كۆڵبەرانی سنوور بۆ بژێوی ژیان خۆیان دەخەنە مەترسییەوە

كۆڵبەرانی سنوور بۆ بژێوی ژیان خۆیان دەخەنە مەترسییەوە

زاری كرمانجی- كێلەشین: كاسبكارانی رۆژهەڵاتی كوردستان لەسنووری كێلەشین لە نێوان شاری شنۆی رۆژهەڵاتی كوردستان و شاردەێی سیدەكانی سنووری پارێزگای هەولێر، كاری كۆڵبەری دەكەن، دەڵێن: "سەختی بژێوی ژیان لە وڵاتی ئێران وایكردووە، رووبەڕووی چەندین ئاستەنگ ببینەوە بۆ پەیداكردنی پارو نانێك بە جۆرێك ژیانمان دەخەینە مەترسی".
لە سنووری كێلەشینی ناحیەی سیدەكان، رۆژانە سەدان كۆڵبەرو كاسبكاری رۆژهەڵاتی كوردستان، بە كۆڵەپشت و بەپشتی و ئەسپ و وڵاخەكانیان كاری كۆڵبەری دەكەن، بەمەش دەیان كاسبكاری باشووری كوردستان هەلی كاریان بۆ رەخساوە، رۆژانە شتومەك بە ئۆتۆمبێلەكانیان دەگوازنەوە نزیك سنوورەكەو لەوێشەوە رادەستی كۆڵبەرانی دەكەن و بەهەمانشێوەش كەل و پەلەكان لە كۆڵبەران وەردەگرن و دەیانگوازنەوە بۆ شارو شارۆچكەكانی هەرێمی كوردستان، سەرەڕای خراپی رەوشی سەربازی ئەم سنوورانە، بەهۆی بوونی پارتی كرێكارانی كوردستانی توركیاو هێزەكانی رۆژهەڵاتی كوردستان، زۆرجار ناوچە سنوورییەكان لەلایەن سوپای توركیاو كۆماری ئیسلامی ئێران بۆردوومان دەكرێن و لەم نێوانەدا خەڵكی سڤیل و كاسبكار دەكرێنە ئامانج و دووچاری قوربانیدان دەبنەوە.
ئیحسان چەلەبی بەڕێوەبەری شارەدێی سیدەكان ئاشكرای دەكات :" بە هۆی رەوشی سەربازی سنووری كێلەشێن و بوونی هێزەكانی بەشەكانی دیكەی كوردستان و دەستێوەردانی وڵاتانی دراوسێ‌ وەك ئێران و توركیاو بۆردوومان كردنی ناوچەكە، نەمانتوانیووە وەك پێویست ئاماری ئەم كۆڵبەرو كاسبكارانە وەربگرین، كە لەسنووری كێلەشین كاری كۆڵبەری دەكەن". دەربارەی ئەوانەش كە رۆژانە كەل و پەل دەهێن و دەیبەن بۆ سنووری كێلەشین، رایدەگەینێت" هەر شتێك بە نایاسایی بە سنوورەكەمان تێپەڕبێت رێگە پێدراو نییە، بەڵكو زیاتر رێگە بەم كاڵایانە دەرێت كە گومرگ دەكرێن و یاساین".
یەكێك لەو شۆفێرانەی كاری هێنان و بردنی كەل‌وپەل بۆ سنووری كێلەشین و شارو شارۆچكەكانی هەرێمی كوردستان دەكات، گووتی:" كاری ئێمە قورسە بەتایبەت بەهۆی رەوشی سەربازی دەڤەری برادۆست لە سنووری شاردێی سیدەكان، بەڵام ئێمە راهاتوین و ساڵانێكە لەسەر ئەم كارە بەردەوامین، بەپێی خواستی كۆڵبەرەكان كاڵاكانیان بۆ دەبەین و لەوێشەوە بارەكانیان لێوەردەگرین و دەیانگوازینەوە بۆ شارو شارۆچكەكانی هەرێمی كوردستان، زیاتریش كار لەسەر ئەم كاڵایانە دەكەین كە ئاساین و خۆمان لە شتی نایاسایی پاراستووە".
گووتیشی :"ئەگەر بۆ مەوادایەكی كەم لە رێڕەوی رێگاكەمان لابدەین مەترسی لەسەر ژیانمان دروست دەبێت، چونكە بەهۆی رەوشی سەربازییەوە چاودێری بەردەوامان لەسەرەو نامانەوەی ژیانی خۆمان بخەینە مەترسییەوە، سەرەڕای ئەمەش كاری كۆڵبەری لە سنووری كێلەشین رۆژ لەدوای رۆژ لە زیادبووندایە، هۆكارەكەشی دەگەڕێنەوە، بۆ خراپی رەوشی ئابووری وڵاتی ئێران، كە هاووڵاتییانی ناچاری كاری كۆڵبەری كردووە و بۆ بەدەست هێنانی پارووە نانێك رێگای سەخت ببڕن".
رەوشی خراپی پژێوی كوردانی رۆژهەڵات وای كردووە هاووڵاتییان كمتر بیر لە پشو بككەنەوە و هەموو بیر لە پەیداكردنی پارە بكەنەوە، هەروەك، كۆڵبەرێكی دیكە كە خۆی بە رەزا سەید، ناساند گووتی:" ئێمەش حەز دەكەین لەناو ماڵ و منداڵەكانمان پشوبدەین و ماوەیەك بحەسێینەوە، بەڵام رەووشی خراپی ئابووری وڵاتی ئێران وایكردووە، خەڵكی ئەم وڵاتە بۆ بەدەستهێنانی پارونانێك ناچار بێت، روو لەكاری سەخت بكات، نەك لەمانگی رەمەزان نەوەستاوین، بەڵكو بەفرو سەرماو گەرماو ئاژەڵی دڕەندەو تەقەی پاسداران نەیتوانیووە ئێمە بوەستێنێت، لەكاتێكدا لەسنوور سەدان كۆڵبەر بوونەتە قوربانی و بەر گوللەی پاسداران كەوتوون و لەبەر بەفرو سەرما رەقبوونەتەوە".
ئەم كۆڵبەرە ئەوەش ئاشكرا دەكات " كە نەك تەنها خەڵكی رۆژهەڵاتی كوردستان لەم سنوورانە كاری كوڵبەری دەكەن، بەڵكو فارس و عەجەم و زۆربەی نەتەوەكانی دیكەی ئێرانی ناچار كردووە، كە بۆ بەدەست هێنانی پارو نانێك روو لەسنوورەكان بكەن، تەنانەت كۆڵبەری وامان لەگەلە هەڵگری ماستەرو بڕوانامەی بەرزە، وەك دیاریشە بەهۆی قوڵبوونەوەی خراپی روشی دارایی ئەم وڵاتە رۆژ لەدوای رۆژ رێژەی هەژاری روو لە زیادبوون دایە".
سنووری كێلەشین دەكەوێتە ناوچەی شارەدێی سیدەكان بەدووریی 35كم لە ناوەندی شاری سۆران و 144كم لە باكوری رۆژهەڵاتی هەولێر هەڵكەوتووە. لەو شارەدێیەدا كە 250 گوندیش لەخۆدەگرێت، سەرووی 15 هەزار كەسی تێدا دەژین، هاوسنوورە لەگەڵ رۆژهەڵات و باكوری كوردستان.

زۆرترین بینراو