەڵ دەست پێكردنەوەی پڕۆژە خزمەتگوزارییەكان ئەو گەڕەك و كۆڵانانەی ماون سەرجەمیان قیڕتاوبكەین كە ئەو كۆڵانەی گەڕەكی بەرخودانیش لەنێو ئەو پڕۆژەیەدەبێت و گوژمەكەشی بۆ دیاریكراوە و نزیكەی 28ملیۆن دینارە."
بەڕێوەبەری ناحیەی دیانا ئەوەشی گووت" هۆكاری قیڕتاو نەكردنی ئەو كۆڵانەش نازانین لەبەر ئەوەی ئەو كۆڵانەنەی پێشتر قیڕكرابوون لە پێش دەست بەكاربوونی من بووە بۆیە هۆكاری ئەوە نازانم بۆچی تەنها ئەو شوێنە خزمەتگوزاری رێگاوبانی بۆ نەچووە، چەندین جاریش دانیشتوانی سەردانیان كردووین و ئێمەش لەسەر ئەو گرفتە قسەمان لەگەڵ شوێنی بەرزتر كردووە بۆ ئەوەی بتوانین خزمەتگوزاری بۆ سەرجەم دانیشتوانی ناحیەكەمان دابین بكەین.

زۆرترین بینراو